中左六合彩頭獎四千八百萬，依家唔知點算?: 92 意外
「…好精彩呀！一定係一個好凄美嘅愛情故事，希望阿聰都可以有一個完美嘅結局啦！」joey姐講出對白。
「…喂！唔見你一排，聽講返左國內拍戲喎，幾時有得睇先！」joey姐問。
「…應該年尾有得睇架啦。」我回應。
「…大家記住到時去捧吓我小師弟場啦！」joey姐對住觀眾講。
「…拿！難得離到點到同我唱返首！」joey姐講出對白，其實一早已經傾好左會同佢合唱我嘅首本名曲「世頭謠」。
「…緊係啦！你想唱咩歌吖！」我講出對白。
「…就你果首啦不如！」joey姐對白。
「…我果首好難唱架喎。」對白。
「…離吖！就係鍾意佢難唱。」對白。
「…登～～」音樂響起，我同joey姐開始合唱我嘅首本名曲「世頭謠」，當然所有野都係一早夾定哂架啦，有joey姐伴住，連我唱功都即時提升幾班吖，大佬…可以喺成萬人面前同傳奇天后合唱喎，仲唔出盡奶力咩，乜野生平絕學都要洗哂出嚟啦。
「…再一次多謝，張敬聰！」就係咁，喺joey姐嘅歌聲襯托下，我嘅嘉賓環節完美超額完成。我同joey姐一齊降返落後台下面。
「…thank you 阿聰！」落到後台因為joey姐趕住換衫進入下一部分，咁所以呢…同我擁抱左一下之後我都唔阻佢啦，自己施施然咁行返出去vip區果度，繼續欣賞跟住落嚟嘅表演。
坐低之後因為joey姐仲未出返離，仲係播緊過場片段，咁所以呢…我而家先得閒攞返個電話出嚟睇吓。咦～～原來個電話喺頭先綵排之後就一直唔記得開返添。
「…嘟～～」於是我就打返開我個手提電話啦。
但係一開返機，竟然發現有十幾個未接來電，而且全部都係小苑打離，到底發生咩事call得的咁急呢？
見joey未出場於是我行返出廁所，打返比小苑睇吓到底發生咩事啦。
「…嘟嘟～～」
「…喂！聰！」係小苑接聽。
「…做乜搵得我咁急呀？」我有啲疑惑咁問。
「…你…表演完未呀？」小苑問。
「…啱啱表演完啦！做乜咁問嘅？係喎….啲飛你冇比詠恩咩？」我反問。
「…對…對唔住呀！」小苑忽然有啲緊張咁同我講左句對唔住，呢句說話令我個心寒左一寒。
「…講…講咩呀？對咩唔住姐？」而家到我開始緊張啦，開始追問小苑發生咩事。
「…浠琳…浠琳佢…失左蹤呀！」小苑講出。
「…吓！」我嚇到大叫左出離，好彩廁所冇人。
「…你快啲過離香港仔先啦…，我再慢慢同你解釋吖！」就係咁…我一支箭咁飛到去停車場攞車，然後直飛香港仔啦。
「…點解會咁架？」開車途中，我問小苑。
「…都…都係我唔好，我諗住借浠琳過橋，果兩張飛琴晚我比左浠琳，諗住借浠琳對手去令家姐無法抗拒咁去睇你演唱會。」小苑有啲自責咁講。
「…咁之後呢？」我問。
「…浠琳知道左可以去睇你演唱會好開心呀，好興奮咁同家姐講，但係家姐知道之後好嬲，仲好決絕咁話唔可以去。」
「…平時浠琳都唔會敢逆佢意，但今次浠琳竟然同家姐撐到行，搏咗家姐幾句嘴，家姐更加扯火，嬲嬲地仲打咗浠琳一巴添。」
「…本來諗住呢件事就咁就完架啦，但今日放學之後就唔見左浠琳啦。」小苑繼續憶述。
「…報左警未呀？」我問。
「…仲未呀，因為都係唔見咗幾個鐘，所以都唔知可唔可以報！」小苑緊張回應。
