中左六合彩頭獎四千八百萬，依家唔知點算?: 93
因為救護車只可以一個人跟車，所以…作為阿媽嘅詠恩理所當然跟救護車去醫院，而我就揸返我部車緊隨其後，途中順便通知埋小苑佢哋。
去到醫院泊好部車，我第一時間衝左上急症室，睇吓浠琳嘅情況。一入到去唔見詠恩同浠琳，小苑佢哋亦未趕到，於是我就走左埋接待處問啦。
「…姑娘牙，請問啱啱係咪有個八、九歲嘅細路女送左入離呀？」我問。
「…喺後面四號位做緊檢查！」姑娘回應，於是我就行左入後面分流區啦。
其實間醫院唔係好大，所以一行入去就見到四號位。而家浠琳訓左喺床上面，詠恩企左喺隔離，有個急症室醫生幫浠琳做緊檢查。
「…….！」我企左埋詠恩隔離，唔出聲咁靜靜等醫生詳細檢查。
「…醫生…佢…點呀？」過左幾分鐘，詠恩見醫生好似差唔多檢查完已經急不及待發問。
「…應該冇骨折，暫時無生命危險，不過小朋友話右邊肚位好痛，我啱啱檢查過有內出血，個位應該係肝臟，至於傷得嚴唔嚴重呢…我依家送佢去照ct ，再做多個詳細檢查後先可以答到你地，你哋係佢父母呀嘛，同佢辦左入院手續先，之後返離再睇佢啦。」醫生講完之後就行開咗啦，跟手有個護士推走左浠琳，應該係推去做檢查。
「…嗚～～！」詠恩又開始飲泣，痞左喺度成個人縮埋左一舊咁，搞到我都唔知可以做咩好啦。
「…唔好咁啦！」我單手搭住詠恩膊頭講。
「…嗚…都係我唔好…如果唔係我唔比佢睇演唱會，浠琳就唔會發生意外…嗚～」詠恩忽然好自責咁喊住講。
「…都…未必嘅….！」詠思咁講完搞到我都覺得關自己事咁…如果唔係我比啲飛小苑，成件事都唔會發生。
「點呀！！浠琳呢？」呢個時候小苑趕到，連詠恩父母都離埋。
今日係我第一次見到佢老豆，聽詠恩講佢阿爸係賣魚嘅，所以依家一身打扮都比較老粗，T恤牛仔褲，不過個樣就冇我像想中咁惡。
「…啱啱推左去照ct。」你睇住你家姐先啦，我去搞埋啲入院手續先。
將詠恩交返比佢屋企人之後呢，我就拎住護士比我嘅入院紙去左指定嘅登記櫃位幫浠琳辦入院手續啦。其實諗諗吓呢啲嘢係咪應該留返比佢屋企人做呢…！
「…唔該！」到左登記處，我將入院紙遞左比櫃位入面個女職員。
「…病人身分證！」職員講。
「…er…小朋友得張出世紙！」我將頭先小苑比我嘅浠琳出世紙遞左比佢。
「…咁父母身分證呢？」職員再問，我唯有遞自己將身分證比佢。
「…你係病人爸爸？」職員睇完之後有啲疑惑咁問。
「…er …係呀！」我尷尬回應。
「…但係點解出世紙果度無爸爸個名嘅？」職員再問。
「…er ..我哋……！」我支吾以對。
「…唔緊要啦…ok架啦張生，呢張係張浠琳入院嘅正式收據，你拎住張入院紙去返分流區果邊交返比啲姑娘就ok架啦。」好彩職員見到我個樣都冇為難我，好快就搞掂比返張入院紙我啦。
「…嗚！」返到過去詠恩仲喊緊，就連安慰佢嘅小苑依家都眼濕濕咁，伯母亦都係一樣對眼紅晒，而世伯雖然個樣都唔開心架啦，但又未至於喊，只係好無奈同悲哀咁嘅樣。
「…辦好左入院手續架啦。」我將入院紙同浠琳出世紙遞返比小苑。
係呢個時候，周圍都一片寂靜，完全冇人夠膽出聲，就好似困左喺一個特殊空間一樣，等待時間嘅流逝，同周圍好匆忙嘅人形成好大嘅對比。
「…係咪張浠琳嘅屋企人呀？」過左二十分鐘左右，一個護士走咗埋離問我地。
「…係呀！」我抑壓唔到內心嘅衝動，第一個沖咗出嚟應機，不過喺呢一刻，都冇人在乎到底係邊個回應。
「…張浠琳依家啱啱照完ct，你地依家可以上k座十樓「兒童深切治療部」睇佢啦。」
「…唔該姑娘！」大家一齊回應。
之後就一齊行左出去電梯大堂，跟住指示牌行到去K座，再搭𨋢上去十樓啦。搭𨋢期間大家繼續dead air，而喺我內心嘅深處其實係驚到鼻哥窿都冇肉，點解？大佬…深切治療部喎，icu喎！冇危險性唔嚴重嘅…點會轉入深切治療部吖，所以我喺心入面已經開始求神拜佛，祈禱乜都出齊，希望浠琳唔好有事呀！
一出𨋢就見到「兒童深切治療部」病房，我哋一齊入去，因為病房唔係太多人，所以好快就搵到浠琳。浠琳依家換左醫院衫，姑娘幫浠琳吊左鹽水，插晒針咁…睇見我就心痛啦。
「…浠琳！」詠恩第一個衝左埋去。
「…媽咪！對唔住呀！」浠琳吊咗鹽水之後，精神比頭先好左，但仍然係一面疲態。
