我只不過喺自修室溫書，點知比我遇番佢。: <三十九>插班生

呢個暑假，係我人生最有意義嘅暑假，小涼陪我去咗好多我想去或者我未去過嘅地方。喺唔同地方留下咗好多足跡，好多回憶。
 
但係美好嘅回憶總係好短暫…唔係我地感情生變，只係好快已經到咗開學..最後的開學日。
 
中六，有好多令自己難離難捨嘅「最後一次」，曾經嘅山盟海誓，話會經常再聚，到後來都會灰飛煙滅。
 
所以其實要享受嘅最好就當下盡情享受。
 
「嘩，大新聞，竟然有新插班生！」阿豪講。
 


「你冇收錯風啊？呢啲時候學校點會收插班生？」
 
「冇收錯風啊，聽講係個超級學霸，而且仲好有錢。」
 
「即係寧願洗好多錢同冒住趕唔上課程嘅風險都要過黎讀？！」阿星問。
 
「屌，都話好有錢，應該唔志在啦，況且點會趕唔上課程姐，都教曬啦啲嘢。」
 
吓，咁吊詭？！更匪夷所思嘅係，點解阿豪會知道咁多嘢？
 


算，呢啲唔重要，最重要係咩人要呢個時候先轉過黎咁搞笑。
 
「男定女黎架？」
 
「咁我就唔知啦！」
 
「Good Morning Class ！」阿王行入黎講。
 
「相信大家都收到啲風，我地班今年會多個插班生架啦。啦，得番半年時間，希望你地可以好好同新同學相處啦。」
 


「阿sir，點解會而加先有插班生嘅？」
 
「真實原因就當然唔可以透露啦，不過校長認為佢係我地學校狀元嘅希望，所以特別破例錄取。」荒唔係個有錢老豆捐好多錢俾學校咩，真係腐敗。
 
「藍同學，你入黎啦！」
 
全班都全神貫注，期待緊入黎嘅會係咩人。
 
「踏、踏、踏」入黎了…
 
「大家好，我叫藍靜。」係個女仔，仲要幾好樣喎，係把聲..高音咗少少。
 
「嘻嘻，蕭皓月，我搵到你啦！」新同學望住阿月大嗌。
 
納尼？！


 
「噢~~woww~」成班都起曬哄，但只見阿月低曬頭咁，好似唔想面對個女仔。
 
阿王都一時唔知點應對，就打圓場話：「啊..藍同學，你就坐喺張子妮同學隔離啦好嘛？」
 
「阿sir，我可唔可以坐喺蕭同學隔離？」
 
「下..err..阿月你意思點？」阿王問。
 
「我..」
 
阿月都未講完，阿王就插嘴：「見你咁渴求嘅眼神就知你冇問題啦。」
 
嘩操，姓屈架你，我都戥阿月慘，我地都對住佢劃咗個十字聖號。
 


不過都難怪阿王嘅，佢唔應承嘅話恐怕手尾好長，不過..江湖從此多事了。
 
今日開學日都係處理下啲無聊嘢，班會果啲一切照舊，其實得閒嘅時間比較多。
 
最重要係，小息頓時變得風起雲湧，差唔多半間學校嘅人都沖咗黎我地班。
 
「嘩嘩嘩，新黎個插班生好靚啊！」呢句說話係我成日聽得最多嘅說話。
 
個個男仔 狗公都要黎湊下熱鬧。
 
另一邊廂，好多女仔都對住插班生磨牙擦掌，準備討伐佢咁。當然啦，阿月喺學校咁受歡迎，個插班生一黎到就點名要痴住阿月，梗係令好多人妒火中燒。
 
一開學就搞啲咁激嘅嘢，我只想安安靜靜讀個書炸！
 
成個班主任課淨係見到個插班生係咁煩住阿月問東問西，阿月都就黎癲咁滯。


 
到咗放學，我地都對呢件事好好奇，所以約咗喺星矢吧等，不過當然要阿月撇得甩條女先啦。
 
「月月，你去邊啊？我又去！」插班生仍然纏住阿月。
 
「你走啦，唔好再跟住我啦！」從來冇見過阿月咁無能為力嘅樣。
 
「唔好啦，人地想跟埋你嘛！」嘩屌，聽到都打冷震。
 
「頂..你一係番屋企等我啦！」吓..番埋屋企..嘩..
 
「咁你早啲番啦嘻。」
.
.
.


「條女咩來頭啊？」去到星矢吧我地劈頭就問。
 
「唉..我本身咩料啊？」佢問番我地。
 
「有錢仔囉。」阿星講。
 
「條女係點入黎啊？」
 
「佢考入黎同埋屋企人洗好多..錢..」
 
「哦！條女都係有錢女，仲要係你地嘅世交！」阿豪講。
 
「唔止..仲係一場政治婚姻。」唔係咁老土啊？！
 
「呢個年代仲有呢啲架咩？」我問。
 
「即係我唔係想奚落你地，但係我地呢啲背景嘅，你知幾多啊？好黑暗架。」
 
「不過阿月咁靚仔，就算唔係政治婚姻，我係條女都狗衝埋黎啦！哈哈！」阿星講。
 
「屌你。」阿月講。
 
「個女仔都幾靚女啊，你唔鐘意咩？」阿言問。
 
「佢好煩架...呢個暑假佢仲搬咗黎住，係我地阿爸安排嘅，我已經要晚晚對住佢，而家連..唉屌。」
 
「可能慢慢你搵到感覺呢。」正在努力緊嘅阿豪感同身受咁講咗呢句嘢。
 
「唔會囉。」
 
「會唔會都好啦，總之肯定有排煩。」我講。