「冒險」「生存」《香城之夢》: 異端

藍洛晨：「喂喂喂，做乜啊？頭先唔係好串架咩？做乜而家成隻死狗吠都唔吠下咁？」
 
之所以佢會咁講，係因為唔夠五分鐘，黎「挑戰」既三位玩家已經全部都被佢打到趴哂係度。
 
佢地三個既HP狀態已經變成紅色，如果再打落去，三個人應該好大機會會死。
 
而且原來頭先藍洛晨拎住個支棍並唔係咩神兵利器，只係我地平時拎黎打康樂棋既Q。
 
不過最令我驚訝既始終都係佢既狀態，Level 50。
 




唔通佢都係玩家？但係應該無可能咁快去到Level 50架…
 
「只不過係一個NPC…」
 
！？佢班人打算係學校地方用槍！？
 
無錯，其中一個玩家係佢衫袋入面拎左一支手槍出黎，仲慢慢指向藍洛晨。
 
但係，即使被槍指住，藍洛晨仍然臉不改容，好氣定神閒咁望住對方。
 




藍洛晨：「開槍？你可以咩？」
 
玩家丙：「點解唔可以，反正只要…」
 
佢句野只係講到一半，就有一個好高大既人衝左出黎撲低左佢，仲一手打走左條友枝槍。
 
至於另外個兩個玩家，依然趴係地下，表情相當痛苦咁。
 
藍洛晨：「話左你唔可以架喇。」
 




佢一邊講一邊行埋去玩家丙個邊，最後仲執起左支槍。
 
藍洛晨：「唔只你有同伴架，我都有，仲要個個都好可靠。」
 
「好喇，就等你地為你地所做既事付出代價啦。」
 
喂喂喂，唔通你諗住殺左佢地？
 
唔到我唔咁諗，因為佢咁樣講加上佢而家又拎住枝槍，以佢既作風，會用枝槍係完全唔出奇。
 
「晨哥！警察到喇！！」
 
係操場既另一邊突然響起一把男聲，將大家既注意力都吸引左過去。
 
藍洛晨：「唷，時間岩岩好呢。」




 
咦？去左邊呀枝槍？
 
就係大家注意力去左另一邊既一瞬間，藍洛晨手上既槍居然唔見左。
 
之後我見到佢同訓導主任講左兩句，訓導主任即時眉飛色舞，完全無辦法想像佢頭先先比人打到隻狗咁。
 
係訓導主任既引領下，警察一黎到就將三個玩家帶走，不過佢地對於三個玩家身上既傷都感到好愕然。
 
就係警察同訓導主任帶走左班玩家之後，圍觀既大家都慢慢散去。
 
Elaine：「我地去搵佢啦。」
 
我：「吓，而家仲去？不如都係聽日先啦。」
 




Elaine：「但係睇佢個樣，好似係度等緊我地咁喎…」
 
佢咁講我先開始係人群中尋找藍洛晨既身影，發現原來佢望住我地。
 
係我地視線接觸既一瞬間，佢就開始行埋黎。
 
藍洛晨：「唷，唔好意思哂左唔少時間，仲有無時間繼續傾埋頭先既話題？」

佢對於頭先發生既事如此輕描淡寫，令到我同Elaine都感到相當愕然。
 
佢好似完全唔知道自己頭先好可能會死咁，定係佢真係咁有信心可以自己處理得到件事？
 
就係我重新審視眼前呢個人既時候，佢居然拋出一個震撼彈。
 
「NPC…係指乜野？」




 
我聽到佢咁講之後即刻望一望佢個樣，發現佢以一個好銳利既眼神望住Elaine。
 
無錯，只係望住Elaine，並無望我。
 
Elaine：「你自己心入面應該都有答案啦唔係咩。」
 
藍洛晨：「嘛…只係想確認一下啫，睇黎係真架呢。」
 
「你地之前所指比較特別，就係咁？」
 
Elaine：「嗯，雖然咁講係會好難令人信服，但係我地其實係身處係一個遊戲世界。」
 
「頭先個三個人仲有我同佢，都係呢個遊戲既「玩家」，而你…」
 




藍洛晨：「就係NPC？」
 
Elaine：「無錯。」
 
藍洛晨：「咁你地作為玩家可以做D乜特別野？例如…」
 
Elaine：「可以咁。」
 
Elaine都無等藍洛晨講完，就用觸控指令「叫」左一把刀出黎。
 
無錯，把刀係憑空出現係半空，再一下子撻左係我地面前。
 
藍洛晨：「哦…有意思。」
 
藍洛晨佢拎起把刀望，仲望得非常著迷。
 
趁佢望得入迷既時候，我好細聲咁同Elaine講左幾句。
 
我：「喂…點解要同佢講咁多，容乜易會比佢當我地係傻架…」
 
Elaine：「放心啦，佢的話無問題既。」
 
我：「不過如果佢都係玩家的話咁我地咪會好危險？」
 
Elaine：「呃…呢個問題…」
 
藍洛晨：「放心啦，我唔係咩玩家，我只係一個普通人，我可以保證。」
 
普通人？你頭先既舉動已經話左比人知你唔係正常人啦大哥。
 
藍洛晨：「我係一個NPC…睇黎會係一件好有趣既事呢…」
 
「好啦再見啦，我都唔想阻你地兩位咁多時間，有乜需要幫手就聯絡我啦。」
 
佢講完就自己一個行左去，完全無等我地既反應。
 
我：「居然有NPC接受自己係一個NPC既事…真係一個奇怪既人，直頭可以話係異端。」
 
Elaine：「講起異端，我地都係呢，對於呢個世界黎講。」
 
我：「唔？你話咩話？」
 
我一時捉唔到Elaine說話既含意，所以我望左過去佢度，見到佢係度查看緊物品清單。
 
Elaine：「拎走左d唔屬於我地既野…係指呢個？」
 
呢個係…