我只不過喺自修室溫書，點知比我遇番佢。: <二十七>眾人皆醒我獨醉

考完通識之後果2日就係考中文。閱讀卷不嬲都係靠下天才波，佢今次出咗3篇文，所以好似有啲做唔曬，有啲失手。

寫作我一向都係揀記敘文作，唔洗撻咁多例子嘛，文筆上我都覺得自己唔錯，今次發揮應該唔錯。

不過考完中文之後，就係同數學嘅搏鬥了..

好彩之後係星期六，所以有2日半溫數。

自從有小霖呢本筆記之後，我晚晚臨瞓之前都會用黎溫數。呢本嘢好似係針對我嘅弱點做出黎，好多題型都係我最唔熟嘅，真係可以令我短時間內了解自己嘅弱點，從而去改善。



呢一刻，我正正坐喺小霖對面，拎住佢本筆記去溫數。

「你本筆記真係好好用，我覺得自己啲數進步咗好多。」我對住佢講。

「有用咪幾好，唔會辜負我心機。」

「你實整咗好耐啦，值得用咁多時間？」我呢一刻唔係想同佢攤牌，只係試探下。

「你考到高分就值得。」佢好似輕輕一推就推走我個試探。



老實講如果冇必要我都冇打算同佢講清楚，我淨係想用一啲暗示去令佢get到我嘅訊息。我以為咁樣係對佢傷害最低嘅方法。

不過，我的以為，只是我以為..

「阿楓，咁早嘅你..咦小霖你都喺到？」隔咗冇耐，小涼都到咗自修室。

「係呀 ！」小霖瞇起個腰果眼對住小涼微笑，呢刻嘅佢真係美若天仙，可惜我唔配得到呢份美。

「你地星期一考數呀？」



「嗯，所以努力衝刺緊。」

「嘩，呢本筆記係小霖你整架？好有心機呀你。」佢見我拎住咗溫就問。自從拎到呢本筆記，我都冇刻意拎去自修室溫，只係黎近考數，先拎落去。

「哦...係呀。我借咗俾阿楓溫，你知佢啲數幾差架啦。」

「哈哈..係呀係呀。」媽的，好尷尬。我唔知點解小霖要講大話，不過既然佢咁講我就配合下。

難得有2個數學高手喺到，我都唔放過呢個機會，將自己唔識嘅嘢一次過問曬佢地。有佢地2個幫手，我肯定我今次啲數可以有個大躍進呀！

然而喺小霖走咗之後...

「本筆記係佢特登整俾你嘅？」小涼問我。

「你點知嘅..」



「頭先你去廁所我拎咗本嘢黎睇下，見到佢寫俾你嘅嘢。」

「我冇心呃你架，我都估唔到佢會話係佢嘅。」

「你係咪有嘢想講？」佢都真係..挑通眼眉。

「原來小霖..佢鐘意我。」

「你終於都發現？」

「係阿月同我講我先知。」原諒我又講多個大話。

「等等..終於？你一早知？」我反問佢。



「嗯，第一次見佢已經feel到，只係一直都冇講。」原來全世界都知，得我一個仲戇居居。

「咁你..諗住點呀？」

「順其自然啦，我都未知點做，唯有繼續扮唔知。」

「做咩呀，驚我俾佢搶走啊？」

「痴線，無人想同佢爭喎。」

「咁就好啦，原來我冇人要嘅，咁我可以去識下女仔啦咁。」

「你試下！」佢好大力咁擰我耳仔。

我捉實佢隻手，再講：「我邊敢呀！嘻嘻！」



「算你啦..」紅蘋果又再出現啦，嗚呀，好迷人呀頂！

「快啲溫啦，唔係就溫唔切啦！」

「知道巴大人！」

「又叫我巴大人！」

究竟我同佢算唔算情侶呢？！唔算。我仲欠佢一個表白，呢一樣一定要補番先得。