「冒險」「生存」《香城之夢》: 準備

 「如果無估錯的話，公開任務講既殺人魔應該就係之前新聞話個單連續謀殺案。」
 
新聞…我有印象，阿媽仲叫我地唔好去夜街。
 
Elaine：「根據最近既新聞，呢個人最近係藍田落手，已經有十個人遇害，最近一單係前日。」
 
我：「咁即係話只要我地今晚去藍田捕，就好有可能遇到其他玩家啦。」
 
Elaine：「嗯，相信其他玩家都會得出藍田呢個答案既。」
 




我：「話說…你估個個殺人魔會唔會係玩家？」
 
Elaine：「我估唔會掛…因為應該唔會出一個任務要求其他玩家去針對一個玩家架嘛。」
 
我：「不過《香城之夢》既營運商睇黎係想藉住一個公開任務去加速遊戲既進度？」
 
Elaine：「加速遊戲進度？你意思係…」
 
我：「咁係吖嘛，就算個任務目標係咪玩家都好，以復活水晶作為任務報酬，而且任務性質仲要係公開，咁即係話最後獎勵都只係得一個人可以拎到。」
 




「係任務期間肯定會有玩家互相攻擊去爭奪目標，甚至會殺死對方。」
 
「咁樣玩家既數量就會減少，《香城之夢》既進度就會加速。」
 
我諗我已經講得好簡單直接容易明白，但Elaine聽完之後仍然係呆左咁望住我。
 
我：「係咪我講得太複雜..？」
 
Elaine：「唔係，只係我估唔到你居然咁快分析到出黎啫。」
 




我：「喂喂喂，你好似太睇少我啦掛，我對打機都幾有硏究既。」
 
講得太多認真野，一時忍唔住搞下笑添。
 
Elaine：「咁呢層我都知..我想講既係…算啦有咩都係等過左呢個任務先講啦。」
 
「你手頭上既裝備夠唔夠用，如果唔夠我可以即刻叫Stephen過黎，等我地可以補給。」
 
我：「我夠用啊但乜可以咁架？點解你唔一早話我知呀？」
 
Elaine：「eh…呢個功能係要Level 15之後先開放…」
 
屌，我而家先得Level 12。
 
妹：「我返黎啦~~嗱你要既M記外賣啊。」




 
黎得正係時候，我都講到肚餓。
 
我一手接過阿妹手上個袋M記，拎個包出黎準備大吃特吃。
 
「咇！」
 
唔？咩聲？
 
我擰轉頭，望一望聲音既來源，同時亦係Elaine既方向。
 
一個紅色既感嘆號浮現係Elaine頭頂。
 
我：「咩事呀？」
 




我講既時候用手勢指一指佢頭頂，想問下佢到底發生咩事。
 
Elaine：「我今朝無食過野就黎搵你，無諗過會觸發飢餓狀態…」
 
佢好細聲咁講，細聲到我都幾乎聽唔到。
 
我只好將手上既板燒雞腿包一下扳開做兩份，將其中一份遞向佢。
 
我：「嗱，比你喇。」
 
Elaine：「多謝…」
 
佢默默咁接過一半既板燒雞腿包，開始食起上黎。
 
就係咁，我地三個「人」就係屋企食M記。




 
慢慢食，慢慢食左都唔知幾耐終於都將最後一條薯條都食埋。
 
Elaine既飢餓狀態亦解除左，無論係從狀態定係佢既表情上都可以確認到呢一點。
 
時間原來都已經三點幾。
 
Elaine：「我諗我地都差唔多時候出去？」
 
我：「嗯，我去換一換衫就行得。」
 
妹：「吓阿哥你要出去？阿媽話過你呢排唔好出去架喎。」
 
我：「但我真係有事要出去，你幫我打發阿媽啦，就話…」
 




死，一時之間真係諗唔到咩好理由添。
 
Elaine：「就話我地去左拍拖啦。」
 
…
 
阿妹對於呢個理由好似相當受落，仲好落力咁推我地出去。
 
不過我地多得咁先可以無後顧之憂咁出去。
 
大約五點幾，我地終於到左藍田。
 
問題係，距離任務開始仲有一段時間，我地應該要趁呢個時間去搵一個地方去匿埋同睇住周圍。
 
但如果我地去餐廳留咁耐肯定會惹人懷疑架喎…唔…
 
「喂，我地又見面啦浩賢。」
 
！？點解…
 
個次係信和見到既女仔，又再次出現係我面前。