《三角•誌》: 3.2 不醉

「BB，我好唔開心呀！」Ashley面紅紅咁撲向將軍。
「Ashley，你咁大陣酒氣嘅？做咩飲到咁醉？」

當將軍講到呢度，見到佢到今時今日仲回味緊佢位娘娘當晚面紅紅咁嘅樣，我就諗將軍應該仲未知道佢位娘娘老蘭出名千杯不醉。話說有一晚，我同friend落咗老蘭獵女，見到我個位身穿名牌西裝校草級嘅friend，一個二個西痕嘅港女二話不說痴埋身，我呢啲咁嘅保險佬，一睇身上套西裝就知，貴極米又係豬二千。千幾二千蚊套西裝，我已經覺得豬二千好名牌，可惜班老練港女一睇就知唔係我個friend個啲度身訂造名牌衫。就係我一支公繼續覓食個時，就見到只聞其相不聞其真身嘅Ashley。

「喂！個邊搞咩呀？條女俾班仔圍住隊酒嘅？」我行去吧台度坐，問我個位搖著酒嘅bartender嘅friend。
「哦，Ashley呀！班仔話要溝佢，Ashley話邊個飲隊得冧佢佢就同邊個拍拖。班仔應該好少過嚟呢邊玩，Ashley就成個老蘭都知嘅千杯不醉，佢係睇得中個班仔就唔會飲極都唔醉啦。呢啲老手，相中得嘅飲啖啤酒都話醉啦！」

伙記開始上菜，擺低兩支藍妹就走開，將軍又繼續講佢個愛情故事。