✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 補習社篇 #35

 
「咁你想聽我講乜嘢？」
即使遲鈍如我，也深明這句話絕不可說出口。

「係嘅係嘅……我、我好多謝你……你真係幫我做咗好多嘢……」
「唔使客氣。我有冇幫到你手？」
「梗有啦！我打咗去佢屋企啦，仲留咗言畀佢屋企人……哈，你真係好勁，連佢屋企個號碼都搵到。」

「嗯……其實，我覺得自己做錯咗。」
心臟怦然一跳，正猶豫應否馬上中斷話題，她卻比我搶先一步︰


「如果我早啲拎到佢個電話，嗰日你喺麥當當見到佢之後，可能已經即刻搵到佢……」
她的聲線聽起來就覺得婉惜，如果這是裝出來的，只能說是天才級演技。

「咁……咁又唔係你嘅責任嚟嘅，總、總之，我覺得你已經做得夠晒多、夠晒好，好感激你……呃……所以……你唔需要再……」
「轟隆——」
正言不及義，聲音突然被雷聲打斷。
下一秒，房間燈光閃了一下，隨即熄滅。

...................................................................................
.《自修室》小說已登錄各大書店


. 全新特別篇及修改內容
. 華小姐派必讀
. 死忠華小姐派建議人手一本 <3
....................................................................................

「啊！」
布簾對面就傳來細碎的蟋蟋聲，似乎是Michelle有所動作，但十秒之後，聲音就變成嘭嘭的碰撞聲。
我站起來問︰
「喂，阿Mi，你做乜嘢？」



「冇、冇事，我想開返盞燈啫。」
我試了試自己房間的燈掣︰
「唔得啦，應該係停咗電。你都係快啲返上床啦，唔好走嚟走去。」
「嗯。」

她答應過後，對面房又傳來連串的嘭嘭聲，聽起來似乎是她踢到了、然後摔倒了、再撞到什麼的一連串複雜響聲。
「喂喂，你小心啲啦……」

說到一半，才想起她上次在鬼屋的表現。
在這光線之下，她說不定完全看不見路？

.

她卻只是答︰
「OK，我會小心……」


「喂，你都係企定喺度唔好郁，我而家過嚟扶你。」
「吓？唔使啦，我真係搞得掂喎。」

她的聲音雖然很平靜，但想到她之前那模樣，我還是再次拉開玻璃門。
一掀起那道布簾，就看見她正站在房間正中央，雙手在空氣中摸來摸去，樣子相當滑稽。

她那間房本來是Abby的睡房，當然會有窗。
雖然附近沒什麼民居，但藉著窗外路燈的微弱暗光，還是依稀可以看見四周傢俬的輪廓。
我看見她腳邊的地毯被掀起了，她的背包倒在她腳邊一呎遠，裡面的雜物散滿一地。
而她本人則瞪大眼睛轉來轉去，似乎還搞不懂方向。

我走過去輕拍她的手臂，苦笑︰
「睇唔到就出聲呀嘛，做乜要格硬嚟？一陣整親點算？」
「我……我唔想麻煩到你嘛。」
「痴線，有幾麻煩呀？」



.

我讓她站穩，然後彎身收拾好地上的雜物，再拉起她的手臂帶她去床邊。
她對我笑了笑，另一隻手摸索著，也疊在我的手背上。
不知是酒精還是緊張的關係，她的掌心相當熾熱。
我也不期然地想起天台的事，不爭氣地臉上發燙。

現在這環境比上次在天台還要糟糕……簡直糟一百倍！
雖然她看不見，但我的眼睛適應下來之後，可看得相當清楚啊。
現在這樣，根本就是二人獨處一室吧！而且是深夜！而且我正在帶她去哪裡來著？床邊？

不不不不不……冷靜啊，阿翔！
這只是一條帶NPC回家的支線任務而已，心跳這麼快只是因為剛才喝過酒而已，根本什麼異樣都沒有。
只要完成這支線任務，這事就完了，我以後也不會再見她了，沒事的沒事的沒事的……



在昏暗之中，心跳聲格外清晰，我硬著頭皮找話說︰
「其實呢，呃……點講好……你嘅情況……使唔使睇下醫生？」
「嗯……醫生話係視網膜色素問題，冇得醫。」
該死！我挑的什麼話題啊？

「不過唔緊要啦，我本身都怕黑，平時晚晚都開燈瞓嘅。只要唔停電就冇事啦。」
她莫名奇妙地笑了起來，我唯有跟著乾笑幾下，緊張感卻絲毫沒有緩和。

.

