中左六合彩頭獎四千八百萬，依家唔知點算?: 85 真相大白

「…啊～～」我打緊喊路，因為琴晚寫歌實在搞到太夜啦。

「…大佬，今日放假喎，眼瞓唔瞓多陣先，咁早起身做咩呀？」阿妹坐喺梳化度講，因為今日係星期日，琴晚仲搞到三點幾先訓，但係朝早九點我就自己醒左。

「…瞓夠啦，做人唔可以浪費青春浪費生命架嘛！」我一邊講一邊執嘢著襪準備落街跑個早步。

「…仲跑步添？睇離大佬你冇咩事啦喎！」阿妹笑笑口講。

「…唔開心都冇用架啦，不如做多啲有意義嘅野。」我回應。





「…咁得閒不如一陣陪我去做啲有意義嘅野啦。」阿妹忽然笑住講。

「…做乜？」我問。

「…嘻嘻…我約咗朋友返香港仔果邊呀，車我過去就最有意義啦。」阿妹原來有陰謀。

「…咁都得牙你？」我反緊佢白眼。

「…嘻嘻，橫掂你依家咁得閒！」阿妹再講。





「…是但啦！」就係咁，我應承左阿妹，然後就行左落街跑步啦。

行到去會所，經過泳池果陣，我忽然又諗返起詠恩。記得當日喺屋企會所個泳池，竟然可以同詠恩重遇，想話同佢冇緣都冇人信。其實諗返起第一次喺沙灘遇到小苑，再喺香港仔重遇詠恩，到後來會所泳池再到老豆公司，所有野都好似係整定咁樣。個天既然要比機會我哋再續前緣，冇理由會要我哋再一次分開架？到底錯喺邊度呢？我諗要詠恩自己肯踏出呢一步先可以解開呢個死結。

諗吓諗下好快跑完步我就沖涼走返上樓啦。嘻嘻…其實我都係喺會所健身室部跑步機度hea跑左半個鐘左右，雖然唔係好勁，但係出身汗對於我嘅心情有一定嘅幫助。返屋企hea左一輪等阿妹搞掂好哂之後，我地就落樓一齊開車車阿妹過香港仔果邊啦。

「…點呀！大佬你？」開緊車果陣，阿妹忽然問。

「又問？」我回應。





「…咁你次次都hea答吖嘛！」阿妹回應。

「…咁你想我點答你吖？」我繼續hea答。

「…幾時追返恩姐返離呀？」阿妹再問。

「…時機成熟果陣咪追囉。」我回應。

「…又hea我！你知唔知呀，呢幾日阿媽都有問我關於恩姐嘅野呀！」阿妹講。

「…問啲乜？」我問。

「…問左好多野喎，問恩姐幾大呀，浠琳點嘅樣呀，佢哋生活成點呀，一啲關於佢哋兩母女嘅野囉。」阿妹講。

「…你點答呀？」我問。





「…答唔到啲乜喎，你知其實我都唔係好知你哋啲野架啦。」阿妹回應。

「…你阿媽又唔敢直接問你喎！」阿妹再講。

「……！」我deadair 左一陣。

「…快啲追返恩姐啦，你阿媽好緊張呢粒孫架，佢已經幾晚訓得唔好，晚晚諗住幾時可以見吓浠琳。」阿妹再講。

「…你知詠恩受軟唔受硬架啦，依家呢啲時侯夾硬搵佢，好易逼到佢做傻事架。」我回應。

「…咁你有啲咩打算吖？」阿妹再問。

「…我牙？諗住搵佢個妹做說客，之後托佢個妹比兩張演唱會飛佢同浠琳，希望到時靠浠琳幫手推推詠恩，睇吓佢肯唔肯入離睇囉。如果佢肯入，我到時會喺現場親自道歉！」我諗一諗之後回應。





「…依個計劃都唔錯喎！」阿妹回應，就係咁…好快就到左香港仔中心，我放低左阿妹之後，見肚餓所以就喺附近泊好部車，然後周圍睇吓有啲咩好食啦。

其實行緊果陣，經過詠恩屋企樓下，我都有種衝動好想走上去搵詠恩。但係都係果句啦，我知咁做一定係有反效果，所以我控制住我自己，慢慢咁遠離。行到商場我諗返起同詠恩食嘅果間越南野，見佢舖頭冇乜人，好嘅一餐唔好嘅又一餐，是但入去食啲嘢啦。

「…聰！」忽然有把熟悉嘅聲音叫我，我回神望一望，係一個四眼嘅男人。

「喂！咁啱呀！好耐冇見啦喎！」我笑笑口講，因為望真啲原來果個男人竟然係我一個好多年冇見過嘅朋友阿民。

「…都係咁啦。」阿民回應。

大家可能唔記得左阿民係邊個啦，阿民全名盧乃民，佢就係七年前同我篤波果個老死，即係搞到我個詠恩分手果條仆街仔呀。果次之後我哋都係冇再見過面，估唔到會喺今日撞到佢。

「…最近咩境況呀！」我坐咗埋去禮貌地寒暄幾句，講真隔咗咁多年啦，都冇乜野好再嬲啦。

「…之前做過吓保險嘅，不過搵唔到食囉，之後咪做sales 囉。」阿民回應。





「…sale乜呀？」我問。

「…見唔到我件制服咩？」阿民指一指自己件衫，唔講都冇留意，原來著住樓上連鎖電器鋪嘅制服。

「…咦～係喎，咁搵你買電器實有折架啦呵？」我回應。

「…點話點好啦，衰嘢！」阿民回應，唔知點解…佢啲語氣好似怪怪地咁嘅。

「…哈哈！咁多年冇見唔同哂喎，幾時開始帶眼鏡架你？仲帶埋哂啲手鏈添！」我問，因為阿民依家個look同七年前識佢果陣完全唔同哂，瘦左好多、戴左眼鏡、講野陰聲細氣咗、而且仲好似化咗小小妝添，咩料呀？

