我只不過喺自修室溫書，點知比我遇番佢。: <三十六>笑著說再會

話咁快，今日已經係結業禮，又係派成績表嘅日子。

每當呢一日來臨，都要循例聽校長噏幾句…其實係幾十句先啱，然後就頒一輪獎先上得課室。

其實每年都係睇住阿言上台落台再上台，不斷嘅循環其實都有啲悶。

「全年進步獎，Form 5A 姚智星同學！」嘩，唔乸係啊？搞咩上進咗咁多？唔通有女？？

上到課室，阿王就開始派成績表。



「喂，你第幾？」個個一派完卷就開始四圍問人。

「阿楓你考成點？」小霖問我。

自從果晚之後，佢睇落真係放低咗咁，雖然唔知係咪真啦，不過既然佢肯同我講嘢我都無謂老老套套。

「OK啊，全班第六，全級廿二，你呢？」都係靠科Econ拉一拉姐。

「高你少少啦，全班第三，又係輸俾阿月。」



「哈哈，佢兩個唔洗諗住追得贏啦」

「好啦好啦，靜少少！」阿王大嗌。

「啦，各位同學，今次成績當然有人考得好，有啲冇咁好，但係我希望你地都唔好氣餒，下年就到你地上戰場，未發力嘅真係要加油啦！」

「另外另外，而家誠邀大家出席下星期小弟嘅婚禮，到時早啲到過黎影幅相啦！」
.
.
「喂，阿星你搞咩？咁勁嘅呢個學期突然？」我地喺星矢吧審問佢。



「我都估唔到今次會有第四，嘻嘻，搶咗你楓哥同豪哥個位置，唔好意思～」

「男仔突然發奮得一個原因架姐～」小霖喺側邊笑佢。

「咩...咩姐，係呀，我係鐘意咗個女仔啊...」

「woo..係邊個係邊個？」佢地七嘴八舌咁談論住呢件事。

年輕就係咁，一聽到呢個鐘意果個 ，果個鐘意邊個，就會好興奮，食曬花生咁八掛一番。

到入咗社會，你主動提起呢啲，人地只會覺得你無聊，叫你快啲收皮。

所以我地先會咁懷緬學生時光，仿佛係一個藉口俾我地去做盡啲而加睇起上黎好戇尻嘅事。



「我送你啊！」我地走果陣阿豪同小霖講。

「嘩咦～」我地暗暗叫囂。

「好呀！」佢又應承咗喎。

「喎㗅～」這是祝福，嗯嗯。

就係咁，我地三個就一齊行去巴士站...係啊，雖則我都唔太想做呢個電燈膽，但係鬼叫我又係翻屋企咩！

喺個過程，表面上係我地三個傾緊偈，但實際上我只係間唔中搭兩句，主要都係佢地傾，費時阻住佢地。

阿豪送到巴士站就走咗，因為架車根本翻唔到佢屋企，車廂中又淨番我同佢..

「呃..啲風景又幾靚呀可。」做咩嘢啊費子楓，你喺到講乜嘢？



但係我一時之間真係有啲語塞，一陣寂靜嘅氛圍籠罩住成個巴士上層。

「係呀..我都好少有留意。」又係一輪嘅沉默。唉屌，真係好尷尬。

「呃..你覺得阿豪點？」今次竟然係佢問我。

「佢梗係好仔啦，我識咗佢咁耐都仲咁friend。係可能有時講嘢串咗啲，但係佢冇惡意嘅，志在搞下氣氛姐。佢仲好細心..」一講起阿豪，我就變得滔滔不絕，雖然係想幫佢喺小霖面前加下分。

「噗哧，你好似sell貨品咁。」佢都忍唔住笑咗出黎。

「話時話你做咩咁問？」

「冇呀..問下之麻。」佢扮到好漫不經意。



「你終於發現佢好呢。」

「嗯..或者啦，咁佢又係幾細心嘅。」無論佢而加個心係點諗都好，有咁嘅答案都算係個好嘅開始。

「到啦，落車啦，暑假得閒就一齊去玩下。」我同佢講。

「仲掛住玩，唔洗溫書啊！話你聽我實會睇實你架！」

「嘩！咁我點敢唔溫呀！」

「你知就好。」

分別之後，我望住個天，今日天氣好好，可能係我心情好，因為我又有番個好朋友，一個好知己。