我只不過喺自修室溫書，點知比我遇番佢。: <三十五>初次約會
「嗶嗶嗶…」我打開眼，望下個鬧鐘，都係10點鐘姐，可以瞓多陣。
.
.
10點鐘？！死啦死啦，我尋日唔係較9點半起身架咩。
得番15分鐘，我要刷牙、洗頭、吹頭、jel頭、換衫，仲要食早餐添，點算！
「隨時愛相見 便見面 未怕疏遠了十萬年..」邊個咁唔識做而加打黎？！
我隨手拎起個電話就聽：「喂，邊位？」
「係我呀..你啱啱起身呀？」
「梗係唔係啦，哈哈，起咗好耐lu。」我點敢話係。
「係呀，咁好啦，3個字之後樓下見啦。」
收線之後，我刷牙同洗頭都一次過搞，之後即刻吹好個頭就求其蠟咗兩嘢，之後就換衫。早餐呢啲嘢，let it go 啦。
最後都用咗15分鐘先可以著鞋出門口，出門口之前又搵極都搵唔到銀包，真係濕滯。
計埋等lift、落樓，我足足遲咗10分鐘。
10分鐘，足以令世界毀滅，如果你約果個仲係恐怖至極嘅女人。
「對..對唔住呀，我..遲咗。」我落到去即刻補鑊。
只見佢依然笑容滿面咁望住我，之後講：「唔緊要啦！」
喂巴大人你唔好嚇我呀大佬，我知咩叫笑裏藏刀架！
只要佢將放喺後面嘅手遞起，果然冇錯！佢嬲啦 ！
我即刻用對手擋住，仲嗌咗聲：「唔好呀！」
隔咗一陣..「咦，冇動靜嘅？」
「做咩姐你，發燒呀？」只見佢拎住個麥當勞袋，好疑惑咁望住我。
「下，我遲到喎，你唔嬲咩？」
「唔嬲呀。」
「我遲到喎！」
「都話唔嬲！」oh jesus！皇恩大赦呀！
「頭先聽你把聲都聽得出你啱啱起身啦，仲扮嘢，不過起咗身都唔怕啦。」
「睇你都未食嘢咪去買埋個麥記俾你，嘻嘻。」
「oh，我女朋友真係善解人意，冰雪聰明，人見人愛呀！」
「我人人愛你係咪要驚？食啦，凍曬啦！」
我一路咬住呢個充滿愛嘅魚柳包，一路拖住佢隻手，前往我地第一個目的地。
去到地鐵站，當我諗住行去調景嶺線再落港島線果陣，佢卻拉咗我行去油麻地線果邊。
「做咩行呢邊呀？」我問佢。
「唔好問啦，跟住我行啦，嘻。」咁我之前嘅計劃咪全部白費曬？！
我地搭到去深水埗站，佢唔係想帶我行黃金呀..？
好彩係去咗西九。
「做咩黎呢到嘅？」
「今日溜冰抵呀！$65就可以溜全日！」
「做足功課喎你。」西九溜冰最正就係呢個位，所以我同阿言佢地周不時就黎呢到溜。
雖然個商場比我嘅感覺係非常唔自在。相信有行過西九嘅都同意…
當我著好對鞋果陣，佢仲未搞點，仲搞到左手綁右手咁，見到都好笑。
「我幫你啦！」見佢咁「呢hea」我忍唔住出手相助。
「唔該。」只見佢好似好唔好意思咁。
「你未溜過冰架？」我問佢。
「係呀...」
「咁你又帶我黎？」
「就係未溜過先想試下嘛。」
「你唔怕我都唔識咩？」
「怕咩喎，我男朋友咁叻！」咁你又啱喎！
「搞點，行啦。」我拖住佢隻手，慢慢行出冰場，費事佢一陣失平衡。
每一個第一次踏出冰場嘅人都一樣唔敢行出去，小涼都唔例外。佢喺個欄杆邊糾纏咗好耐都唔敢行出去溜。咁我唯有陪佢一步一步咁慢慢「行」。
或者你地覺得，咁麻煩架佢，唔識就唔好溜啦。
但係唔溜又點會識呢？雖然咁樣慢慢行好似好無聊咁，但係我覺得好過癮，見住佢驚驚青青個樣都值回票價。
「唔怕啦，試下出黎啦，有我拖住你唔怕跌。」我伸隻手出黎。
「好似寫八字咁跣下跣下就會攞到平衡，就算跌都唔怕架，跌跌下就唔驚架啦。」我一邊教佢，佢就一直扯住我衫袖慢慢咁溜下溜下。
見到佢個樣咁好笑，我都忍唔住用部電話影低佢個樣。
「喂呀，好樣衰呀，del咗佢啦！」
「咁珍貴梗係唔del啦！」講完我就再溜出去少少，俾佢自己試下溜唔溜到過黎。
「喂，翻黎啦！」佢顯得好驚惶失措咁。但係無計可施之下，佢都選擇試下溜。
當佢差唔多溜到過黎果陣，後面有條仆街突然好快咁喺佢身後溜過，佢一時驚一驚，仆咗落我到。
