「冒險」「生存」《香城之夢》: 行動

「對唔住。」
 
無諗過我地會同一時候講出呢三個字。
 
應該係話，我諗唔到佢有咩理由需要向我道歉。
 
我就話因為捲入左其他玩家既事而「出左名」要道歉啫，佢又有咩需要道歉？
 
不過唔可以問佢住，因為阿妹仲在場。
 




雖然話就話佢係NPC，但如果一陣講左d敏感話題，搞到佢走去同阿媽講咁就麻煩了。
 
我：「妹，幫我去買M記得唔得？請埋你食，唔洗找。」
 
我係個衫袋拎出一張一百蚊紙，阿妹見到之後就一手搶左，九秒九行左去著鞋。
 
阿妹：「好啦我而家就去買m記先啦，你地慢慢傾啦~」
 
好，走左喇終於。
 




我：「你話對唔住？係咪發生左咩事？」
 
Elaine：「點講好呢…其實我一早已經幫你安排好d防身用既野，放左係Stephen度，諗住等你自己去買…」
 
吓？？？？認真呢？？
 
我：「即係Stephen話有一箱野好適合我其實係…」
 
Elaine：「嗯，其實係我買黎比你，我仲叫佢只係收你子彈錢就可以，但無諗過你去拎既時候會出事。」
 




「早知我就直接比你，咁你就唔會被捲入…」
 
佢講講下就用隻手掩住自己塊臉，表情好似相當內疚咁。
 
我始終都係唔明佢到底為乜內疚，因為令我有危險？
 
我：「算啦，都過左去咯，反正我都無事，唔好放係心啦，我地仲有更重要既野要處理架嘛。」
 
Elaine：「啊，講起呢個，我有野要話你知，我係Stephen個邊收到有用既情報。」
 
啊，我呢邊都有「情報」要話比佢知。
 
之後我地兩個就開始交換大家呢排所獲得既資訊，不過我講既野佢大部分都唔感興趣，除左信和既事。
 
點都好，歸納左之後，大致上可以得出三個重點。

• 已經有玩家組成左隊伍，仲要唔只一隊。

 

• 最近有玩家從不同渠道購入大量重型武器，用途仍然不明。

 

• 我地用既「水晶」係遊戲入面暫時並未有方法獲得。

 
重點一同二係信和件事入面都可以睇得出既，除左我同Elaine之外已經有其他人自己組埋一隊，火力仲相當強勁。
 
至於重點三我又真係幾意外下，咁當日位偵探先生又係點得到呢d水晶架呢…
 
啊係講起火力…
 
我：「係啊我之前係Stephen度試槍，唔知點解拎起支槍就有一種好熟悉既感覺，用得好上手，你有無試過咁？」
 
Elaine：「哦，根據之前本筆記講，《香城之夢》系統入面相信係有一個技能支援系統，等玩家係一D需要特殊既技能既情況下仍然可以流𣈱操作。」




 
我：「即係話…係呢度我揸車，揸飛機同揸槍都識？」
 
Elaine：「我無記錯的話，咩基於公平體驗既原則下，所有玩家都會識呢D既基本知識，至於熟練度就因人而異。」
 
我：「哦…師父明白了。」
 
Elaine：「我都有一個問題，你話係信和個陣見到個位女玩家明明知道你係玩家，但係仲救左你？」
 
我：「係啊，最神奇既係佢居然知道我叫咩名。」
 
Elaine：「佢點解會知道你係玩家？明明水晶既效果仍然生效緊。」
 
仆街啦，點解我當初無諗過呢個問題？
 




我望望左下角，的確隱匿水晶既效果仍然生效緊。
 
咁點解佢會知道我係玩家？
 
「叮~！」
 
呢下聲突然係我腦入面響起，但並唔係因為我已經諗通左。
 
我視角既右上角突然彈左一個提示框出黎，寫住限時任務。
 
我開左黎睇，內容係咁：
 
「限時任務：捕獵狂徒
 
時間：本日：23:00~兩日後06:00




 
性質：公開任務，玩家們無需報名
 
任務內容：近日香城出現了連環殺人魔，使市內人心惶惶，請玩家用盡一切方法捕獵殺人魔，並將殺人魔交予警方，令香城回復安寧
 
任務獎勵：大量經驗值，復活水晶X1。」
 
我：「Elaine...」
 
Elaine：「我地要去。」
 
我：「你需要個D經驗值同復活水晶？」
 
我印象中，我地擁有既水晶入面並無「復活水晶」。
 
Elaine：「可以的話，我當然想要復活水晶啦，咁我地是旦一個有咩事都可以救到對方。」
 
「但我知道咁係無可能，我地講緊既係要同49個玩家爭，比我地高LV既人肯定大把，我地叉隻腳埋去反而更危險。」
 
我：「所以你係想藉今次公開任務去睇下其他玩家？」
 
Elaine：「無錯，估唔到你聰明左喎~」
 
佢臉帶微笑咁拍左我膊頭一下，好似變左另一個人咁，嚇左我一跳。
 
唔知佢自己係咪都注意到呢點，佢好快咁收埋自己隻手，面上既笑容亦變到尷尬既笑容。
 
不過點都好啦，我地總算要行動啦。
 
今晚會遇上幾多個玩家呢..？