我突然間多咗個妹: 可能...或者我...真係想佢做我呀妹

「喂喂喂，呀信，你呢排同Beverly好friend喎，溝人呀?」
「Toby，你小學生嚟架?一齊傾計玩課外活動就係溝人架嗱?長大啦阿亞Jim，世界變咗樣架喇。你去追你個『女神』啦。你真係勁，平時雞啄唔斷嘅你竟然喺同佢坐之後成兩個月都未試過上堂傾計，我真係要寫個服字。」
「頂你吖。係喎，好耐冇一齊食晏，今日O唔O?」
「唔喇，有約。」
「同邊個呀?😏」
「Beverly，」「哦呵呵，溝女!」「妖我都未講完，仲有Priscilla呀，要練舞呀，仲有幾個月就比賽，今年係最後機會，我想同佢哋一齊參賽呀。你知啦，Missy好嚴架，一定要表現好先可以俾你去比賽。」
「少有喎，你咁緊張個比賽嘅?溝女呀?」
「唉...同你講嘢真係嘥口水。」
「講笑咋，加油。」





冇錯，想比賽就要付出，我就打開天才波嘅，唔洗點練，Beverly都唔錯，學過芭蕾舞所以好多動作對佢嚟講都唔難，不過Priscilla就...真係得個殼，有時論盡、動作又唔夠俐落、唔夠力，想參賽真係要特訓先得，如果唔係應承過佢我真係唔會得閒幫佢。不過好坦白講，同佢哋相處、跳舞，呢種感覺真係唔差，仲令我好放鬆。好啦我承認其實係Priscilla嘅笨拙啟動咗我嘅妹控開關。我開始真心想幫佢爭取比賽資格，得到Missy嘅認可。仲有兩個禮拜，應該趕得切做啲成績出嚟俾Missy睇嘅。呢段期間，我哋好似角色交換咁，由Priscilla求我教佢到而家我主動督促佢去練習、矯正佢。喺我嘅英明領導下，終於叫跟得上我同Beverly嘅步伐。
聽日就係公佈比賽名單嘅日子喇，我哋三個當然又要留校練習啦，食飯時間同放學都要捉緊時間練習。Beverly依然保持住水準，所以佢早咗走，留返我同Priscilla喺學校練習。佢將成隻舞連續跳咗幾乎十次，無論動作、連貫性、力度都比一開始好咗好多。雖然整體表現都唔係特別好，但係以進步速度嚟講，佢嘅能力的確好驚人，我覺得佢已經有超水準表現。

練習完之後，已經差唔多八點。「Priscilla，你男朋友呢?你成日練到咁夜我都好似冇見過佢接你放學咁嘅?」
「呀明去咗打波呀，佢痴住個波多過我。」我心諗佢哋真係情侶?「有時我諗，你做我男朋友好似仲好過佢做。呃...你唔好誤會，我只係讚你有承擔，唔係真係想你做我男朋友。」
頂，我仲心動咗下添「我梗係知你講笑啦，點會當真呀...哈哈哈...」
「呀信呀，呢段時間真係好多謝你花咁多時間去幫我練舞呀，多謝你。」呢下真係完全啪中咗我嘅妹控開關，原來呢個人都會有溫柔嘅一刻。我嗰刻真係面紅咗，好彩街燈唔夠光，佢睇唔到。
我哋一路行，佢仲好似喺度練緊隻舞咁，跳下跳下，仲唔覺意跳咗出馬路。「小心呀!」我一路大嗌住一路捉住佢隻手，將佢拉返上行人路，佢差少少就俾車撞到。我仲未驚完，發現Priscilla用力攬住我，我感覺到我件校服好似濕濕哋咁，原來Priscilla喺到喊，佢楚楚可憐嘅樣深深咁烙喺我嘅心上面，亦令我產生咗強大嘅保護欲。我決定咗，要成為佢呀哥，無時無刻保護住佢。雖然呢個時候講呢啲嘢好奇怪，但係我都鼓起咗勇氣:「Priscilla，你做我呀妹吖，我想以後都可以保護你。」由於我俾保護欲同打開咗妹控開關影響咗思緒，我完全冇整理過應該點表達，淨係講咗自己想講嘅嘢，我心諗死得，啱啱我咁樣好似向佢表白咁喎，今次死梗，佢要討厭我喇.......「呀哥...嗚嗚....呀哥我好驚呀!」我冇聽錯呀?佢係咪叫我做呀哥呀?即係我成功咗?我攬住咗佢「呀哥喺度，只係我喺度，我就會永遠保護住你，唔洗驚。」好彩佢亦都冇受傷，安全咁返咗屋企。

(妹傳來信息)




「哥，多謝你!☺☺」
「妹，比賽一齊加油!」