「…咁詠恩呢？」我問。
「…家姐上左水塘搵呀！」小苑講。
「…水塘？」我問。
「…係呀，因為家姐裝咗個定位app喺浠琳電話度，定位顯示浠琳喺水塘上面。」小苑講，估唔到詠恩咁鍾意裝埋啲咁嘅野 。
「…咁咪得囉！」我講。
「…但係個定位幾個鐘頭前已經冇update 呢，可能係浠琳手機冇電，亦有可能係果度收唔到…總…總之就…唔知點算啦。」小苑講到個人都亂哂啦。
「…冷靜啲先，報左警先，我依家上水塘搵詠恩先，其他野你喺屋企等警察離再慢慢交代啦。」
「…哦！」
就係咁，收左線之後我部車亦到差唔多揸到去香港仔水塘郊野公園門口啦。我求其泊低部車，之後就衝左入去。
「…嘟嘟～～」我一路行一路打電話比詠恩。
「…喂！」詠恩接聽左，聲線有啲緊張。
「…你喺咩位置呀？」我問。
「…燒烤場…廁所果度！」詠恩回應，之後我就跑左過去匯合詠恩啦。
「……！」一過到去就見到詠恩坐左喺啲櫈度，耷低咗個頭喺度飲泣緊。
「…點呀你？」我行到埋詠恩身邊，之後痞低咗問佢。
「…嗚～～」詠思見到我喊得更加大聲，之後攬左埋離我度！
「…….！」我無言…唯有比佢喊晒出嚟，好彩今日係平日，所以燒烤場呢度只係得好小好小人燒嘢食，反而好多野豬喺度周圍搵食。
到詠恩心情平復返小小，我先拉返開詠恩小小開始問佢詳細情形啦。
「…你…搵過啲咩地方呀？」我問。
「…嗚…我唔知呀，我見路就行都唔記得自己去過邊度！」詠恩一邊喊一邊講，鬼咩…咁冇系統咁搵…搵一世都冇唔到啦。
「…拿…你繼續留喺度喺附近搵吓先，唔好走咁遠啦…依家黑媽媽，我驚連你都有危險。」講完之後…我就跑左出去啦。
離開燒烤場，我就跑左上上水塘，其實水塘話大唔大話細唔細，加上依家漆黑一片，要搵到真係相當困難，但係點都要搵架啦，唯有頂硬上啦。
「…浠琳！～浠琳！」我一邊行一邊叫，行左二十分鐘都仲係乜都搵唔到。
「…浠琳！」再行多幾分鐘，忽然見到遠處有一個少女嘅身影喎。
「…浠琳！」我一邊叫一邊跑過去。
個少女聽到我叫之後側側地身咁擰咗過嚟，但係因為太黑啦，只係隱約見到佢着住一身嘅行山look，孭住一個背囊。
「…浠琳！係咪你呀？」我繼續叫，但個女仔好似有啲驚咁開始向後退。
當走到好近嘅時候，我開始睇清楚原來呢個少女唔係浠琳。佢係一個大約十七、八歲嘅女仔，因為身材比較矮，所以遠睇同本身比較高嘅浠琳有多少相似。
「…唔好意思…我認錯人！」我講。
「…阿宜…！」一個男仔從遠處跑緊過離，應該係叫緊個女仔，大約都係十八、九歲嘅後生仔，手揸兩枝行山杖，著Polo恤、運動長褲，同樣孭住一個大背囊，感覺好似中年人嘅打扮怪怪地咁，就好似走難咁款。
「…頭先我喺上面好似聽到有人叫救命呀！」個男仔同個女仔講。
「…邊…邊度呀？係咪女仔聲？」我好緊張咁追問。
「…er…前面大約四百米左右啦！」男人未講完我就已經一枝箭咁衝左過去啦。
我個心又緊張又亂，一方面似係搵到浠琳當然開心啦，但係另一方面…果個男仔話好似聽到叫救命喎…我就開始有啲擔心啦…希望浠琳唔好有事呀！
我跟住男仔嘅指示…跑到去大約四百米後嘅地方，依家呢度係一個分叉路口，前面一條路，左後方一條路，左邊山邊仲有石澗，到底…到底我要點行呢？
