我突然間多咗個妹: 最感動的表白

「妹，呀妹呀，喂?」
「呀信，我諗我琴晚係驚得濟先會咁，你都係叫返我做Priscilla啦。」
「吓...但係...咁你而家...即係當唔當我係呀哥呀?」
「......」

「Toby，我有個秘密想同你講，但係你千祈千祈唔可以同任何人講。」
「我哋兄弟嚟架嘛，你講俾哥哥聽，我保證唔同人講。」
「唉，都係算喇，你實同人講架。」
「喂，你個樣真係好頹喎，發生咩事呀?我發誓真係唔會講出去。」
「真係?咁好啦。係咁嘅......」




「喂呀信你認真架?Priscilla叫你呀哥?你呢排係咪練舞練到攰得濟，發夢發上腦當真咋?人哋有個男朋友好哋哋做咩無端端要整多個呀哥出嚟啫?」
「妖係真架，你做咩唔信我啫?」
「信就真係唔係好信架嘞。你好自為之啦。」
我深信我一定可以俾Priscilla睇到，我絕對有能力成為佢呀哥，甚至做得比佢男朋友更加好，更加體貼。

今日要公佈比賽名單喇，所以我，Priscilla同Beverly亦都好自然喺食飯時間練習啦。
「Priscilla，你到底當唔當我係呀哥呀?點解你而家反而對我好似仲冷淡咗咁嘅?
「我唔知呀，你唔好係咁問得唔得呀?我做唔做你嘅妹真係咁重要咩?」
喺呢一刻，我答唔出，因為我唔知我想佢做我嘅妹係出於咩原因。到底我係真係想為佢好，想保護佢定係我只係想滿足自己一直以嚟嘅幻想呢?
「Vincent，你哋喺度傾咩呀?鬧交呀?點解好似唔係幾開心咁嘅?」




「冇嘢呀，Priscilla佢有啲地方跳得唔係幾好，我話下佢啫。跳好少少呀，Priscilla。」
「Priscilla，我哋一齊加油吖，一定要三個人一齊出賽呀。」
「哦...嗯，一齊加油...」

「嗱，而家Missy睇你哋跳埋呢次，之後就會同你哋講邊個有得去比賽嘞。」
「Beverly，Priscilla，加油呀!」
「咦?Vincent你唔洗跳咩?」
「係呀，我年年都係咁，Missy一定俾我去參賽架LOL。我都唔知點解。」
「聽住音樂跳喇，預備1,2,3,4......」希望佢哋兩個都有好嘅表現啦。
Beverly狀態好似幾好喎，動作比起平時更加流暢，佢應該冇問題。




點解Priscilla好似跳得冇琴晚咁好架?唔通佢仲因為差啲俾車撞到而仲驚緊?死啦，佢咁樣好難出去比賽架喎，希望Missy會俾個機會佢啦。
「好，而家公佈比賽名單...」
「Vincent，我啱啱跳成點呀?」
「你應該冇咩問題，我見你跳得仲好過平時。」
「真...真係?」
「我比較擔心Priscilla，佢好似心不在焉咁。」
「呀信，Johnny，Icy，Ken，Beverly...」「嗱Beverly，都話你實冇問題架啦!」「嗯!!」「Nathan，最後一個，Priscilla。」「嘩!Priscilla，好耶呀，我哋三個可以...」「唔好意思，啱啱睇錯咗，最後一個係Phoebe先啱。」咩話?點會咁架...唔得架，我唔可以俾Priscilla呢個月嘅努力白費架，我一定要保護佢，要做一個佢認可嘅呀哥。
「Missy，我認為Priscilla嘅表現絕對可以代表大家出賽。」
「呀信，我知你係有天份，但係唔可以因為佢係你朋友而包庇佢架嘛。況且你睇下佢啱啱嘅表現，動作又唔俐落又唔流暢。」
「Priscilla嘅表現絕對唔係你睇到嘅咁簡單，佢為咗呢個比賽，呢個月幾乎每一日都留喺學校練到俾校工趕走，佢由...」Priscilla捉住咗我件衫，「算啦呀信，我都知我表現唔達標架喇，我預咗冇得出賽。」你估我唔知你心入面點諗咩，你睇下你個樣，就嚟喊咁喇，我唔忍心，我一定要幫你達成心願。「呀信，你而家講咩都得架啦。」「Missy，呢個月，我每日都睇住佢練習，由簡單嘅一個wave都做唔到嘅佢，去到可以自己一個跳得晒成隻舞，我認為佢喺未來呢兩個月嘅練習裏面，有能力跟得上我哋嘅節奏，我用主席呢個位擔保，就算Priscilla加入，我哋都可以拎到優等獎。如果我唔可以同佢一齊比賽，咁我寧願講個位出嚟俾其他人跳。」「呀信，你講真架?好，既然你落嘅賭注咁大，我相信你唔會貿貿然冒咁大嘅風險，反正你哋最後一年，我就信你一次，破例俾Priscilla加入比賽組。」得咗喇，終於可以三個人一齊比賽喇。「多謝Missy!!!」「今日時間差唔多喇，大家執齊嘢可以離開。」
咪住，我啱啱係咪癲咗呀?媽，好柒呀!!!!!我真係好想搵窿捐，匿埋一二邊等人走晒先。
「呀哥，哥!!!」
「Pri...Priscilla?你做咩攬住我呀?Beverly望住架喂!」
「叫我呀妹!」
「你終於肯俾我做你呀哥嗱?」




「哈哈，你哋真係好似兄妹呀。」
Priscilla仲係攬實我唔放，好似又想喊咁，我摸下佢個頭，同Beverly講:「或者啦。」
總之，我哋三個真係可以一齊比賽喇，真係發夢都估唔到。