我只不過喺自修室溫書，點知比我遇番佢。: <三十七>見家長
雖然暑假開始咗，但係眾所周知中五係冇暑假放嘅，要成日翻去補課，朝八晚六呢啲生活已經好等閒。
由於我同小涼都要補課，所以都唔太多時間見面。一時就佢要翻我唔洗，一時就我要翻佢唔洗。
幾辛苦先等到星期六，大家都唔洗補課，先可以有半日時間見面炸。
「喂，巴渣妹，聽日你想去邊呀？難得唔洗補課。」我同佢傾電話果陣問。
「嗯..唔知呀，咁攰都唔係好想出街。」
「唉，我都係..咁不如你上黎我屋企睇戲啦，咁咪唔洗出街又可以見到你囉。」
「好呀好呀！但係..會唔會好似上次咁..」佢經過2秒開心之後就好疑慮。
「怕咩姐，而家我地拍緊拖加麻！」
「又係喎，哈哈，咁好啦，聽日見。」
.
.
「叮噹」、「叮噹」
「開門啦呀媽！」我仲瞓緊教，所以就叫咗阿媽去開…嗯？
「搵邊位？」
大獲！
我即刻跳落床，衝出房。
只見門外嘅小涼都企到直一直，個樣好緊張咁。
「我..我搵阿楓嘅..伯母你好。」
尋日都只係講過下，點知咁快就撞到應一應。
「呀…呢個我阿媽，呢個係小涼，哈哈哈..」始終都係需要我解圍嘅。
「哦..小涼呀嘛，入黎啦，哈哈。」好彩佢冇黑面姐。
「衰仔，我番工啦，小涼今晚喺到食飯啊？」
「下..err..好啊！」佢先有點猶疑，後帶點興奮。
「衰仔你唔好亂搞嘢啊！」嘩大佬啊，我地好純潔架！
阿媽走之後我問佢：「點呀，我阿媽冇咩嘢啊可？」
「佢個樣好有威嚴..佢一開門果陣都有啲驚。」
「其實佢冇咩嘢架，對對下就慣，你小心我老豆就真。」
「試下今晚再認識多啲囉..」佢答。
「係喎，你做咩咁早黎？」
「12點啦仲早，瞓到咁晏架你！」
「難得放假啊嘛….電視櫃有好多碟啊，你自己揀下有咩睇啦，我去刷牙。」
出到黎之後，客廳竟然冇任何電視聲，反而廚房就有煮食聲。
「你去揀碟啦，我煮個麵你食。」佢講。
原來大台嘅公式劇情可以咁浪漫架~~
我揀咗套<2002>黎睇，呢套正嘢。
「食得啦！你搵咩睇啊？」
「2002...呀」佢出黎果陣我呆咗喺到，個畫面極度吸引，一副賢妻咁嘅扮相，不過聽講靚女煮嘢食都多數...
好快呢個念頭已經徹底打消咗，個公仔麵彈牙到食緊魚麵咁，正到啊！
之後我地就開始睇戲啦。計埋戲院果次，今次係我地第二次睇戲，唔同嘅係，我今次終於可以唔洗再葡萄阿言啦！
成套戲小涼都好投入。佢見到火鬼果陣依然好似其他女仔咁合埋眼唔敢睇，睇到「交通部劉華」果到又笑到碌地咁制，見到霆鋒就死果到又會忍唔住喊。
呢套係我其中一套睇好多次都唔會厭嘅戲。
可能因為恐怖又有，笑位又有，浪漫又有，感動位又有。最緊要係謝霆鋒同馮德倫型啊嘛！最後大戰果到真係好睇到爆 ！聽親首Let Me Die都夠J幾日。
「I will love you till the end of time With every breath of mine,
I'll hold you by my side
But I'll rest in peace My sweet heart would you let me die in your arms with you
Only you can stop the rain tonight
Only you can change my world from black to white
So, I'll close my eyes and dream a little more」
「睇完啦..之後睇咩啊..」佢頭先睇到喊得好犀利，之後鼻塞塞咁問。
「你想呢？」
「嗯..有冇玻璃之城啊？」
「咁鐘意睇埋啲舊戲嘅你？」
「有天濛光啊嘛，佢所有嘢我都好鐘意！」
「我唔信！我一定鐘意佢多過你鐘意佢！」我唔忿氣，我對黎明都係至死不渝的。
「唉呀，唔好拗啦，有冇姐？」
「梗係有啦！而家播。」
無可否認，呢套真係套好浪漫嘅愛情片，將對愛情無能為力果方面寫得好好，喺用黎呃眼淚嘅感情位拍得淋漓盡致。
「我希望你唔會唔記得，我地喺埋一齊嘅每一日，都係咁開心，我都係咁愛你。」許港生對韻文講。
「好浪漫啊..」小涼伏喺我膊頭講。
「林小涼，我都希望你唔會唔記得，我地喺埋一齊嘅每一日，都係咁開心，我都係咁愛你。」我照辦煮碗對住佢講一次。
「傻佬，我都係！」
「傻婆。」
睇完之後我地就入咗房..
.
.
