當年我曾經追到一位女神,但我竟然飛左佢。: 第五十四節:離別

係剩低既日子裏面,我見阿彤唔洗返工或者得閒既時候都約佢出黎,務求係離開香港之前見多佢多次就幾多次。

我地見既時間多到愈黎愈少話題講,有好幾次佢都問我做咩約得佢咁密,我求其次次都話掛住佢就算。

如是者佢要返工既日子我都送佢返工接埋佢放工,直到八月尾既一日我接佢放工。

「乜你真係咁得閒咩?差唔多成個三個月都可以日日搵我。」阿彤又問我

「咁我想日日對住妳呀,依家唔似返學果時啦,無得由朝對到晚。所以我咪爭取多啲時間對住妳囉。」我講





「成日都咁口花花。唔搵工返都算,仲日日都黎煩住我。」阿彤講笑

「鬼叫妳係我女朋友咩,唔煩妳個日妳就知驚。」我講

「妳最好唔好煩住我添呀,無左你我仲輕鬆啲。」阿彤講

我地兩個又互相講下笑激下對方,咁先維持到一段感情,但今日硬係感覺上有啲怪怪地。

我照舊送到阿彤返到佢樓下,但今次佢無即刻上去,反而停左係我面前。





「做咩仲唔上去呀?想我送埋妳上去?」

我講完既一刻阿彤轉身過黎攬住左我,突然到我完全反應唔到。

「做...........做咩呀妳?阿彤?」我口疾疾咁講

「其實我一早就知,其實我聽到你講架,但我一直唔敢面對.......」阿彤把聲有啲沙

「我都估到,果次我知妳聽到。」我好理解阿彤口中知道左啲咩





「你可唔可以陪我耐啲,我唔想你咁快走。」阿彤講

我地兩個就行左去公園啲長凳到坐。

「你仲有幾耐走呀?執齊哂行李未呀?」我見到阿彤兩隻眼都紅哂咁問我

「下個星期三就走架啦,一早就執齊哂啦。」我答

「咁你本來就唔諗住同我講你下星期三就走啦喎?」阿彤嬲嬲地講

「都係架,對住妳我真係講唔出口,所以我都係提左一次我去外國就無再提起,我怕會好似我地第一次分手咁。」我講

「其實我都有責任既,我應該早啲問你,但係我都同你一樣講唔出口,所以無追問過你。」阿彤低頭

「對唔住,瞞左妳咁耐,依排我成日見妳都係想暫時留低多啲回憶,我驚到左外國會慢慢唔記得妳。」我都有少少想喊





「傻啦,要嬲你都唔係嬲啦,仲有呀我地可以視像架,點會唔記得對方呢。仲有呀你要去幾耐呀?」阿彤安慰番我

「咁視像既感覺唔同真實見到,不過總好過無得見,唔知去耐架,最少都應該三,四年。」我講

「都差唔多啦讀埋大學,又要我等你咁耐,你捨得咩?」阿彤問我

「緊係唔捨得啦,不過都無辦法條路係我自己簡既,對唔住又要妳等過我。」我講

「唔緊要啦,之前都等左你兩年,等多四年都已經唔緊要,不過你要應承我一樣野,就係過到去最少每個禮拜都要同我視像三次以上。」阿彤講

「無問題啦,幾忙都會搵妳呀,直到我番黎香港之前都會keep住。」我講

阿彤伸左隻手出黎整左個勾手指尾既姿態,我笑左下都伸隻手出黎講。





「一言為定啦!」

到左下個星期三,真係我飛果日,我搭凌晨機所以夜晚食完晚飯父母再送我去機場。

「阿仔呀,記住比心機讀書啦,唔慣隨時都可以返黎架。」母親大人唔捨得我

「放心啦,我自己話要去既一定會盡力讀好書,見識下依個世界。」我講

「係囉,唔洗咁擔心啦,阿仔自己搞得掂架啦。」老豆同阿媽講

「咁就得啦,得閒打電話返黎報平安啦。」母親大人講

我點一點頭回應左就玩下手機,阿彤send左個訊息黎話祝我一路平安,我回左一個表情比佢。

到左機場之後check in 完就係到等,坐左陣聽到有人叫我阿東。





我另轉頭竟然見到阿彤,阿結同阿靜三個。

「妳地點知我依段時間坐飛機架?」我好驚訝咁問

「我之前問過你媽媽啦,點呀係唔係好驚喜呢?」阿彤講

「緊係啦,我完全估唔到你地會黎,因為我都無講過比其他人知除左阿彤。」我講

「記住識番個鬼妹呀東仔。」阿結講完就比阿彤打左下

「之前都有聽你提過話去外國,估唔到你下定決心真係去。」阿靜講

「係呀,我想去學下其他野,順便見識下。」我答





時間都差唔多我要入閘,我同佢地講左聲bye bye就準備入去。

「夏至東,你記住你應承左我既野呀。」阿彤衝左過黎錫左我一淡

「嗯,妳既大學生活都要過得開心啲。」我回番佢一句

我孤身一人入左閘向住自己既目標進發,我地三,四年後再見啦阿彤,我心諗................



當年我曾經追到一位女神,但我竟然飛左佢。全故完   (後記同感想明天會出)


後傳稍後會出,密切留意