你地放心，我冇咁虧撞一撞就跌。
我即刻上前扶住佢，佢穩定咗之後即刻係咁拍我膊頭。
「死人頭死人頭死人頭，又dum低我！」
「咁溜冰梗係要識溜先好玩啦，成日扶住欄杆不如落樓下行石春徑。你睇你咪溜到過黎。」我講。
「咦，又好似係喎，溜到過黎又好似冇咁驚。」
「我地再兜多幾個圈睇下點啦，拖實我啦。」
「你唔好再dum低我呀！」
溜冰，講穿咗就係一樣講求信心嘅運動，小涼慢慢建立咗信心，就愈溜愈好，我地嘅關係亦都好似隨住信心嘅建立而變得更加穩定。
「之後去邊呀巴渣妹？」玩到咁上下我地都有啲攰。
「嘻嘻..玩具街！」下？
沿途見到好多小食，即使只係普通嘅魚蛋、三寶果類小食，佢見到都好興奮。
「你洗唔洗咁開心呀？周街都有啦。」
「平時爹哋媽咪唔俾我食架，佢話啲嘢污糟。」
「佢地都講得啱呀，食親呢啲好易肚痛，唔好食咁多啦..」一講完，我就食埋佢最後果粒魚蛋。
「費子楓你個死人頭，食埋我粒魚蛋！」我地就喺條街咁追黎跑去。
「啦，俾你食埋啦。」我將咬淨果半粒，用啲牙頂住。
「唔要啦，咁鬼核突。」
去到玩具街，佢就將佢最潛藏嘅童真一下就射曬出黎。
唔好問會唔會用湧出黎恰當啲。唔會，一定要用個射字先形容倒佢嘅狀態。
「阿楓你快啲過黎睇下，係雛田同鳴門嘅figure！」
「你又有睇架咩？」
「有呀，細細個已經追架啦！希望雛田同鳴門最後可以一齊啦。」你放心啦，最後佢地可以一齊，鳴門做咗火影，佢地生咗一仔一女，好幸福。
當然呢啲果陣都未知，我諗岸本都未諗好。
「你鐘意呀？買啦。」
「唔買啦，咁細隻都咁貴，唔抵買。」
再行多陣，今次輪到我大嗌：「嘩！係櫻木花道！好得意呀！」我見到個櫻木花道嘅咕塾。
「搞錯呀，明明係良田型好多。」佢搭訕。
「嘩屌，你又有睇？」
「有呀，神作點可以唔睇。」原來我眼前嘅女生係個動漫迷。
.
.
.
咁就好啦！啱曬channel呀！掂！
之後我地就繼續行，去搵番果種我地細個睇卡通嘅回憶。
我地會企埋啲細路旁邊睇佢地玩爆旋陀螺，佢見到啲女戰士嘅figure又會變得好興奮。
我地又會扮唔同卡通人物，講番佢地一啲好熟口熟面嘅對白。
雖然我地咁樣完全唔似情侶會做嘅事，但係who
ing cares？！至少我地快樂。從來冇人同我去搵番呢種回憶，今日可以搵番呢種味道，都係全靠佢咁童心未泯。「我去一去廁所先！你留喺呢間鋪等我，記得唔好走開。」我同佢講。
之後我就去番頭先果間鋪頭，買咗兩個咕塾，一個係櫻木，一個係赤木晴子。
「得啦，行啦！」我番去搵小涼，但係佢就唔見咗...
「小涼！小涼！」搵唔到。
電話，打唔到。
我係咁嗌佢都搵唔到佢，突然閃過佢會出意外嘅念頭，於是就更加落力搵，我唔想第一次約會就變最後一次。
搵搵下我都跑到都冇咩方向，唔經唔覺跑番出頭先分別果間鋪頭，先見到佢企喺果到等我。
佢望到我之後，笑住咁同我揮揮手。
「你去咗邊呀？去廁所去咁耐，仲成身汗嘅？」
我二話不說就攬住咗佢。
「你去咗邊就真呀！我叫你企喺到等我，點解會唔見咗人架？」見到佢冇事，我雖然都放心啲，但係心有餘悸。
「我去咗聽電話炸，呢到又收得唔清楚，一聽完我就即刻企翻喺到啦傻佬。」
「我好驚，我真係好驚，我好怕你會好似天蕊咁，咩都冇講就無聲無息咁離開我！」
「唔會啦傻佬，我唔會離開你架啦...你放手先啦，整到我就黎窒息啦。」
「噢，唔好意思。」我即刻放手。
佢拎咗張紙巾出黎，幫我抹走啲汗，之後問：「你去咗買嘢呀？」
「係呀，去買咕塾。」
「買咕塾咪買咕塾，點解要話去廁所？」
「驚你跟埋黎呀嘛，咁咪比唔到驚喜你囉。」之後我就拎曬兩個咕塾出黎。
「一個櫻木我嘅，另一個..晴子...就係你嘅。」
只見佢笑得甜絲絲，又含羞答答咁，好不迷人。
「多謝你，傻佬！」
「就係咁炸？」