唔好成日諗埋啲衰嘢啦，我開咗YouTube，我地係咁聽首「今生不再」，繼續享受套電影嘅淒美帶黎嘅浪漫感。
然後就係咁聽黎明啲歌，對我地黎講係一種共鳴感，雖然感覺好老土，但係，黎明本身點樣都唔會老土加嘛。
唔好問我講緊咩啦，黎明自己有時都唔知自己講咩。
聽聽下，小涼竟然瞓著咗。
我將佢放平番喺床，冚埋被先去打機，幾周到。
隔咗陣阿媽都番黎，今日星期六所以佢都係翻幾個鐘。
我出去睇下佢買咗咩。豈料佢就問我..
「佢就係上次偷走個女仔啊？」我地係傾得好細聲嘅。
「下..係啊。」
「識咗人好耐？」
「幾個月囉。」我..淆青。
「咁快就拍拖？」
「唔知點解..對佢嘅感覺好似好熟悉，好似識咗好耐咁。最重要係，我鐘意佢。」
「你啲後生仔..咁小霖點呀？」
「媽呀..都話我同小霖冇嘢。」
「我唔理你啊，總之唔好掛住拍拖搞垮個DSE。」
「知道母親大人！」唔好以為佢開咗綠燈啦，都要觀察期嘅。
冇幾耐之後小涼都起咗身。
「嗯..我瞓咗好耐呀？」
「係啊..8點啦而加！」我玩佢。
「8..8點？！」佢即刻拎部電話出黎睇。
「死人頭！！又玩我！6點幾之麻而加！」佢起身想打我，我即刻衝出房。
佢跟住我跑出黎，但係一見到我阿媽就煞曬制。
「Aun..Auntie。」即刻扮番個斯斯文文嘅女仔。
「你地繼續玩啦，唔洗理我架。」佢喺側邊食曬花生。
「哈哈..Auntie今晚煮咩呀？我幫下手啊。」又幾識做喎。
果然阿媽遇到同佢講廚藝嘅人就連個仔係邊個都唔認得，佢地喺廚房傾得大聲到呢，師奶嘅channel果然都係喺廚房先較到台。
「我翻黎啦…」我個成日懶詼諧嘅老豆係時候出場。
「翻黎咪翻黎，洗唔洗咁有朝氣。」我講。
「廚房咁嘈嘅，小霖黎咗啊？」
「殊..」我瘋狂fing手擰頭。
「老嘢你唔好亂講嘢！」唔好以為我地關係唔好，只係我地嘅溝通方法..比較特別。
「食得飯..啦！」小涼捧住啲餸出黎，到我老豆嚇一嚇，之後即刻放低碟餸再同我老豆打招呼。
「世伯你好，我叫小涼。」
「呵呵，你好你好。」
「唔洗理佢，佢傻架。」我對小涼講。
我老豆換完衫出黎咁啱我都喺房出黎。
「放心，今次我識做，即刻著番件衫..女朋友黎？」
「係啊，食飯啦！」
雖然今次換咗係小涼，但係上次果種壓迫感又黎過...
「你地試下啲餸啦，小涼有份整架，等你地成日話食我啲餸厭。」阿媽講。
「咁勁架咩你，識煮咁多嘢？」我都好驚嘆。
「平時有跟我媽咪學下嘅。」佢好斯文咁講，同佢平時個自信tone好唔同。
「咁你家教應該幾好喎，好少女仔會學煮嘢。」死啦死啦，講到家庭啦。
「嗯..係呀，佢地比較傳統，所以都想我學識呢啲。」Oh My God好淡定。
「食..食雞翼啦阿媽。」食下飯啦好嘛...點解搞到我仲緊張過小涼。
「呵呵，你都食舊啦仔。」老豆太了解阿媽，所以暗示我都係唔好出聲。
好啦，呢場攻防戰我退出啦，由佢地相愛相殺啦屌。
「咦咁你讀咩學校啊？」
「聖喇拔教會學校。(尻作的)」
「噢，尖沙嘴果邊嘅名校黎架喎，咁你成績實好好。」
「哈哈..不過不失啦..」
「咁你就要好好幫下我個衰仔啦，佢啊..」唔洗講啦，又喺到數我。
「哦..我會架啦，我同小霖都會好好睇實佢。」
「噢，你都識小霖架？」喂大姐你地真係唔洗食飯架？
「係啊，好熟架啦我地。」
「衰仔你執到啦，有兩個咁叻嘅女仔幫你，你唔好衰俾我睇。」為何受傷的總是我......
「呵呵！」唔洗問啦，我老豆係出黎搞笑嘅，不過咁，最後都見到阿媽暗地咁向我舉手指公，我先鬆口氣。
送小涼番去果陣，喺一輪皎潔嘅明月底下，當然要散下步先啦...浪漫嘛。
「點呀，我阿媽佢好煩啊可。」
「唔係啊，幾好傾啊我地。」佢笑得甜絲絲咁。
「我家長你就見完啦，幾時到我見你家長先？」
「不如遲小小啦..我仲未同佢地講我拍拖...」
「咁點解唔講？」
「你覺唔覺..太快啊？」太快？進展太快？
「我..遲啲再同你解釋啦，搵到機會我就會同佢地講。」
「好啦...」
番去果陣，我一直喺到諗，會唔會真係進展得太快？確實我地都仲係熱戀，都未算穩定。佢擔心都係正確嘅..但係佢又有咩要同我解釋？我諗唔透。
只係..呢個想唔透嘅解釋又會成為我地另一個難關。