「冒險」「生存」《香城之夢》: 狩獵

「我都估你會參加今次呢個任務架啦，果然俾我撞到你。」
 
「不過，趁未受傷之前好快D走喇，開始左之後會點無人知架。」
 
「你唔會夠其他人爭架啦。」
 
佢一輪嘴咁講，完全無理會我既反應，直至佢講完先望過黎。
 
我：「你到底係咩人…」
 




女：「啊係喎我上次太趕時間無講低自己咩名添，ummmmm...」
 
「叫我L先啦，真名唔想講你知住，嘻嘻。」
 
L…佢係咪睇得太多死亡筆記？
 
Elaine：「浩賢…就係佢？」
 
我：「啊係吖之前係信和就係佢救左我一命。」
 




Elaine聽完我咁講之後開始係度打量眼前呢個自稱「L」既女仔，表情仲相當不悅。
 
L：「唔…睇黎你同浩賢一樣都係玩家呢，真係奇怪，點解我睇唔到你兩個既status既。」
 
「唔通傳閒中話拎住D神奇item既玩家就係你地？」
 
！？已經有人知道左我地拎住水晶？
 
Elaine：「我唔明你講乜，我地只係請Stephen幫我地做左手腳。」
 




答得好！將個波拋比Stephen做得好！
 
L：「唔…真係咁咩？不過算啦而家唔係講呢D既時候，你地兩個都係快D走吧啦，活動開始左之後就算係我都無十足既把握保障你兩個既安全架。」
 
「而且如果你地係為左爭傳說中既復活水晶的話，我會…」
 
佢講講下眼神突然變得兇狠，傻既都知係警告緊我地唔好同佢爭水晶。
 
Elaine：「就算我地唔係為左咩復活水晶，你都有充分既理由殺左我地架，你應該都知道《香城之夢》既…」
 
L：「哦，哦，我知道你想講乜啦，我同我班兄弟由頭到尾都無打算要爆機，我地只係想好好咁享受係呢度既日子。」
 
「所以如果對方唔係來者不善，我地都唔會訴諸武力既。」
 
唔想爆機…？




 
我：「唔通你地就唔想返去現實？」
 
L：「其實呢度又同現實有乜分別？加上封測終有一日會結束，到時我地咪可以返去，而家應該好好享受。」
 
「聽落你地真係唔係為左復活水晶而黎呢度，咁不如黎我地個度再傾。」
 
痴線，邊個會咁蠢跟你走，容乜易俾你地溶左都無人知架。
 
Elaine：「好，一於咁話。我都有好多野想問你。」
 
吓？Elaine你認真架？喂喂喂等埋我呀！！
 
無錯，Elaine一口答應左L，仲開始跟L行，我只好怱怱咁跟上。
 




 之後我地一行三人去左藍田站上面既私人屋苑，L自稱呢度係佢為左今次任務安排既地方。
 
去到其中一個單位，一開門就見到十幾個人係入面，大部分我記得都係信和見過。
 
其中一個人一見到我地三個入黎就跑左過黎，講左句野。
 
「大家姐，已經發現左有大概七個玩家係呢度附近。」
 
L：「睇黎今次會好熱鬧咁喎哈哈。」

除左我地之外附近仲有七個玩家…咁即係而家係藍田已經聚集左幾乎一半既玩家…
 
如果開始左任務之後，呢班玩家之間會點呢，會唔會又變到好似上次信和咁呢…
 
時間慢慢咁流逝，話咁快時間已經去到夜晚十點九，即係話距離任務開始仲有十五分鐘。




 
呢段時間我做左D乜？我只係坐係窗邊，一直望住樓下既㬌色，至於Elaine，我見佢大部分時間都係度同L講野。
 
睇落佢地都傾得非常融洽，至少我聽唔到佢地有乜爭執。
 
「細佬，一陣你同你個朋友跟住我，我會負責你地既安全。」
 
就係我出一出神既一刻，有個都幾大隻，望落就知係職安真漢子既阿叔走左埋黎我旁邊。
 
我：「哦好我明白啦，有無乜野要我準備？」
 
阿叔：「著好護甲，有無望遠鏡？」
 
我：「無…」
 




阿叔聽到我話無望遠鏡之後即刻係身上拎一個比我，仲叫我袋穩。
 
其實我同Elaine會唔會阻住佢地呢…話說Elaine係點說服到L比我地留低架呢？
 
L：「好！各位再檢查多次自己既架䝳，我地要準備出發啦，所有野按照原定計劃進行！」
 
就係L講完之後，成間屋都充斥住上膛聲。
 
一行十幾人浩浩蕩蕩咁落樓，之後兵分幾路，四散於各處。
 
我，Elaine，仲有頭先個阿叔三個人就去左一個制高點，係呢度可以望到成條路，就連旁邊既斜坡都可以睇到。
 
由呢度望過去山邊可以見到有好多綠圓不停咁郁，即刻代表係個邊有好多玩家。
 
但隔左成條高速公路，我地點睇其他玩家呀。
 
就係我想吐糟既時候，我踢到野，我踢到頭先個阿叔比我既望遠鏡。
 
原來係咁用既…好彩無講出口啫。
 
咦，點解空氣好似唔同左咁既，係咪我太緊張？
 
唔係喎！！個天點解會咁既！！！
 
阿叔：「喂喂喂，搞乜呀？」
 
就連睇落身經百戰既阿叔見到個天既變異都忍唔住驚訝起黎。
 
無錯，個天突然間風起雲湧，雲層甚至形成左一個又一個漩渦。
 
周遭仲多左一層薄霧，搞到多左份詭秘既氣氛。
 
「任務開始」
 
呢四隻大字高掛係天空之上，仲伴隨住一聲恐怖既男人叫聲。
 
我：「睇黎開始喇，我地應該…咦！？」
 
阿叔頭頂既綠圓無左！