中左六合彩頭獎四千八百萬，依家唔知點算?: 84 沒有陳詠恩的日子

沒有陳詠恩的日子 第三日 晴

今日係我第一次嘗試寫日記，其實以前一直都未試過寫日記，因為覺得好老土，而且自己本身就已經好懶，根本就冇動力去寫。但係當你發現自己一個人，身邊原來一個朋友都冇，連本身最接近嘅人都一個一個走哂嘅時候，無人可以同你傾訴果陣會好想將一啲自己想講嘅說話寫低。

今日已經係我同詠恩失去聯絡嘅第三日啦。除咗我之外所有野都回復正常，呢個世界都係會繼續轉，唔會因為我一個人而有任何轉變。我返返工啦，詠恩已經唔喺度，老豆公司請左個新嘅跟單文員離頂替左詠恩個位。呢個新人呢…係一個廿歲出頭嘅女大學生離架，年輕貌美又話頭醒尾…乜都好快上手，真係幫到公司唔小。不過唔知點解呢…咁樣反而令我經常諗返起詠恩之前嘅大懵野，唔見倉匙啦、又成日攞錯貨單，嘻嘻…每次見到你果個好緊張又好驚嘅樣，我都會忍唔住偷笑。食完Lunch之後嘅眼瞓樣，果個好似發緊夢嘅神情，都會令我會心微笑。詠恩…唔知你而家喺度做緊乜野呢？收工之後我冇周圍去呀，返左屋企好專心咁為演唱會去寫果隻歌，我當左首歌係我哋兩個人嘅唯一連繫，今日已經有個基本旋律出咗離啦，照咁嘅進度演唱會前一定會搞得掂，希望到時你已經唔再嬲我，可以去到現場睇到我嘅表演啦。


沒有陳詠恩的日子 第四日 陰

今日已經係我見唔到詠恩嘅第四日啦，今日天氣好差，落大雨，估唔到冬天都仲會落咁大雨，真係好鬼死凍。周圍都好塞車呀，搞到我送貨都有氣冇埞唞，晏晝果陣仲差啲同隔離車發生碰撞添，好彩最後都係有驚無險。但係唔知點解呢，喺發生意外果一刻，我腦海入面浮現嘅係你喺雪山好關心我果個樣，我知道如果你仲喺度嘅話一定會嚇死都似。今日我好乖呀，收工後依然係keep住果團火，返左屋企繼續寫歌，成首歌嘅架構已經完成左，不過仲係好單薄，之後應該會加多啲唔同嘅元素入去架啦。好啦今日講住咁多先啦，寫歌唔知時日過，原來已經凌晨三點架啦，真係要訓啦。






張敬聰 日記 完。