「…浠琳！！！」我繼續大叫！叫之餘…我亦細心聽吓，聽吓會唔會聽到有人叫救命，但係叫左幾分鐘都係完全音訊全無。
我好攰…我坐左落離，個人挨住山邊嘅木欄杆，有啲氣餒咁…唔知可以做啲乜。
「…嗦！」我開始飲泣…眼淚開始流，因為我真係開始覺得無哂希望啦，好驚…好驚失去浠琳呢個未曾愛惜過嘅女。
坐喺木欄杆度，我開始回想返我同浠琳絕無僅有嘅回憶片段。我哋第一次喺詠恩樓下見面…我仲記得當時浠琳著住條白色連身裙仔…閃燈涼鞋果個天真樣，一齊去迪士尼…送隻公仔比佢果個開心嘅笑容…到游水比賽我哋同心協力一齊贏得全場總冠軍果份喜悅…呢一點一滴，雖然好小…但喺我心入面已經佔據左大部分嘅空間，我仲希望離緊可以睇住浠琳讀大學、拍拖、結婚…然後生仔…我仲要同你分享我嘅人生，浠琳…你唔好有事呀！
「…救…命！」唔知係咪我攰到開始有幻聽呢，我開始聽到浠琳嘅叫聲喎。
「…救….命！」咪住先…好似真係有人叫救命喎？
「…救…命呀！」係呀…雖然好細聲，但因為呢度本身就好靜，所以隱約聽好似喺我身後石澗遠處傳過離。
我跨過木欄跳左落石澗下面，澗水而行…急急腳咁向住聲音來源進發。咦…呢度好似係我當年膽粗粗帶住詠恩走落離果個石澗？我認得兩邊環境好熟，所有回憶即時返哂離。
「…救…命！」叫聲越離越大，我肯定係有人叫，所以我開始越行越急啦。
「…浠琳！係咪浠琳呀？」我大叫，因為已經見到有個人訓左喺塊大石上面，因為有啲暗。所我暫時未肯定係咪浠琳。
「…聰…聰哥哥！」真係浠琳呀，佢依家訓左喺塊好平嘅大石上面，雖然清醒但係個樣相當虛弱。
「…浠…浠琳，你…你見點呀？」我好驚…我唔敢亂掂佢住，因為唔知佢邊度受咗傷。
「…我…我個肚好痛呀…成身無哂力，郁唔到。」浠琳隻右手撳住右邊肚。
「…你…食錯野定撞到呀？」我再問。
「…頭…頭先…唔小心跣腳…撞到…！」浠琳回應，之後我就嘗試慢慢抱佢起身啦。
「…依…依家會唔會痛左？」我問，因為驚佢有其他地方骨折。
「…冇…淨係個肚果度痛咋！」浠琳回應。
「…得…你唔洗驚架浠琳，聰哥哥而家抱你落山。」我一路講一路行，眼淚又忍不住流出離啦。
「…聰哥哥！你唔好喊啦，我知錯啦…我下次唔敢架啦。」聽到浠琳咁講，我啲眼淚更加收唔到…！
「…你…你好乖…聰哥哥唔喊。」我喊住回應。
「…我…係咪會死呀？」
「…唔會…一定唔會，聰哥哥應承你，一定唔會比你有事…嗚～」我回應，之後繼續跑…終於跑返去燒烤場附近啦。
「…浠琳！」詠恩見到我即刻跑左埋離。
「…call白車呀！」我大叫，因為詠恩身後已經企左兩個軍裝警察喺度，應該係小苑之前報左警，所以依家到左。
「…浠琳！！！你唔好有事呀！嗚～～吖！！」見到奄奄一息嘅浠琳，詠恩崩潰啦…口水鼻涕完全失禁，好似痴咗線咁大叫大喊仲跪埋喺地下。
「…先生，白車已經離緊架啦。」兩個警察第一時間call左白車，而家叫我跟住佢行定出去路口等部車離。
我繼續抱住浠琳，而詠恩就跟住喺我側邊，用左幾分鐘嘅時間就行到出郊野公園入口處，說時遲 那時快，白車啱啱好到，救護員一見到我地就即時跳車，好快就set好擔架床。
「…交比我地啦。」救護員同我講，於是我就將浠琳慢慢放左上擔架床啦。