我只不過喺自修室溫書，點知比我遇番佢。: <三十>突破

「唔好再拍啦，再拍就死架啦。」我逐隻字「鄧」出黎。
 
「妖！又玩我！！」佢即時縮開隻手，起勢咁打我。
 
「你點可以亂咁捉住人隻手..」
 
我用雙手夾住佢雙頰，我地四目對望，
 
「總有一日，我一定可以光明正大拖住你對手。」
 


嘩屌，自己講出黎都覺得骨痺。
 
「邊個俾你拖呀！死人頭！我溫書啦！」佢一講就一路喺到忍笑。
.
.
我比較早考完試，所以可以休息幾日，然之後到咗今日先派卷。
 
一早番到學校，佢地就已經講緊啲派卷嘅嘢。
 
「死啦，份通識實炒到仆街！」阿星一黎就講。


 
「聽日先有通識堂喎，你咪有排驚。」阿月講。
 
「放鬆啲啦你。」小霖喺我側邊講。
 
「我邊有緊張姐。」
 
「仲話冇，眉頭皺得咁緊。」我其實真係好驚份數。
 
我今日成個人都恍恍惚惚咁，首先就派咗幾樣英文卷，一如以往，閱讀卷70分左右，不過不失。


 
之後仲有中文卷，閱讀卷始終都係肥咗，不過冇所謂呀，高中啲文10個有8個都炒架啦！寫作反而令我有啲意外，竟然有72分，都算叫幾高分。
 
.
.
「Good afternoon class!」
「Good morning Mr Kwok！」輪到數學了..
 
「唔知大家係咪比上次個測驗嚇親，所以肯比心機溫下書，今次都算係有進步！」
 
「Yeahh!!」全班叫囂。
 
「不過，可能大家對MC操練比較少，所以做得比較差，不過唔緊要，仲有時間準備！」
 
「快啲派卷啦好嗎，我就黎煎熬死啦。」我心諗。


 
「好，而家講下全班最高分果4個先啦！」
 
「聽到名就出黎拎番份卷啦！」
 
「第一名係..」
 
「阿sir點解講第一名先嘅？」阿揚問。
 
「第一名仲有第二個架咩！」阿星講。
 
「咪係囉，都係阿言之嘛！」阿王都唔轉彎抹角，直接講。
 
「之後係第4名，汪映霖！」
 


「小霖都係得第4..？」
 
「幾分呀？」我問佢。
 
「82炸。」82...一個好玄嘅概念。
 
「第3名...阿月！84分。」勁喎阿月！
 
「第2名..姚智星！」
 
「下？！」佢自己都唔太相信。
 
「Wowwww ！」成班都好驚訝，估唔到佢唔聲唔聲突然爆上黎，我都嚇咗一跳。
 
「繼續努力，記住你地唔係要高分過佢地，而係要做到自己滿意嘅標準。」阿王呢一句正正諷刺現今嘅教育制度。


 
香港地，考得低分就注定你係失敗，真係殘酷。
 
「不過，有位同學係值得讚賞嘅！費子楓...78分！」
 
「唔係掛？！」唔係講笑，我真係當堂嗌咗出黎。
 
我一路帶住唔敢相信嘅態度出去拎份卷，直至睇到個分真係寫住78分呢個字我先夠膽相信。
 
或者78分唔係一個好高嘅分數，但係對我黎講係一個好大嘅肯定，對我係一個好大嘅鼓舞。
 
今次我最多謝真係小霖，我拎到份卷之後就行咗去佢個位。
 
「恭喜曬呀！你終於做到。」佢好似眼濕濕咁。
 


「係..係，我冇辜負到你嘅付出，真係好多謝你。」
 
「請我食飯呀，當多謝我！」
 
「九大簋都得啦！」
 
我食lunch果陣打俾阿媽同佢講，佢聽完之後都開心死。原來父母唔係要求自己做到好好，而係能夠對自己有交待，佢地就好滿足。
 
放學之後我約咗小涼去KFC食嘢，之後就梗係話個消息俾佢知啦，佢都好戥我開心。
 
「係喎，你都考完最後一科啦喎。」我講。
 
「係呀，唔洗再去自修室嚕。」
  
當佢都唔洗去自修室，就代表我地愈黎愈少機會可以見面。
 
「唔捨得我呀？」我問佢。
 
「你就想呀，不知幾唔想見到你。」佢別過臉。
 
「咁啱啊，我都係。」我就係鐘意鬥下氣。
 
「係啊？咁以後唔好見囉！」死啦死啦，好似真係嬲。
 
「講笑炸，講笑炸，不知幾想日日見到你。」
 
「哼，都唔知邊句真邊句假。」
 
兩個人嘅關係能夠昇華到呢個階段係最美好，既有啲擺脫朋友嘅關係，又冇情人嘅枷鎖，不過有得揀，我都係想佢做我女朋友。
 
「係喎，遲啲我同阿言佢地搵咗日出街，一齊啦。」
 
「會唔會唔係咁好呀？佢地又唔係好熟我咁。」
 
「我就係想俾佢地認識你多啲，同埋我地去唱K呀，啱曬你啦 Neway 十三姐。」
 
「有K唱呀！好呀好呀，我去呀！」

於是佢就應承同我地去，阿月佢地都冇咩問題。
.
. 
呢一刻，我地幾兄弟，喺星矢吧聚集起黎，為咗一件事而聚集..