「冒險」「生存」《香城之夢》: 衝突

頭先為我地引路既個個人係藍洛晨講講下野個陣衝左入黎，仲氣喘喘咁，神色亦相當慌張。
 
藍洛晨：「喂喂喂，你唔見我係度同人傾緊..發生咩事？出面咁嘈既。」
 
「係呀..有三個男人無啦啦走左入黎學校大吵大鬧，仲打傷左校工同訓導主任，話黎搵人喎。」
 
佢上氣唔接下氣咁講，聽到我都覺得佢好辛苦。
 
藍洛晨：「搵人搵到打傷人？報左警未？」
 




「我有試過報呀，不過唔知點解電話收唔到…」
 
咁搞笑，電話收唔到？你咩台架。
 
咦，我個部居然都收唔到，竟然會咁岩。
 
Elaine：「應該係有人用左干擾結晶，我部電話都收唔到。」
 
Elaine挨埋黎我旁邊，好細聲咁講。
 




干擾結晶…？又係之前個堆七彩繽紛結晶既功能黎？
 
藍洛晨：「嘛，報唔到警都無辦法啦，總言之我地出去睇下先啦。你兩個都跟埋黎。」
 
佢講最後一句個下，用一個好狠既眼神望住我同Elaine，好得人驚。
 
唔知係咪因為呢份恐懼，我跟住佢既說話去做，同佢地三個人一齊行左出去走廊，係個度可以睇到籃球場。
 
籃球場上有唔少人，不過最吸引到我既唔係人，而係三個圓圈。
 




無錯，係代表玩家身份既圓圈，不過我今次見到既圓圈唔係綠色，而係紅色。
 
我：「喂Elaine…你見唔見到…」
 
Elaine：「嗯，佢地三個都係…不過點解佢地會搵到黎？我地明明…」
 
無錯，我地明明用左「隱匿水晶」，按照描述我地既玩家身份應該唔會被其他玩家發現先岩。
 
咁呢三個玩家到底係點樣搵到黎呢度架…
 
藍洛晨：「哦，原來呢三條友係黎搵你地既。」
 
「睇黎佢地都係你口中比較特別既人呢。」
 
呢兩句說話不帶有任何感情，聽落冷冰冰咁。




 
Elaine：「係，佢地三個都同我地兩個一樣，不過我地都唔知道點解呢幾個人為乜會搵到黎學校。」
 
藍洛晨：「嗯，有咩都等打發走佢地先再講啦，落去啦。」
 
我：「打發佢地？你諗住點打發佢地？佢地唔係咩善男信女黎架喎。」
 
藍洛晨：「哦？咁岩都有既。」
 
「我都唔係咩善男信女。」
 
佢就咁拋低一句說話，自己一個慢慢咁行左去樓梯。

屌…好型啊佢…
 




「唉麻鬼煩佢知唔知而家到底咩情況架！」
 
藍洛晨個條𡃁突然間開聲，之後又衝左落樓梯。
 
Elaine：「我地都去睇下咯不如。」
 
我：「啊…好呀。」
 
無理由拒絕架？而且我都想睇下藍洛晨會點「打發」班人走。
 
於是我同Elaine都落左地下，係遠遠咁望過去個三個玩家個度。
 
籃球場上既人明顯比之前少左，在場既人都企哂係場外，令籃球場顯得相對空曠。
 
點解個三位玩家無再行動？因為有一個人擋左係佢地面前。




 
無錯，個位就係頭先自己一個行先既藍洛晨，佢手上仲拎住支棍狀物體。
 
Elaine：「係呢度聽唔到佢地講乜，不如我地再行埋D？」
 
我：「都好，不過要小心，唔好俾個三個人發現我地。話哂佢地都好大機會係黎搵我地。」
 
Elaine：「當然啦，行啦我地。」
 
就係咁，我同Elaine混入旁觀既人羣，搵到一個絕好既位置睇同聽。
 
藍洛晨：「唔好要我同一句說話講超過三次，即刻同我走。」
 
玩家甲：「我頭先都話過，交相入面呢兩個人出黎我地就會走，我已經查過佢地係呢度讀書，你唔洗話無呢兩個人。」
 




其中一個玩家行前一步，將兩張相拋向藍洛晨。
 
有一張相好神奇咁隨風飄逸，落係我地兩個面前。
 
一如預期，相入面既人係我同Elaine，而且地點應該係信和。
 
唔通個陣個幾槍就係佢地三個開？
 
藍洛晨：「點解要搵佢地？係咪佢地做左d乜。」
 
玩家乙：「佢地拎走左d唔屬於佢地既野，我地要拎返。」
 
藍洛晨：「咁如果我唔交佢地出黎呢？」
 
玩家丙：「咁你就會落得同你既訓導主任一樣既下…」
 
個「場」字在場既人無一個聽到，因為藍洛晨係第三個玩家講緊野既時候衝左埋去，一棍打左落去。
 
玩家丙應聲倒地，全場人都無反應，時間好似靜止左咁。
 
藍洛晨：「有意思，三個人，呀唔係，兩個一齊黎陪我玩下啦。」
 
咦…？我係咪睇錯..？
 
點解藍洛晨會有Level..？仲要係…
 
Level 50…