當年我曾經追到一位女神,但我竟然飛左佢。: 特別篇:母親

我依個仔成日都要我擔心既,讀書唔叻,朋友又得幾個,又成日淨係對住部電腦或者手機,同我地父母傾通既時間少知又少。

放學番到屋到黎屋企又直接入房,好少會同我地講學校既大小事,除左有時需要簽通告既時候。

可能阿東份人比較內向,從來都好少聽佢提起過有班會活動啲啲野,唔知係佢唔參加定班會無搞活動。

直到升左上中二之後,唔知點解佢阿東突然開朗左好多,開始同我地分享自己既野,唔知有咩令到佢有咁大既轉變。

成熟左?受到朋友影響?定抑或係...........無論係點都好,我都覺得依個轉變令到我地依頭家增添左一份熱鬧。





就係果年既聖誕節,阿東尷尷尬尬咁問我點樣織頸巾,我當堂呆左係到,以之後微笑住教佢。

我夠膽講佢成世人最認真去學一樣野就係依一次,望住阿東跟住我織頸巾,場面變到好溫馨。

學校聯歡會個日阿東就一早起左身出左門口,仲帶埋自己親織既禮物,我諗令到佢咁有動力去學一樣野既原因係一位女仔。

放學返到黎屋企見到佢幾開心,隻手仲戴多左對手套,睇黎我無估錯啦,阿東好快咁入到房,仲好大聲yes左聲出黎,我係客廳都笑左出黎,睇黎依個仔唔想我再擔心啦。

而到左聖誕節正日既時候,阿東又一早起左身梳洗,仲執到自己幾型,臨出門口之前我同阿東傾左幾句:





「對手襪咁令既,女朋友仔整架?」我問佢

「係呀,聖誕禮物黎架！」阿東答我

「幾時帶佢黎屋企玩阿,我個仔咁怕羞佢都接受到,真係想見下佢真人。」我講笑咁講

「總有機會既」阿東唔知真心定hea答我

「唔好咁夜番啦,小心睇車阿」我未講完佢就出左門口





我真係無估錯,係一個女仔令到佢咁大改變,我真係好想見下依個女仔。

今個夜晚我等埋阿東返屋企先訓,佢番左黎屋企一臉疲態,入到房涼都無沖就訓著左。

我靜靜雞入到阿東間房,諗住打開銀包比張五百蚊佢當聖誕禮物,點知無意中睇到佢同一個女仔既合照,背景好似仲係學校。

我諗依個就係阿東既女朋友仔,望落都幾靚,條件應該都幾好,唔知佢鐘意阿東啲咩呢?不過我都唔理啦,阿東開心就夠啦。

依段日子一直持續左兩至三個月左右,係一日教師發展日阿東話約左人去睇戲,我心裏有數已經知係邊個。

本來諗住佢地會食埋晚飯拍下拖先番黎,點知下晝四點幾阿東雙眼通紅咁番到黎屋企,我問佢咩事又唔講,入左房鎖埋門,一直都無出過黎。

本來以為已經唔需要再咁擔心依粒仔,點知又唔知發生左咩事。

第二朝早我見阿東咁耐都未起身就拍門叫醒佢,佢係房出左黎隻眼腫哂,睇黎佢喊左成晚。





佢依然無向我訴苦同講任何野就出左門口,真係愈黎愈擔心佢。

等到佢放學番黎,校服汚糟哂個人又落哂形:

「快啲換衫,見你咁既樣就知你未食野,等我煮啲野比你食」我講

佢依舊無回應我,我好快咁煮完碗餐蛋麵,阿東一路食一路喊。

「唔洗餓到喊」我想緩和番個氣氛

點知講完阿東愈喊愈西利...........

「食完隻敷下雞蛋啦,你隻眼腫得好西利。」我講完就無再騷擾佢





無論發生咩事都好,我都會撐你,我心裏咁諗。

阿東依個狀態維持左三個月左右,佢又變返以前咁沉默寡言,又要我再次擔心佢。

雖然到左依個年紀我已經管唔到佢,但我時不時都同佢傾下計,令到佢個放鬆啲。

直到中四既中期,佢又回復番中二時期果種開朗,我諗佢成功追番佢既女朋友,過左無幾耐佢都有介紹佢女朋友比我識,原來叫左阿彤,份人都幾健談細心。

係中六既時候有一日既班際足球比賽本來以為落雨會取消比賽,點知下晝收到阿彤既whatsapp話阿東傷左,阿彤陪左佢番屋企。

我放工之後好快咁趕番屋企,返到屋企見到阿東坐左係到冰敷緊,但佢個人已經訓著左。

睇黎阿彤係一個非常好既女仔,有佢睇住阿東我已經唔洗再咁操心啦。

好快阿東就完成左成個中學,佢一早同我講自己想去外國進修同見識下,我亦都無反對。





阿彤亦都有whatsapp問我坐飛機既確實時間日期,離阿東出國日子愈近,我既心情亦都愈黎愈擔心。

怕佢得自己一個會照顧唔到自己,好彩佢都有同我地傾過下話自己識照顧自己,唔洗咁擔心佢,我先至放鬆左少少。

去機場既路途我一直都有叫鯔東小心啲唔慣可以隨時返黎,講到連阿東都覺得好煩。

望住阿東入閘既背影,忽然覺得阿東成熟左,已經唔再係以前嗰個細路仔。

希望你學業有成咁返黎見我地啦。



一年一度母親節又到,唔好成日厭你阿媽煩,因為係每個阿媽心目中,你都係一個未長大既細路仔
唔好咁見外同怕羞啦,快啲同自己既阿媽講聲母親節快樂啦!!!!!!!!