《三角•誌》: 4.0 人情

(4)
望住Ashley個肚，我肯定個肚唔只三四個月，我打賭應該差唔多生得。

「你就係阿郎呀？Nice to 搣 you arh！我成日聽BB佢提起你呢位Best Friend gar! 我叫Ashhhley arh。」
「你好，Ashley。」聽著Ashley嘅shiga accent，唔講我以為自己落咗老蘭。
「阿郎呀，BB話要親自同你傾傾結婚個日點搞喎，老婆你講啦。」
「嗱！照計我生完仔呢，出年三月就行禮擺酒啦。我就特登早成年book定paris個好famous嘅bakery幫我整wedding cake啦。總有，我請咗全港最top嘅wedding planner幫我搞今次⋯⋯」bla bla bla，聽著Ashley講佢仲有成年幾先到嘅宏大婚禮安排，我心諗都安排好晒仲有咩要同我傾？
「阿郎呀，我呢準備咁半圍俾你family嫁啦，話晒this is the first time you become a bestman，你屋企人都想睇下你嘅。」？？？闔府統請都唔洗半圍呀嘛？呢條女咩事？
「呀！仲有呀，呀郎你同BB係best friend，咁照返我個Price list，你份人情就係one thousand five hundred，記得你family到唔到都要個個俾喎！我估你屋企都冇kids嫁啦！咁記得拎六份嚟啦。益咗你嫁啦，七個人嚟飲飲食食，仲要係hotel，抵晒啦！」





Well，呢啲係米經典港女格？幾時闔府統請要規定負責半圍？老友呀老友，你老婆咁嘅格你點頂到？

將軍見我西臉到西過佢老婆個西，就諗住打圓場。
「BB，食蝦餃先啦。阿郎同我咁熟，唔洗計得咁清楚啦。」

Ashley即時西晒面，撓起對手。

「嗱！我就明碼實價嘅。嚟得飲，仲要係酒店，收你友情價千五蚊好抵啦。」wow，公廁都知自己明碼實價，唔知佢房門口係米掛咗個價錢牌？當然，要俾面老友，我又點會唔識做。我即時虛偽咁假笑。
「得嘅得嘅，呀嫂我識做嫁啦！」
「你唔好諗住俾少呀，有個姊妹問俾$500都得唔得，得即時踢咗佢出姊妹whatsapp group，咁cheap嘅我先唔收佢嘅人情。」





將軍，希望到出年結婚個日你仲未陣亡。唉！