「冒險」「生存」《香城之夢》: 謎團

我：「暫時都係將佢收埋係呢度啦，咁樣做係最安全既辦法。」
 
Elaine：「嗯，而家都只可以咁做，希望唔會比人發現呢度啦。」
 
我地講緊乜？其實我地係度討論緊之前個位私家偵探交俾我地既野，一本筆記。
 
呢本筆記記低左好多有關《香城之夢》不同既資料，包括之前個一堆水晶，每款都好詳細咁介紹。
 
除左介紹水晶，筆記亦有記錄好多偵探先生自己調查返黎既野例如係咩人開發《香城之夢》，遊戲既各種設定，領航員既身份等等佢都有做調查。
 




呢本筆記，換轉係平時既世界黎講無疑係一本攻略天書，但係呢度，呢本野反而會為我地招來危險。
 
從之前件事已經可以預測到如果其他玩家知道左我同Elaine有呢本野九成會用盡一切方法黎搶。
 
就算我地肯公開，其他玩家都唔會乖乖罷休。
 
你問點解？因為《香城之夢》既第一個通關條件係：「殺死自己以外所有玩家。」
 
所以就算我地交出左筆記，我地既處境仍然會係十分危險。
 




因為咁，Elaine做左一個決定，就係將呢本筆記收埋。
 
收埋筆記，即使我地日後不幸被其他玩家擒獲，筆記亦唔會即時落入對方手。
 
相反，我地可以利用對方想得到筆記既心態，將筆記既功用無限放大，反而有機會搵到一線生機。
 
呢D推論係由Elaine自己一個人推測出黎，佢講出黎個陣我聽到成個人呆左。
 
我知道佢係聰明，但我無諗過佢心思細密同有遠見到呢個地步，居然連我地有機會比人捉到都諗埋。
 




啊，我地將本筆記收起邊？我地開頭都唔知應該收係邊好，因為好似放邊都有機會比人搵到咁。
 
不過係權衡左各方面之後，我地居然不約而同咁諗起一個地方，就係個個倉庫。
 
我地好少去個度，所以應該唔會咁容易比人發現到。
 
Elaine：「好喇，咁應該可以喇，行啦我地。」
 
我：「應該無人知我地會收埋D野係度既我估，只不過如果到時我地需要呢本筆記既內容的話…」
 
Elaine：「放心喇，我已經將大部分有用既野記低哂係我個腦入面架啦，而且我估暫時我地都唔太需要呢D內容住。」
 
我：「點解？你唔係想儘快離開呢個世界架咩？」
 
Elaine：「當然我係儘快離開呢個世界，但係你唔記得左當日個位NPC同我地講左兩個離開呢個世界既方法？」




 
我：「當然記得，佢話一係生存到個一日，一係殺死除左自己以外既所有玩家嘛。」
 
Elaine：「無錯，如果我地要一齊離開呢個世界，第二個方法就行唔通。」
 
「所以我地只得返「生存到個一日」呢一個選項，換句話講，我地要用盡一切方法生存，直至個日來臨。」
 
我：「咁同唔太需要呢D內容住有乜關係？我反而覺得更加需要呢D內容去幫我地生存落黎。」
 
Elaine：「嗯，你又唔係錯既，不過重點唔應該係爭論呢d。」
 
Elaine：「我覺得我地而家應該搞清楚之前積落既一堆迷團先。」
 
迷圑..？
 




Elaine：「點解我地係信和個日會比人襲擊，點解個個偵探會主動接觸我地？」
 
「到底係咪一直有人監視緊我同你？」