「冒險」「生存」《香城之夢》: 謎霧

大家見到佢可以講野都十分驚訝，因為佢身上既傷其實應該已經足已致命。
 
L甚至係第一個衝上去既人，其他人想㩒住佢都黎唔切。
 
L：「喂你點呀！？發生咩事呀呢度！？」
 
「快D走…佢唔係一般人…佢可能直頭唔係人…咳咳咳…」
 
如果唔即刻救佢的話佢一定會死，不如就用「回復水晶」…
 




「佢頭頂上有個紅色三角形…佢應該落左地鐵站，你地一定要…小..心..」
 
太遲了。
 
佢瞳孔放大，一直捉住L既手都放開左，佢已經死了。
 
大家都無反應，只係呆左咁企哂係度。
 
Chris：「大佬，疊起左個幾條屍佢地既衣著全部都係一樣，而且好似…」
 




「任務一開始個陣襲擊我地既個班人。」
 
L：「嗯你咁講又似係，而且旁邊既呢條友就係我之前話任務開始之前同我傾緊偈既人。」
 
「但佢地而家全部人都死哂，即係咩缐索都斷哂…我地又仲未搵返Team D…um…」
 
Elaine：「落地鐵站睇下？」
 
Elaine呢句一出，大家都即刻望住佢，仲要個個都用個相當驚訝既眼神。
 




L：「就係等你呢句！好大家行啦！」
 
雖然大家都無出聲，個個都默默咁跟住L行，但我Feel到大家都係有小小不安。
 
畢竟頭先個幾具屍體都係慘不忍睹，身上既傷口多到數唔哂，而且仲要咁整齊疊起哂…
 
兇手到底諗乜…
 
即使眼前仲有一大堆諗唔明既野，但我地都選擇左先忽略呢D野，開始走入地鐵站。
 
一入地鐵站我已經心感不妙，因為牆上，地上，甚至電梯上都有血跡。地下仲有子彈殻。
 
好明顯，呢度曾經發生過戰鬥，仲要應該相當激烈。
 
一個接一個戰場，如果真係發生係現實的話，或者我一早就已經一支箭咁走左去。




 
但係呢度，我居然有去面對既勇氣，係因為知道自己唔係現實？
 
點講都好，而家唔係可以俾我去諗既時候，而家必須專心去解決呢個任務先得。
 
情況千變萬化，突然間，我地既前路湧出一層濃濃既煙霧。
 
帶頭既L即刻停下腳步，仲舉槍指向煙霧裏頭，大家都跟住一齊做。
 
霧入面既野我地完全無辦法睇到，好似想將入面既一切都吞沒咁。
 
本身咁樣已經令到氣氛變得好恐怖，霧入面居然仲要再傳出詭異既笑聲，更令人不寒而慄。
 
大家都唔敢輕舉妄動，只係繼續舉槍指住D霧。
 




令人覺得奇怪既係，霧並無飄過黎，而係停留係特定既範圍，就好似有一幅無形既牆擋住D霧咁。
 
唔只我一個注意到呢個狀況，其他人都發現左，佢地都開始慢慢後退，同霧保持距離。
 
Chris：「又係領域效果啊，但點解今次要係我地以外既地方用？」
 
領域效果？呢隻game都有呢D野？我仲以為呢隻只係gta形式既game黎添。
 
L：「好簡單啫，代表目標或者其他人仲未留意到我地係度。」
 
Elaine：「同埋如果D霧係目標製造既話，入面應該有其他人係度先係。」
 
L：「哈哈，準確既分析，Chris你學下人啦你成日一…」
 
L既說話講到一半，霧入面就突然傳黎慘叫聲，仲可以好清楚咁聽到有一把男聲不停係度叫唔好。




 
之後就係一下爆炸聲。
 
大家都即刻靜左落黎，望返去霧個邊。
 
偏偏，霧係呢個時候就散去，唔洗五秒成個商場就出現返係我地面前。
 
我地第一時間就即刻跑去下一條電梯旁邊，因為呢個位置係頭先爆炸聲傳黎既方向。
 
好自然地，我地既目光都放左係下方，電梯既盡頭。
 
一個紅色箭頭係一個人既頭上，佢旁邊仲有一個人訓左係地下，郁都唔郁。
 
一秒之後，有紅色箭頭係頭上既個個人抬起頭，同我四目交投。
 




我一下子就感到一股寒氣包圍我全身，好想即刻離開佢既視綫。
 
於是我向後退左一步，但我發現係我身邊既七個人居然都同我一樣，仲要係同時同我一齊向後退左一步。
 
但呢小小既一步，唔足以令我擺脫佢既目光，我仍然同佢對望緊。
 
亦因為咁，我好清楚咁睇到佢下一個行動。
 
佢開始向我地既方向跑黎。