我只不過喺自修室溫書，點知比我遇番佢。: <二十八>驀然回首
考完份Paper 1，心情史無前例咁輕鬆。今次我終於可以同阿言佢地討論下啲題目。以往我都係喺執邊得個聽。
雖然都係有唔識嘅地方，但係好明顯比過往嘅少好多。
「喲，好有自信喎，唔錯啦呢鋪。」阿星講。
「希望啦，做落都幾順手，應該唔差掛。」
「做埋一陣份MC先講啦。」阿月搭嘴。頂，唔可以俾少少鼓勵架咩？
MC的確係我一個好大嘅障礙，呢份嘢佔又唔係佔得多分，但又係決定分數嘅一個好重要嘅因素，要喺個幾鐘入面答40幾題數，相信過往嘅你地都覺得好撚辛苦。
不過今次唔同嘅係，我有小霖份筆記加持，佢本嘢有好多答MC嘅skills，，雖然短時間內唔可以有好大提升，但係都唔會失分失得太過分。
可惜就係溫果陣冇試過拎卷試做，所以都唔知水平去到邊。
「嘩屌，份MC難到咁嘅？」阿星考完喺到抱怨。
「我空咗成8條呀！」阿豪都唔識咁多?!
「阿晴你覺得點？」阿言問。
「嗯..OK啦，都算做得曬，不過好多唔肯定。」連呢2公婆都年初四咁嘅樣？！
「阿楓你做成點呀？」小霖問我。
「連佢地都咁嘅面口，我仲有咩望呃屌。」
「好多唔識咩？」
「好多都唔肯定呀，最後幾題都冇做。」
「唔緊要啦，已經好好架啦，你唔記得你之前淨係冇做都有廿條咩？」又好似係喎，我記得最差果次啱得11題。
「唔諗啦屌，我地去星矢吧食嘢，一齊？」
「好呀！」
呢次對話令我地好似翻翻去咩都未發生嘅時候，我其實好希望可以繼續係咁。因為佢真係我一個好好好好嘅朋友。
「黎黎黎，食嘢啦！」娜姐端上我地嗌嘅嘢食。
「呢個A餐我嘅。」阿月講。
「B餐呢到！」阿豪講。
「我先係B餐架！」阿星同佢爭。
「咩呀，你嗌C架！」
「你先係嗌C餐！C餐先係你個卡邦尼！」
「屌，係喎。」
見到個個都回復翻之前你鬧下我，我串下你嘅狀態，更令我珍惜同佢地一齊嘅時光，希望唔好再有啲咩嗌霎。
「考完試你地有咩做？」阿星突然問，佢好鐘意做下啲搞手。
「未諗到呀。」阿月講。
「咁啱啦，一於搵一日出黎睇戲唱K食飯直落！」阿星再講。
「贊成！」阿晴好興奮咁講。
「你個傻妹，一聽到有K唱就咁開心。」阿言笑佢。
「阿姐我號稱NEWAY十三姐呀！」我突然諗起小涼就笑咗出黎。
「個廢紙係到笑咩？」個個堆咗個頭埋黎。
「肯定又諗緊個自修室女孩啦。」阿星講。雖然佢都知我地嘅嘢，但係佢畢竟係傻嘅，成日都衝口而出。
「痴線，邊有姐！」我急住澄清，我見到阿豪同小霖佢地都好似尷尷尬尬咁。
「叫埋佢出黎玩啦。」阿星再講。
「睇下佢得唔得閒先啦。」
走果陣，阿星靜靜雞行過黎同我講。
「喇，比曬機會你啦，趁今次機會令佢地對小涼改觀啦。」
「嘩屌，原來你係咁諗架，等我以為你喺到玩尻我。」
「你估我真係傻架咩仆街，哈哈。」今次佢又真係幾醒目。
「好啦，就試下可唔可以令佢地接受小涼啦。」
同佢地食完飯之後番咗屋企，好快就落番自修室溫書。
其實我有諗過瞓陣先落去溫，但係唔想曬咁多時間，所以格硬落去溫。
難得冇人喺我隔離，我開住個Music Player聽住歌溫， 平時小涼唔比我咁做。
我聽住首「情歸於盡」溫，溫溫下竟然瞓著咗，或者係因為老黎把聲太soft，催眠咗我。
結果瞓咗都唔少時間先醒。
「你醒啦？」原來小涼都放學落咗黎。
「嘩，原來我瞓咗咁耐。」
醒咗之後覺得後尾枕有啲嘢咁，所以就拎黎睇。
「你又喺到瞓教！」又係張MEMO紙。
咦，係佢？唔見呢張memo紙都唔記得呢個女仔嘅存在。
我即刻四周圍望下睇下見唔見個女仔。
「你望咩呀？」小涼喺到問。
俾佢知我望女仔仲得了嘅。
「係咪望女仔！」嘩操，你再聰明啲啊笨。
「唔..唔係..點敢點敢。」
我再望下張memo，啲字跡..咁似..
