中左六合彩頭獎四千八百萬，依家唔知點算?: 結局篇83

「…發生咩事呀大佬？」阿妹有啲疑惑咁問我。

「…見唔見恩姐呀？」我有啲緊張咁問。

「…恩姐頭先好似拎左個袋走左…！」阿妹有啲驚咁講，仲指一指出口樓梯嘅方向添。

「…咩事呀聰！」依個時候阿媽同老豆都意識到有啲事發生左。

「…冇…冇野，小事姐，我出一出去。」我輕輕交帶完就跑左出去啦。





我沿住樓梯跑返上去大路，呢條路話長唔長話短唔短，跑左我五分鐘左右我先跑到上去。但係上到大路已經空無一人。路邊只見泊左喺錶位嘅車而唔見詠恩。喺依一刻我好驚唔知點算好，係咁打比詠恩但電話已經熄咗，既然熄咗…whatapp一樣係唔會有用啦。於是我開住部車喺附近不停咁兜，兜左入大清又兜返出將軍澳，但始終都係唔見詠恩嘅蹤影，最後兜左個幾鐘我都係要無奈返返去燒烤場搵返我啲屋企人。

返到去思敏同樣已經走左，依家淨係得返我哋一家人喺度。場面比起頭先冷清左好多。

「…點呀！追唔追到呀？」阿妹好緊張咁問。

「…追唔到…！」我個人呆呆地咁回應，依家個腦仲係一片空白咁。

「…頭先到底發生咩事姐？你走咗之後思敏返返入離就話有啲事要走先啦。」阿妹再問，於是我就向佢哋單簡咁交代返頭先嘅事發經過啦。





「……！」佢哋聽完都deadair 左一陣，之後老豆終於開金口啦。

「…其實思敏都幾好吖，雖然你個新女朋友阿恩係幾靚女，但係個人好似cool左小小，而且好似唔係幾善解人意咁喎！」老豆主觀分析，講出佢自己嘅睇法。

「…老豆你唔明架啦，詠恩佢係一個比較慢熱嘅人，其實佢對我好好架，加上感覺呢啲嘢，亦都無法解釋嘅…再加上…」我講到呢度停咗落離。

「…加上啲咩呀？」阿媽有啲疑惑咁問。

「…加上…我同詠恩有個女…！」我鼓起勇氣講咗出離。





「…有…有個女？咪住先…你話果個阿恩有左？」老豆相當驚訝？

「…唔係有左，係我同佢已經有個八歲嘅女啦。」我再講，而家連阿媽都一樣面都青埋，之後我將成件事嘅來龍去脈一次過話返哂比佢地兩老知。

「…點解咁大件事唔一早話比我哋知呀？」阿媽聽完之後有啲責怪我。

「…其實我都知左唔係好耐架咋，連詠恩都唔知道我知，再加上我之前都未追得返詠恩，咁…所以咪冇講囉。」我死狗回應。

「…唉…依家知道左咁大件事，真係好想快啲可以見到我個孫女呀！」阿媽變得緊張，而老豆就有啲內疚咁款。

就係咁，都已經好夜啦，我哋一家人象徵式為阿妹唱完生日歌，切埋個蛋糕之後就執野走啦。我開車車住佢哋返屋企，梳洗完之後，我就攤左上張床度啦。望住手機上我同詠恩一齊喺四川玩雪嘅合照…我不禁落淚，但係詠恩嘅電話一直都係唔通，我有諗過打比小苑但係記得小苑好似同條仔去左旅行，所以最後我都打消左呢個念頭。