「唔係仲想點呀！不過..我好鐘意個咕塾！我地拎住佢黎影幅相呀！」
「唰」一聲，就記錄咗我同佢第一次嘅合照，第一次嘅約會，同埋第一份禮物。
「肚餓啦，食嘢啦去！」搞搞下都成7點幾，我個肚都餓到打曬鼓。
「好啊，我都好肚餓！」幾驚佢唔餓啊。
「難得你請我仲唔食到你出血，哈哈！」
「手下留情啊，我冇幾多錢喺身。」
「睇下點，呵呵。」佢露出好邪惡嘅笑容，我靜靜雞睇下個銀包，睇下夠唔夠俾佢大屠殺。
「到啦，去攞位先！」
天啊！係譚仔啊！！佢竟然肯黎食譚仔！！
咁我就唔驚啦，就算食到唔想食都唔會搞到我破產。
「下，你所謂食到我出血就係食譚仔啊？」我雖然鬆一口氣，但都係要扮下嘢的。
「係啊，你唔想咩？我冇幾可食架炸。」
「想，梗係想，我好鐘意食添！」呢個女仔真係碩果僅存嘅極品。
入到去之後我地就開始嗌嘢食。
食開譚仔都知，基本上入到去都唔洗點睇牌就可以即刻嗌，多數都唔會點轉。
但係佢又左睇右睇，上睇下睇先揀到想食嘅餸。睇黎佢真係好少食。
佢仲唔識死咁嗌咗個小辣，對於一個唔太常食譚仔嘅人黎講，小辣都已經唔簡單。
雖然小辣對我黎講綽綽有餘，但係我都只係嗌咗5小，因為我唔想俾啲刺激感影響碗麵嘅品質。
譚仔，是用來享受的。
「你食到架啦，嗌小辣？」
「小辣咪即係最小嘅辣囉唔係咩？」what the..佢肯定冇睇辣度分佈。
到碗麵黎咗之後，當我仲好期待咁望住佢黎近辣到飛起果陣，佢竟然若無其事咁「骨」一聲吞咗落肚。
「好好味呀，好耐冇食過呢種味！」
「下。。唔辣咩？」
「唔會啊，好好食！」
「好食就得啦。」我見到碗湯都有啲汗顏。
最後我地仲嗌多咗個白肉同大土匪，埋單都係百幾蚊姐，輕鬆！
食完嘢之後我地都攰，所以就翻屋企啦。
作為一個有風度嘅男士，我當然盡我嘅職責送咗女士翻屋企先啦。
沿途我都拖實佢隻手，好好享受下呢段短短路程，靜得黎又冇乜人嘅甜蜜時光。
「好鐘意個咕塾咩？係咁攬住。」我問佢，因為佢攬得仲實過拖住我咁。
「超鐘意呀！係你送嘅，而且呢個咕塾咁有意義。」大概係紀念住我地第一次出街嘅載體。
「個咕塾係用黎俾你掛住我果陣用嘅，我而家成個人棟喺你面前，你唔洗攬得仲實過拖住我啊？」我苦笑道。
「咩呀，你呷醋啊？呵呵，有人呷個公仔醋。」
「車，邊有姐。」
講講下，話咁快已經去到佢屋企樓下，到果陣我地先好唔捨得咁放開對方隻手。
「唔洗咁唔捨得啊？我地下次再去第二到玩。」我講。
「今日好多謝你啊，我真係玩得好開心。」佢輕輕咁點頭，盡顯淑女嘅禮儀。
「你咁優雅我唔慣架喎，不過我都好開心。」
「你個死人..呃係喎，拎住啊。」佢喺褲袋拎咗啲錢出黎。
「無謂要你請我啦，百幾蚊咁貴，一人一半啦。」
「做咩啊，咪講好咗我輸咗我請。」
「唔洗呃我啦，其實你高分過我嘅係咪？」
「咁你都知...」
「你呃我唔到嘅，我知你想氹我開心先講大話姐，其實邊個請有咩所謂姐，只要係同你食我已經好開心架啦。」
「傻妹！」我摸一摸佢個頭，其實我都幾感動。
「同你講個秘密啊..」佢哄個頭埋黎，又係果種香味。
「啜」嘅一聲，我都未黎得切反應，就俾佢錫咗一啖。
OMG！！我就黎暈啦，甜死人，果然最美麗嘅事都係夜晚發生。
「拜拜死人頭！」之後佢就跑走咗，臨入大堂前都同我講咗聲再見。
我一路行番屋企，就一路回味緊頭先果0.03秒之間發生嘅事，雖短暫，但深刻。
再諗番起今日嘅約會，當其他同齡嘅女仔已經主力穿梭各大商場，又或者信埋啲雜誌寫嘅嘢，去埋啲九唔搭八嘅地方影相、打卡。
小涼就反樸歸真，同我溜冰、行玩具街同食譚仔。
其他女仔知道你有睇動漫都標籤你係條死毒撚，而佢就竟然肯同你一齊傾劇情。
佢會為咗你送俾佢嘅一個咕塾而興奮成日。
佢仲俾番飯錢我，所以我今日用用埋埋都唔洗200蚊。
有個咁好嘅女朋友，真係夫復何求啊！！