「WTF?!?!」心默念姐，心默念姐，冇嗌出黎嘅。
「原來係你寫俾我嘅...！」
「嘻嘻，你終於都知啦咩？」啊！驀然回首 那人卻在燈火闌珊處。
突然覺得自己好有文彩。
「吓..」
「即係果日嗌醒我嘅都係你？」
「做咩呀？好失望呀？！」
「都幾。」原本以為一個咁浪漫嘅橋段，原來個女主角係巴渣妹，OMFG！？
「都幾咩話？！」
「唔...唔係唔係，我好開心！」佢都經已握實咗對拳頭..
其實我講笑姐，我真係好驚喜果個係佢。原本以為觸不可及嘅人，原來已經係自己身邊咁耐，仲已經同自己經歷過咁多嘢，其實仲更加加深我地嘅緣份，我燒炮仗都黎唔切啦。
「不過點解一直唔見你用呢隻memo紙嘅？」
「隻memo紙係日本限定架，果邊先有得買，尋晚我阿姨先去完日本旅遊番黎，我叫佢幫我買所以咪有囉。」
「唔怪得..如果你唔買我諗成世都唔知係你。」
「咁你而家知啦。」
「咁你明明認得我第二朝仲同我爭的士！」
「呵呵，我特登嘅，見到你激到扎扎跳個樣幾好笑呀。」
「你.....哼」我係咁哧佢條腰，呢個係佢弱點。
「嘩！好痕..哈哈..停手呀！」
「睇你仲敢唔敢玩我！」
「哈哈..咁你平時夠玩得我多。」
「你睇住黎啦巴渣妹！」
「唔好再叫我巴..」
「殊....」我地講得太嘈，搞到對面個阿伯嬲尻。
「哈哈..溫書啦。」我地相視而笑，為咗呢件事而笑，為咗張memo紙而結下嘅緣份而笑。
考埋英文，就得翻兩科elective未考。除咗數學，英文係我比較弱嘅一科，所以只要發揮平平穩穩我都滿足。黎近全力煲盡果2科好過。
「考完主科之後你考咩先呀？」小涼問我。
「經濟先，之後會計囉。」
「你考完之後啲記憶唔好咁快洗曬呀！你要教我！我下個禮拜都開始elective。」
「車，又有人話要同我鬥高分。」
「咩呀，鬥會計之麻，Econ邊夠你黎！」
「都夠做啦，贏硬！」
「哼，牙擦仔！」
或者溫Econ實在太輕鬆，時間好似過得好快咁，話咁快就到考果日。考之前我依然同阿星仲有阿言喺到吹水，直至打鐘先收拾心情。
首先係考MC先，相對數學MC，Econ果啲問得直接好多，大部分都係靠溫熟concept就識做。
其實唔難，輕鬆過關！
然後到長題目，簡直就係我盡情肆虐嘅地方。做果陣我覺得自己好似變咗無雙入面嘅趙雲咁，喺戰場上面一騎當千，殺到對方片甲不留。
考完已經幾乎肯定頭五係我嘅嚢中物。
「考完 ！掂過碌蔗。haha」我考完之後send咗個whatsapp俾小涼。
「威啦威啦！」佢好快就應咗我，佢應該差不多時間考完佢果科。
「你啲中文考成點呀？」佢今日考中文。
「差啲做唔切呀，啲文言文有啲都係撞。」
「唔緊要啦，仲有其他分卷拉下。」中文科就係咁吊詭，考成堆嘢，但係就唔可以根據個分判斷自己嘅整體中文能力。
「希望係咁啦！」
「一齊加油！」佢最後send咗呢句出黎，warm到爆呀！
過多幾日都考埋個accounting，可能真係少咗時間去溫呢科，所以都有啲唔太識或者唔肯定。
Paper 1可能有啲背唔熟所以失分會比較重。好彩Paper 2就算最後條大佬題唔太識都有前面果啲搭夠。
「呼！終於考完個大考啦屌！」考完之後我喺到大嗌。
學張家輝話齋，出黎行唔講番2句粗口邊有氣勢先得架！
「阿..同學，你出一出黎呀！」屌呀，點解個殺人梁...即係個訓導會喺門口經過架！
就係咁我帶住其他同學盡情嘅恥笑，行咗出去。
「哈哈哈，抵死呀！」阿豪又喺到笑我。
「阿..龍同學，請你都出埋黎呀。」唉，小豪豪，都叫你睇下逃學威龍。
就係咁，我地每人俾殺人梁記咗一個缺點。阿豪俾佢告喺班喧嘩。
番到屋企，我終於有時間無所事事咁攤喺張床，突然覺得呢個行為好奢侈。
我就考完試啦，咁就象徵我短期內都唔會再番自修室啦，都真係有啲唔捨得，話曬都喺果到溫咗幾個月書，最重要係俾我識到小涼呃麻，霎時唔洗落去都有啲唔慣。
喺我沉思緊嘅途中，收到小涼嘅電話..