我只不過喺自修室溫書，點知比我遇番佢。: <三十八>合久必婚
翻到屋企之後，阿媽佢地仲喺到講緊小涼啲嘢，佢地都對佢讚譽有加。
「啦，你個衰仔執到支好籌就好好珍惜啦。」老豆講。
「知啦知啦。」
然後我就去咗沖涼，出黎之後，
「你問下人地去唔去你表姐個婚禮，介紹下俾其他親戚朋友識。」阿媽講。
「得咩？臨時臨急加到位架啦？」
「得架啦得架啦，再唔係咪讓你個位俾佢坐。」唔係掛…
我坐咗喺床對住部電話好耐，又令我諗番起小涼問果條問題。
「你覺唔覺..太快啊？」所以令我好躊躇，唔知問唔問佢好。
咁啱佢又打電話黎。
「喂？死人頭？」
「嗯？做咩？」
「冇啊，睇下你做緊咩之嘛。」
「啱啱先見完炸喎，咁快又掛住我啦？」
「少少啦...」難得冇口硬喎。
「頭先講嘅嘢..你唔好介意喎。」佢主動提起番。
「唔會啊，我明嘅！係啦，阿媽想請埋你去我表姐婚禮，你得唔得閒？」死就死啦，問下冇死嘅。
「真係架？好啊好啊，幾時呀？」下，咁爽快嘅？
「咁順攤？禮拜三啊。」
「嗯，咁你黎接我啦到時。」
「好啊。」接下來呢幾日，阿媽除咗番工都掛住幫手婚禮啲嘢，而我除咗補課就宅咗喺屋企，間唔中同阿豪佢地打下機，再唔係就同小涼傾電話。
.
.
.
「得未啊，老嘢！霸住個廁所咁耐！一陣遲到啊！」一朝早阿媽就開老豆拖。
佢地正準備去表姐屋企睇玩新郎，我就行禮先去，費時見證阿王咁慘烈嘅時刻。
去到咁上下時間，我就去小涼屋企接佢。
「喂，我到啦，你落黎啦。」我到咗就打俾佢。
「咪落咗囉，後面啊！」我望去後面，又係一個令人砰然心動嘅畫面。
佢著咗一條香檳色嘅吊帶摺裙，加咗對白色嘅平底鞋，面上冇果種濃妝艷抹，相反只係化咗個淡妝，其實4個字講曬，天使下凡。
「做咩呆咗咁啊？唔靚啊著得？」
「唔...唔係啊..好..好靚添！」
「你今日都好靚仔啊，都未見過你著西裝，等陣..」
之後佢行埋黎幫我整理好個衫領，霎時覺得自己好幸福。
「行得啦。」佢伸隻手出黎，示意我拖住，我緊係立即拖實啦，有得揀呢世都唔想放。
去到地鐵站，我地咁啱見到小霖喺到等車。
「喂，小霖！」小涼見到佢就即刻嗌住佢。
「咦咁啱嘅？」今日小霖都著得好靚，一條粉紅色嘅連身裙，簡簡單單卻不失典雅。
「一齊啦咁，橫掂順路。」我講。
「下..err..唔係咁好掛。」佢猶豫不決嘅同時，一架地鐵快速咁駛過，將小霖嘅聲音蓋過。
列車開門之後，一個熟悉嘅面孔出現喺我地面前。
「哦....原來係咁~~~」我同小涼都邵音音陰陰笑咁講。只見小霖塊面已經紅過紅蘋果。
「喂，咁啱呀，一齊啦咁！」我對住阿豪講。冇錯，黎接小霖嘅就係阿豪。
上到車之後，佢地2個女仔，我地2兄弟，各有各傾。
「喂，兄弟，得米都唔出聲？」我笑佢。
「唔好亂講啊，我見順路先約埋佢炸！」佢好尷尬咁講。
「你先得米啦！」佢補充，講緊我同小涼。話說我都未同佢地講，啱曬啦，今日可以公開埋。
「係啊..一齊咗冇耐。總之你有你努力，我又有我精彩，搵日兩pair人出黎玩下幾過癮！」
另一邊...
