我突然間多咗個妹: 新成員加入

開學接近一個月，當然上堂就緊係用嚟傾計架啦，我同Beverly日日相處，有時Priscilla會擰轉頭撘下嗲咁，感情越嚟越好，話題亦都越嚟越多。有次Beverly問我嚟緊會參加咩課外活動，Priscilla即刻轉身射個三分波:「hip hop!一定係hip hop，唔好唔記得你應承過我啲咩呀。」
「得喇，我記得呀，你唔好日日都係咁講好冇呀?煩死人喇!」
「我等你冇藉口唔揀hip hop咋!」
「白痴!你有冇要求過我都會揀hip hop，唔關你事😜」
呢個時候Beverly笑住講咗句:「你兩個好似兄妹呀!哈哈!」
「一啲都唔似!」我同Priscilla同時咁講。
「仲話唔似，你哋連講嘢都咁似。」
「......」
其實我以往會揀hip hop都係因為諗唔到揀咩課外活動，今年唔多唔少都係因為Priscilla我先會揀hip hop。不過費事佢知道我為咗佢而揀hip hop佢會得戚，所以我唔諗住同佢講。





自從嗰次之後，Priscilla就好少喺我同Beverly傾計嗰陣撘嗲，神神秘秘咁。其實佢唔講嘢嗰陣，妹屬性真係好高，就咁望住佢我都差啲俾佢攻陷，我開始將佢想像成我個妹咁看待。(只限佢唔講嘢嘅時候)

終於嚟到今個學年第一堂hip hop班，喺介紹新成員之前，要先選咗今學年嘅主席。做主席我諗都冇諗過，辛苦之餘乜都要一腳踢，仲要負起成個團隊嘅責任，百害而無一利。我只係想有個傻仔自動彈出嚟做咗個主席佢然後睇下有咩人加入咋。「Missy,」當我以為有人肯出嚟做主席嘅時候，晴天霹靂，「我覺得呀信好適合做主席呀，跳舞叻就不在話下啦，又係我哋嘅靈魂人物，所以我覺得主席對佢嚟講當之無愧。」我又唔知笑定喊好，呢條友一定係Priscilla啦，Priscilla你係咪想玩死我呀。「大家有冇異議呀，冇嘅話今年就由呀信做我哋嘅主席啦。」Missy你唔洗問下我點諗架咩=.=「Missy，我...」「俾心機呀呀信，我哋睇好你架。」我未講完架......Priscilla你唔好笑呀，一陣放學我就打你。我已經燥到冇乜心情知有咩新成員。
「今日冇乜時間喇，我哋今年都有幾多新同學喎，有請佢哋介紹下自己先啦。」「...............」
「我...我叫張...張天里，大家可以叫我做Beverly。」
「吓!!!!!!!!!!!!」我以為自己燥到幻聽，呢下叫聲大到嚇親全部人。Beverly望住我，佢嘅眼神好似同緊我講，乜佢個名真係咁誇張咩，點解次次聽到都咁驚訝。
佢介紹完自己之後，叫咗埋嚟我隔離講:「我哋一齊加油吖，Vincent。」然後對住我笑，呢下甜笑靚過Priscilla之前所有嘅笑容，我好似見到天使咁呀。
就係咁，我嘅不平凡校園生活喺度揭開咗序幕。