✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 時光機篇 #20

 
《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
．作者FB︰http://bit.ly/2jHymHF
．作者IG︰http://bit.ly/2rxGoFA
 
///////////






#20



我們維持著兄妹的距離有說有笑，並肩走到先達。跟先達裡的情侶相反，倒是Michelle給我講解應該怎樣選一台smart phone。

我沒有意欲在她面前逞英雄，這足以證明我們並非什麼曖昧關係！

我們花了半天在商場裡繞來繞去，最後她買了一台中價旗艦機，而我則選了一部冷門的日系andriod。





Michelle看看那電話的牌子，意味深長地笑了︰

「最後你都係揀返同一個牌子喎？」

「係？我都冇留意……我覺得佢個mon啲色靚咋。」

「乜唔係有情意結咩？」

「電話牌子嘅嘢，來來去去都係嗰幾款架啦……」





Michelle以古怪的笑臉凝望我，彷彿一早把我看透。



買完電話去到餐廳，她教我如何像個港女一樣用前鏡頭自拍，再幫我用餐廳的wifi下載需要的軟件。

Michelle把電話遞給我︰

「裝好啦，呢個就係whatsapp，只要喺你電話入面嘅聯絡人你就可以send message俾佢啦。」

我接過新電話，幾乎想跪拜她︰

「阿Mi，好在有你咋，唔係我都唔知要搞幾耐！」





「真係誇張。」

我在已經導入成功的通訊錄裡找到Michelle。她的圓型頭像裡，是她跟阿Bi大學畢業時的合照，兩個人都笑得好燦爛。

我說句Hi，她桌上的電話響起，她笑說︰

「收到你message啦。」

「哈，原來係咁。同以前用MSN都幾似啊！」

Michelle揚眼望了望我，慧黠地笑了︰

「你突然要換電話，係因為Yan Wah？」







我語窒了︰

「呃……點、點解咁講……」

「我哋叫咗你幾多年你都唔肯換。除咗佢，我諗唔到其他原因喎。」

她托著臉頰，帶著笑意凝望我。我苦笑搖頭︰

「我只係覺得，再堅持一啲舊嘢，都冇意義啫。就算我再執著，過咗去都係過咗去架。我又唔係量子，再糾纏都只會剋人憎。」

「嗯……咁，你仲想唔想發明時光機？」

她的眼神並不特別銳利，卻彷彿粒子炮那樣輕輕鬆鬆就把我射穿。





……時光機嗎？

我一直妄想，如果能回到過去，就能把已發生的歷史扭轉，把錯誤改正過來。

但是……

「時光機呢樣嘢……讀咗咁耐，我自己都知道，穿越時空只係人類喺無可奈何之下嘅幻想啫。」

Michelle只以柔和的眼神凝望我，既不同意，亦不否認。



「呀……係呢，咁你嗰邊又點？你屋企人……」

「都係咁啦，媽咪都係收收埋埋見嗰個人，仲成日心花怒放咁。佢仲日日同我同妹妹講，過咗去嘅嘢唔好執著，做人要向前望。真係唔明佢諗乜！」





她攤攤手，一臉不屑。

我倒覺得Michelle媽媽的心境並不難理解︰

「可能佢覺得，等咗咁耐終於等到個老公返嚟，都算係有成果呀……即係，佢始終都希望有個完整嘅家庭，想你哋認返個老豆……」

「咩老豆？我哋先冇啲咁嘅老豆！佢有養過我哋咩？憑咩做我阿爸？」

「咁老一輩唔會咁諗架嘛，咩血濃於水嗰啲。失去咗嘅日子都失去咗啦，咪好好珍惜而家嘅天輪之樂……」

「閘住！我就係唔明對住啲咁嘅人，點解佢仲可以覺得開心囉！」

Michelle的表情顯示她對這件事完全沒有討價還價的空間。



我不再幫auntie說話，改以輕鬆的口吻︰

「係呢，其實點解你……你媽咪個前夫會突然間返嚟？」

她馬上糾正我︰

「唔係前夫，佢哋冇離過婚架。嗰個人氹我媽咪就話係浪子回頭掛住屋企，但我睇死佢係啲廠搬走失業，冇晒錢俾二奶趕走，先死返嚟想癡我哋囉。」

「唔……咁如果佢係發咗達呢？想帶你哋一家人過啲好生活，咁……？」

她定定神，認真地想了想︰

「如果係咁……錢留低，人走！養妻活兒係佢嘅責任嚟架，走咗十幾廿年，想用錢補償自己不付責任？冇可能囉！我都係唔會認佢。」

如此你一言我一言，晚飯時間過得飛快。離開餐廳的時候，我只覺得心底的鬱結減輕了些，Michelle的表情也似開朗了。

我像往常那樣送Michelle到她家樓下，她打電話給妹妹確定過家裡情況，才跟我道別︰

「呵哈，同你傾完一晚，成個人都輕鬆晒。如果唔係，上到去可能又要同媽咪嘈。」

「我隨時都可以陪你傾偈架。」

她抬眼望了望我，突然沉默下來。

我心跳加速，突然覺得，莫非她又再想抱抱？

「……契哥。」

「係、係！」

我的身體完全僵硬，臉上發燙。

她指尖滑過我的手臂，掌心貼在我的手背上︰

「……你唔使覺得唔好意思，如果喺學校有咩唔開心，都可以隨時搵我架。我……我唔會覺得你煩。」

「呃……好……」

「同埋……我覺得佢應該都唔會憎你。」

「……佢？」

「Yan Wah。我估，應該都係有啲嘢未搞清楚啫。」

她笑得溫柔，我反而不知道該如何解釋。

「吓……唔……」

「好啦，我唔多嘴啦。總之，有事就call我啦。」

「……好，你都係。」

她點點頭，臉上帶著滿滿的笑意，跟我互道晚安。

我轉身離去，卻禁不住想自己究竟怎麼了？

那晚的擁抱不過是Michelle受到過度刺激，想要一點安慰罷了。現在的她早已習慣家中的新形勢，又怎可能還跟我撒嬌呢？

想到這裡，我忍不住回頭，正好她也從樓梯口探出頭來。我們相視一笑，再次揮手，才各自踏上歸家的路。

Michelle的聰明和貼心，總能在我最低落的時候，給我安慰。我由衷地欣賞她那平穩又溫柔的個性。

我不知道她說華小姐不會憎我，只是安慰，還是她作為女生的意見……

但我真的覺得，心情比較踏實了。



Michelle說得對，還有太多事我們仍未說清楚。這樣完結的話，只會跟七年前一樣。

我拿出那個即將被淘汰的舊電話，再看一次華小姐七年前的最後一個SMS︰

『我很慶幸遇上了你們，只希望最後這段時光，也能跟你們快樂度過。普通朋友就夠了，別無所求，不會麻煩你太久。希望你能答應，等你電話，一直以來謝謝你』

當時，十七歲的我選擇了逃避，所以才會錯過這個message。



因為要面對她，要面對自己明明喜歡她又無能為力的心情，真的太痛苦了。所以，當時的我寧願當作看不見。

現在我要再面對她，也是一樣的無能為力，也是一樣的痛苦，但是——

再難堪的結局，都不比莫名奇妙無疾而終更難過。

我不想死得不明不白。

哪怕要面對再難看的結局，我還是好想，好想……再好好地跟華小姐正式地面對面，好好談一次。

by又曦

《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
 
．作者FB︰http://bit.ly/2jHymHF
．作者IG︰[url=http://bit.ly/2rxGoFA%5b/url]http://bit.ly/2rxGoFA[/url]