「…嗦～傻女…媽咪對唔住先啱！媽咪唔應該咁惡鬧你架！」詠恩一路講一路喊。
「…我冇心整到架…我…只係想睇吓…睇吓媽咪以前同爸爸去過嘅地方咋！」浠琳忽然講出一句冇人明白嘅說話。
「…乜…乜嘢地方呀？」詠恩有啲疑惑。
「…你…你唔記得啦媽咪？我細個嗰陣你陪我行水塘，經過一個石澗果陣，你話你以前同爸爸行過落去架嘛！」浠琳講出童年回憶。
喺呢一刻…詠恩眼神望一望我，之後又好閃縮咁望返開。之後醫生終於都出現啦。
「…你哋係張浠琳屋企人呀呵？」一個中年嘅男醫生衝左埋離，睇離應該係高級野。
「…報告啱啱出咗嚟，張浠琳肝臟爆裂，有內出血…好彩出血唔算多，但係因為佢仲係太細，肝臟受損範圍比較大，應該要進行肝臟移植，如果唔係佢原本個肝臟未必可以復原得到。」醫生詳細解釋。
「…嗚～～吖！」呢個時候…伯母喊左出離，而詠恩繼續都係喊緊。
「…我係佢媽咪…我捐比佢啦。」詠恩搶出回應。
「…ok，但係…器官捐贈者血型最好同病人吻合，如果唔係有可能會出發排斥。不過你哋係佢家人，所以一般情況下都應該會吻合嘅。」醫生繼續講解。
「…不過張浠琳血型比較特別，係o-型…比較罕有，唔知你哋邊位係呢個血型嘅呢？」醫生講完之後望一望我地。
呢一刻全部人dead哂，你眼望我眼咁，完全唔識比反應。
「…我…地兩公婆都係A型！」伯母率先講出。
「…我都係a型！」小苑有啲無奈咁講。
淨返詠恩一個未表態，但依家有啲絕望咁耷低頭繼續喊。
「…er …咁…！」而家醫生有啲摸不着頭腦咁，唔知講咩好。
「…我係佢爸爸，我係o型血架！」當全部人絕望之際，我講出一句驚人嘅說話。其實我都唔知我係咪醫生所講嘅罕有血型o-型，但因為我全家都係o型血嘅，所以應該都唔會錯掛。
「…ok咁張生你跟我哋去做個詳細檢查先。」醫生講完我就跟左另外一個護士去做檢查啦。
至於檢查其實都唔係太複雜，都係翻查我嘅病歷同抽血。至於最麻煩嘅呢…其實係一連串嘅評估。心理評估、健康評估、仲做左個電腦掃瞄顯影評估我左、右肝臟嘅大小，又問清楚我有冇甲乙型肝炎呀，其他疾病…等等。之後最煩嘅係要通過一個叫做「人體器官移植委員會」嘅審批。因為根據香港法例，活體捐贈者要係病人嘅親屬，因為浠琳出世紙根本就冇寫我個名，加上我張親子鑒定報告亦都唔可以証明樣本係來自浠琳，所以我要即時再做多一次親子鑒定，不過因為係特殊情況，而且喺醫院即時做嘅關係，所以幾個鐘頭內就會知結果。
搞完一輪之後我走返過「兒童深切治療部」果邊搵返詠恩佢地，喺等候期間姑娘比左份野我簽，姑娘好詳細咁解釋一次內容，大至係講活體肝臟移植手術嘅風險呀，手術後嘅肝功能要幾耐先恢復呀，因為我係一個算高大嘅成年男人，咁所以要捐比一個小朋友只需要我好小部分嘅肝臟就可以架啦，手術後康復時間亦都比較短。
「…阿聰…要你捐個肝比浠琳…會唔會唔係咁好呀？你洗唔洗同屋企人商量吓先呀？」姑娘行開左之後，伯母有啲唔好意思咁同我講。
「…得架啦伯母，我通知左屋企人架啦，浠琳嘅事即係我嘅事…！」我講左句好有型嘅說話。
依家大家先稍為平靜落離，浠琳亦都訓左。詠恩繼續挨住喺浠琳床邊，小苑就講緊電話，應該係同條仔交代返情況，而世伯終於都開口問我到底係邊個啦。
「…er…呢個阿聰係阿恩男朋友離架！」伯母為我介紹。
「…你好你好，世伯！」我好緊張咁回應。
「…哦！咁…唔該晒你啦。」世伯點一點頭報以微笑，之後同我講唔該，應該係因為我捐肝比浠琳嘅關係，睇離佢哋暫時都未知我係浠琳嘅親生阿爸，以為我頭先認係佢阿爸只係為左可以順利捐肝。
「…阿爸阿媽，你哋返去先啦！」小苑望一望個鐘，之後同世伯伯母講，其實搞吓搞吓都搞到凌晨一點幾啦，兩老應該已經好眼瞓，返去先都好合理。
「…..！」伯母望一望對眼已經耷吓嘅世伯。
「…得啦，有我地喺度冇問題架啦，你地都忙左成晚架啦，返去休息下啦。」小苑再講。
「…咁…咁好啦，一有咩消息記住打比我地呀！」就係咁，我同小苑說送左兩老走啦。
而家淨係得返小苑、詠恩同我三個喺度。小苑留喺𨋢口，而我就行返入病房入面睇吓一直陪住浠琳嘅詠恩啦。一入到去詠恩抬返起頭望一望我，個樣百感交集咁，好似有啲野想同我講咁？