「咦，你同阿豪進展好似唔錯喎。」小涼對住小霖講。
「唔係啦..仲係認識緊炸..」
「識下識下就有感覺架啦，嘻嘻。」
「唔好亂講啦..順其自然就好。」
就係咁傾下傾下就到咗婚禮現場。
「喂，廢紙阿豪呢邊！」阿星見到我地就嗌。
「Wowwwwwww，廢子楓帶埋女朋友黎！！」個個見到都起曬哄，搞到小涼怕曬醜咁企喺我後面。
「執到啦你，女朋友咁靚。」個雞蟲揚又喺到講。
「天理何在！阿楓都執到個荀盤！」阿堅都附和，有必要...咁誇張咩。
「咦，小涼，你都黎埋啊？」阿月同阿言唔知喺邊到竄出黎。今日佢地一個黑一個白，組成黑白雙煞，肯定殺死唔少女啦！
「呃..係呀！阿月阿言！」小涼見到啲熟人先放鬆啲。
阿月行埋黎靜靜雞問我：「一齊咗啦？」
我點下頭，佢了解咗之後就同小涼講：「啊哈哈哈，放鬆啲啦，唔洗理班友，佢地傻傻地。」
佢咁講完小涼先冇咁緊張。
「咦，小涼小霖你地都黎咗啊？招呼唔到啊。」阿媽阿爸走過黎講。
「世伯、伯母/Uncle、Auntie」佢地都打聲招呼。
之後我地就去見阿王同表姐佢地，小涼就同我阿媽傾計。人生最靚果日一定係結婚，果然冇錯，因為伴隨住外表嘅仲有一份喜悅同埋自信。
「郭sir，郭太！！」班友仔好識do咁嗌佢地。
「喂喂喂，黎齊啦！」阿王好開心咁講。
佢地都已經當咗阿王係阿哥咁，所以個個都好興奮。我地影咗幾幅相，好似又影多次班相，什至係家庭相咁。
影完之後，我先帶小涼去見佢地。
「嘩，勁喎表弟，個女朋友咁靚。」
「哈哈，表姐你唔好笑我啦，今日你至靚啦。」小涼講。
然後我地又影多咗張相，不過今次係以表弟嘅身份。
隔多陣我地就去咗觀禮，個典禮都不外乎果啲煽情嘅講詞，肯定喊死唔少人，喊得最勁當然係表姐。
之後我地就去咗酒店，除咗阿言佢地幾個之外，其他同學都已經走咗。
去到酒店等入席果陣其實都冇咩嘢做，無無聊聊咁。我同佢地就喺到鋤下D，又打下麻雀咁。小霖同小涼就去周圍影相。
之後我都叫阿月幫我同小涼影幅相，我地喺條長樓梯攬住咁影，好似喺到預影結婚相咁。
「嘩，襯到呢..」阿言喺到笑我地。
「哼，今日阿晴唔喺到仲唔到你葡萄下我！」我講。
「阿豪同小霖都影張啊。」阿月講。
「下..唔好啦。」佢地都扭扭捏捏咁，我同小涼推佢地上去佢地先影。
佢地企到硬一硬，好似影證件相咁，好好笑。
「拍埋啲啦阿豪，我驚你唔影你後悔啊。」佢卒之鼓起勇氣搭住小霖膊頭。
經過漫長等待先開席，之後嘅嘢其實都一式一樣。我地都係影下相，食下嘢，睇下影片就完咗。
散席之後阿爸車埋小霖同小涼，沿途都係阿媽同果2個女仔傾計，我就專心聽下歌，睇下風景。
不過，我同小涼隻手就仍然拖得實一實，打風都打唔甩。