我只不過喺自修室溫書，點知比我遇番佢。: <二十九>驚心動魄

「喂，死人頭做緊咩？」
 
「準備瞓陣教囉。」
 
「唔準瞓呀！起身！」
 
「點解呀！？考完都冇得瞓！」
 
「我未呀麻！陪我溫書！」呢個人真係呢..
 


「你要我戇居居坐喺自修室等你問我問題呀..？」
 
「唔係點呀！」
 
「你上黎我屋企啦，我屋企冇人。」
 
「下..得咩？」佢好似有啲遲疑。
 
「咁算啦我瞓教。」逗逗佢先。
 


「你試下..好啦我上黎啦。」得逞了，嘻嘻。
 
收線之後我好快就瞓著咗，冇幾耐之後就聽到門鐘響，嘩屌有冇咁快。
 
「外賣到！」
 
「咁鬼快嘅你，仲得閒買M記？」
 
「我打俾你果陣已經喺麥當勞啦，魚柳包餐啱唔啱？」佢單一單眼，嘩！迷死人啦！！
 


「啱呀啱呀！入黎啦。」我地掛住傾都唔記得俾佢入黎添。
 
「打攪曬..嘩你間屋都幾大架喎。」
 
「係咩，差唔多啦，食咗嘢先啦，薯條凍就唔好食。」
 
「好..等陣，鹽同黑椒呀。」唉頂，佢真係好了解我，知我食親薯條都要落鹽同黑椒。
 
「嗯~ 正到呢。」食咗第一條薯條之後忍唔住嗌出殷。
 
「有冇咁好食呀？」佢問。
 
「啦，你試下啦。」我拎咗條去餵佢。
 
無意間嘅一個動作，令佢呆咗一呆，臉頰又開始泛起微紅，其實我都有啲緊張。


 
佢一啖就食咗，仲咬到我隻手指。
 
「嘩屌，你個口有冇咁大！」
 
「咩呀，唔小心之麻！」佢嘟起個嘴講。
 
我冇理到佢，繼續享受我個餐。
 
佢都開始拎啲書出黎溫，佢有佢溫，我有我食。
 
「阿楓，呢題點做呀？」
 
我望一望，係exchange rate嘅問題。
 


「日本經濟差咗，咁相對…..所以import會少咗。」
 
「噢….係喎！果然係勁！」佢舉起隻手指公贊我，令我不禁有啲飄飄然。
 
我處理完個餐之後，就開始打機。佢一有嘢就問我，我再答佢，就咁過咗一個下就。
 
突然「唰」嘅一聲，響徹成間屋。
 
蛤?!?!

「點…點算呀？」小涼心急如焚，好驚咁係咁搖我隻手。
 
「匿…匿入被竇先！」之後我地即刻跳咗入被竇，我再扮瞓教。
 
喺被竇入面，我地近到攬住咁制，彼此都聽到大家嘅呼吸聲。


 
我好清晰咁聞倒小涼嘅體香，都真係好香下。
 
「砰、砰、砰」
 
我第一次體驗窒息嘅感覺，原來心跳快到一個位就會好似停咗咁。
 
「你熱唔熱呀？」我好細聲好細聲咁問。
 
「熱都冇辦法啦。」
 
「你等多陣。」我好快咁落床拎咗個風扇仔再拋入被竇，當係俾佢吹涼，其實最主要係我成個人都想降降溫。
 
呢個時候我阿媽都入咗黎，見我喺到瞓緊教就好快出番去。
 


聽到佢去廁所嘅聲，我地即刻衝出去房。
 
「喂喂喂..我啲notes！」
 
「得得得，你喺樓下等我一陣先拎番俾你。」然後佢就一支箭咁衝咗出去。果然係運動健將。
 
一路執住佢嘅Notes，就諗番起頭先嘅情景，真係令我著曬電，好耐冇試過呢種咁震撼嘅觸電感覺。我諗我真係深深咁鐘意咗佢。
 
「喇，你啲Notes啊！」
 
「唔該曬…」可能頭先太驚心動魄，佢都未回過神，都仲係面紅紅。
 
「唉，仲有好多未溫。」佢喺到呻。
 
「哼，始終都係要我天才楓出馬，去會所等我啦，我地去休息區溫，咁我可以做下其他嘢。」
 
「一早咁樣咪好囉！！」佢喺咁扑我個頭。
 
「頭先攰呀麻哈哈！」
 
「死人頭！哼。」佢轉身就走。
 
「咁你溫唔溫呀？」我嗌停佢。
 
「十分鐘唔見人你就知死！」死啦，我好似迷上佢嘅巴渣，呢啲係咪斯德哥爾摩症後群...
 
我上番樓果陣阿媽坐咗喺梳化睇雜誌。
 
「去邊呀，唔係瞓緊覺架咩？」
 
「下..errr…」
 
「你估我盲架咩衰仔，大大對鞋放喺廳。」
 
「下次帶咗人番屋企唔怕我喺到喎，呵呵，橫掂我同小霖咁熟。」原來佢以為係小霖...
 
「媽呀，我同小霖冇嘢架。」
 
「冇嘢你又帶人番屋企仲咁鬼祟？」
 
「果個都唔係小..」oh shit！
 
「咩話？唔係小霖？！」
 
唉，既然廢紙包唔住火，唯有從實招來。
 
「唉仔，乜你亂曬大籠架！一腳踏兩船都有嘅。」
 
「我都話同小霖冇嘢嚕！」
 
「我唔理你啦，你自己搞掂去啦，呵呵！」超，食花生。
 
Fuck ！10分鐘就到！之後我就啦啦臨狗衝落去搵佢。
 
「好..好..彩趕得切！」我跑到落去，氣都喘曬。
 
「做咩喘曬氣呀你？」
 
「係你話..話要10分鐘內到嘛。」
 
「我講下之嘛傻佬，遲咗真係殺咗你咩，哈哈！」
 
「嘩屌..你早響呀大佬。」
 
「飲啖水先啦！」佢遞咗佢個水樽俾我….飲佢口水尾呀？
 
「做咩呀？」佢眼仔碌碌咁望住我。
 
「冇..冇嘢。」
 
可能我緊張過頭，飲得太急所以濁親。
 
「咳..咳！」
 
「唉白痴仔，飲咁急做咩姐！」佢一路拍我背脊。
 
果一刻，唔知點解我突然捉住咗佢隻手..