「…唔好講我啦，你都唔同哂啦，大隻左唔小喎，之前成日喺電視見到你，靚仔左好多喎，做左明星果然唔同啲，平時有冇做開jym架？」阿民越講越興奮，仲開始摸緊我手臂啲肌肉。

「…搞咩呀你，做咩咁乸架？」我撥開咗佢隻手，有啲疑惑咁問佢。





「…冇乜嘢，做咗自基人咋嘛！」阿民笑吟吟咁回應。

「…自己人？」我一頭霧水。

「…唔係呀，我係話～自「基」人！」今次我聽得明啦，對住佢面有難色。

「…唔係啊嘛，乜搵啲咁嘅嘢搞啊？」我有啲驚訝，直頭想掉頭走咁滯。

「…車～有乜大不了姐，又唔係去偷又唔係去搶，做返自己咋嘛！」阿民理直氣壯咁回應，都係嘅人各有志，我係唔應該去歧視人嘅。不過諗返起佢以前已經係不舉，可能就係因為佢性取向嘅關係。

「…你呢？今晚有冇興趣一齊玩吓咁呀，寡人今晚好得閒喎。」乃民繼續挑逗我，估唔到佢連我都啱喎。

「咪搞我，我直架囉。」我惡惡地回應。

「…車～玩吓咋嘛，而家仲同緊嗰個亞恩一齊呀？」阿民再問。

「…冇好耐啦。」我回應。

「…真係㗎，點解嘅？」阿民用可愛港女聲問，真係好想大巴大巴星落去。

「多得你囉，果次篤波之後，我哋就再冇聯絡啦。」我無奈回應。

「…果晚？諗返起都未問佢攞返錢添呀！」阿民諗一諗之後講。

「…攞咩錢呀？」我問。

「個死婆攞咗我五舊水去買酒飲囉，之後訓醒仲冇比房錢走咗人添呀，嬲得我吖！」阿民越講越嬲，睇得出佢對異性真係好反感。

「…訓醒？咩訓醒？」我問。

「…飲飲下條死婆就開始發酒癲啦，之後喺波樓嘈喧巴閉，我咪的左佢落樓下間時鐘酒店安置佢囉。」阿民憶述事發經過。

「…你唔搵我！」我有啲嬲。

「…大哥啊，你熄咗電話呀，我有搵過你㗎！」乃民回應。

「…咁…咁之後呢？」我再問。

「…之後…之後咪瞓覺囉。」阿民輕鬆回應。

「…瞓覺？你哋一齊？」我繼續爆炸。

「…我…我都醉醉地，一落到酒店就不省人事啦，點知姐。」阿民有啲驚。

「…你放心喎，我果陣已經對女人一啲興趣都冇，嘻嘻…其實仲有小小鍾意左你添。」阿民回應，大佬呀，比佢咁講一講乜嘢火都熄哂，仲開始有啲打冷震添。

「…得啦得啦！咁瞓醒之後呢？」我再問。

「…仲好講，個死八婆錢又冇擺低，粒聲唔出就走咗，搞到我要搵人攞錢離救我囉，幾魚皮呀。不如你錫返我啦！」乃民一邊講一邊控個頭埋離。

「…死開啦。」我用手踭撞開左佢。

「…～耶～拿～唔准咁對人㗎！」乃民講，救命呀我頂唔順啦。

「…先生要啲咩呢？」侍應見我咁耐都未叫嘢食所以行埋你問我。

「…唔洗啦唔該！」對住乃民乜胃口都冇哂，都係乘機鬆人先。

「…唔食牙你？」乃民問。

「…係呀！有啲事走先。」我回應，之後就起身走啦。

「…冇人陪記得call我呀！」乃民見我走緊繼續努力游說。

「…得啦得啦，係咁啦。」我一路講一路極速逃脫。

估唔到一個男人可以改變咁大，果陣雖然都覺得佢乸乸地咁，又不舉…諗住都係有病姐。原來一早就係男同志，都唔知果陣有冇借啲意成日抽我水添，諗起都打冷震。

諗諗吓…如果咁講…即係話詠恩唔肯上樓上間電器舖其實就因為怕見到乃民？詠恩飲左酒經常都會斷片，唔通連佢自己都唔知果晚發生咩事？諗落都應該係啦。知道呢個消息之後，我個人終於都鬆返口氣啦。但係暫時我都係應該繼續比啲空間詠恩，等佢自己諗通可以自己面對，如果唔係佢永遠都逃唔出呢個陰影。

「…嘟嘟～」走左冇幾耐，電話突然響起，我望一望竟然係成年都冇搵過我嘅經李人Ella，好彩係佢仲以為乃民咁快就殺到離添。