幸好說話間我們已走到床邊。
我鬆了一口氣，正準備把她扔下轉身就走，她卻沒有鬆開我的手臂︰
「……契哥。我、有件事……」
「呃……有咩不如留返天光再講呀？」



「我真係唔明……你、點解你……要對我咁好？」
「吓？我幾時有對你好？幻覺嚟嘅啫！」
「但係……你頭先明明可以唔理我……」

「叩叩！」
重重的敲門聲打斷了她的話，我全身寒毛豎起，只聽門外傳來響亮的嗓音︰
「我係好姐——嚟通知你泵房浸咗，停電呀——不過唔使驚架，而家我老公搶修緊——你冇事呀嘛？使唔使畀幾枝蠟燭你？」

「好……唔！」
Michelle正要開口，我慌忙地伸手捂住她的嘴，再掐住鼻子向著門口喊︰
「唔該好姐。我暫時唔需要，你放低喺門口得啦。」
「好呀鄧少爺——咁你自己小心啲——」
好姐答應了一聲，在門口放低了一些東西，然後腳步聲噠噠噠遠去。

.

我後背出了一身冷汗，正暗自鬆一口氣，竟又被眼前的景象嚇得忘掉呼吸。

剛才情急之下，我為了阻止Michelle出聲而捂住她的嘴巴；混亂之間，卻因心急而用力過猛，竟在捂嘴之餘順勢把她按在枕頭上。
她纖細的身體就這樣倒在床上，肩膀和嘴巴被我壓住，領口下的蝴蝶胎記起伏不定，圓瞪的眼睛無比訝異。
我敢保證，隨便一個正常人看見我們現在這模樣，都會馬上打999報警。

我整個人跳起來，高舉雙手投降︰
「意、意外！係意外嚟架！我、我我我只係驚，驚畀人知道阿堅走去同阿Bi一齊瞓，所、所以……sorsorsor、Sorry呀！真係冇心架！有怪莫怪、有怪莫怪……」

她慢慢坐起身來，對著動作誇張的我，噗哧一笑︰
「唔使咁驚喎。我梗係知你唔係啲咁嘅人啦，傻仔。」
「呃……」
「好彩你醒咋。阿Bi件事，我爭啲就穿咗煲……多謝你。」

「呃、係囉……今日實在發生太多事，大家都攰啦，冇乜事我都係返出去瞓先……」
正想轉身走，手臂突然感到一陣溫熱。
回過頭來，只見Michelle雙手拉住我，眼睛在漆黑中閃出星光︰
「你仲未答我……點解、你要對我咁好？」

「我、我……我真係冇對你好喎……喂，如果你話我之前幫你同阿Bi和好嗰啲，係因為我想你幫我尋人咋嘛……我……我利用你咋，傻妹，呢啲根本唔係對你好。」

她連連搖頭︰
「如果你話你係利用我嘅，咁我而家已經冇晒利用價值啦……今朝我畀浪捲走又好，今晚我睇唔清又好，我跌親又好，咩都好……其實你完全唔需要理我都得。點解你……」

「喂，扶下你又有幾好呀？呢啲正常反應嚟嘅啫？你見到個阿婆跌親你都會去扶佢啦，邊有咁多原因呀？」
「但係……」
「同埋！扶下你又有得抽下水，何樂而不為先？你先係唔明嗰個呀。」

她湊過來，雙眼深深地凝視著我︰
「你……真係咁諗？」
「梗、梗係架！」
「係？如果真係咁……」

漆黑中只聽她深深地吸一口氣，然後，柔軟的身體滑入我的懷裡︰
「如果你係咁諗，我……我可以陪住你……直到佢返嚟為止。」
 
 
.
by又曦
like Page追看最新章節︰http://bit.ly/2jHymHF