可能真係太攰啦，我亦都喺嘗試打電話之間慢慢咁訓著左覺。

第二朝訓醒，whatapp竟然出現詠恩嘅留言，而且內容亦都相當驚人。





「…聰！經歷過咁多事之後，我發覺我哋唔應該喺埋一齊。思敏可以做到嘅野，我一啲都做唔到。而且所有人都覺得你兩個先至係一對，一齊攞獎真係好襯，你同我一齊只會係你嘅負累，而且我唔係一個好女友，我真係覺得好對你唔住，我面對唔到你。我之前真係好自私，乜都淨係諗自己，但係我今次真係諗得好清楚，我哋分手啦。 唔好再搵我啦，我已經同東哥辭左職，電話亦都會cut埋，你亦都唔好離我屋企搵我，如果唔係我會做傻事！再見啦…聰，祝你幸福快樂。」詠恩 06:00am。 我一路睇呢一段訊息，眼淚不由自主咁開始流，個心就好似比把刀插左落去咁，果種痛唔係虛幻，而係真實存在…我以淚洗面…個人就好似無左靈魂咁，一直攤左喺張床度呆滯…

https://youtu.be/PR0me1BFKwk

張敬聰 呆滯

香煙點過　我又拚命再燃點
手機響到　斷電也沒有發現
風褸穿了　五日我亦繼續穿
燈泡燒了　卻自覺共你在相見
*愛到這裡　至發現真相　尋樂時
一不忍手　快感過量　連後遺都百倍來奉上

呆滯到　凝視也沒焦點　呆滯到像　不知好戲已是做完　死守空置戲院




呆滯到　存活也像敷衍　呆滯到像　七天七晚也沒睡眠 一首歌聽了近600遍(終生黑了眼圈)*

開水乾了　那煤氣爐繼續燒
金魚死了　我亦快沒有養料
單位空了　卻被那幻覺圍剿
崩潰的我　臉上似在笑但非笑
**

懷念你　呆滯當做消遣　呆滯到像　不知好戲已是做完　死守空置戲院
忘掉你　離別已十七天　呆滯到像　一生一世也沒睡眠　偏偏天國卻謝絕接見


我攤左喺度唔知幾耐…途中我諗過自殺，但係我係一個比較理智嘅人，而且好鬼細膽又怕痛，所以好快打消左呢個念頭，我開始思索人生，我希望可以做返啲野證明比詠恩睇佢係錯嘅。於是我起咗身，踏出咗第一步走左入廁所沖涼。熱水打落我個頭度令我個人清醒返唔小，但係個心依然係好痛，所以我沖完涼之後真係走咗去食左兩粒止痛藥。呢個方法係我上網睇返離，而且經我親自驗證過，真係可以減輕壓力同心理上嘅痛楚。沖完涼之後我行左出廳，已經係詠恩同我講分手之後嘅第二日啦。依家係下午兩點鐘，全屋一個人都冇，我好似…已經兩日冇食過野，依家開始有肚餓嘅感覺，入到廚房見到雪櫃面貼左張字條。

「雪櫃有肥牛、魚旦腸仔，肚餓就煮個麵食啦！」係阿媽留低嘅字條，打開個雪櫃緊係唔只咁小野啦，除咗佢講果啲之外，另外仲有花膠、帶子、春卷、炸魚皮不能盡錄，睇離佢哋琴晚打完邊爐。





食完碗麵之後，個人舒服左唔小。我睇吓個電話，依兩日竟然連一個whatapp都冇，感覺就好似比世界遺忘左咁。我同詠恩嘅對話仲停留左喺「祝你幸福快樂！」，依句說話就好似冰封左嘅時間咁，永遠停留。思敏亦都一樣係冇搵過我，都啱嘅無謂累人累物啦，雖然喺呢個世界我唔可以同佢一齊，但係如果有第二個世界嘅話我都希望喺果度佢會搵到個同我一樣嘅人一齊幸福快樂咁生活落去啦。

食完野百無聊賴，我走返入我間房，攞果個我都幾耐冇掂過嘅結他出離。抺吓線周圍清理下之後，我開始彈起上離。我希望寫一首新歌，一首屬於我同詠恩嘅歌，joey姐演唱會嘅時候，我就用依一首歌去感動詠恩希望佢可以回心轉意。