《三角•誌》: 5.1 藍剔

自個次同呀嫂食飯，我就再搵唔到將軍。望住whatsapp一個又一個藍剔，我覺得事情唔簡單。因為，將軍唔似係會已讀不回嘅人。突然，有電話打嚟，螢幕顯示嘅係一串陌生嘅電話號碼，我毫不猶豫咁掛斷，呢排實在太多入境處電話打俾我。睇嚟，咁聽話登記做選民係有害無益。

又一個電話打嚟，又係頭先個串陌生號碼，已經第五次，我估入境處應該冇咁好恆心打完又打。

「喂？請問搵邊位？」
「係我呀！將軍呀！仆你個街係咁cut我線！」
「點知係你呀大佬！呢掛好多入境處打嚟嘛！呢個咩電話嚟嫁？」
「我老婆唔俾我搵你呀！我而家偷偷落街用電話亭打俾你炸。」
「唔怪得呢排你都已讀不回我啦，肯定係你老婆幫你睇晒啲msg。」
「唔講呢啲住啦，今次出事啦，今晚七點老地方等。」





准時七點鐘，我企係中環大排檔橋底度等個位廿一世紀都冇電話用嘅傻仔。等咗五個字仲字見人，又打唔到俾佢，唯有企定定等。