中左六合彩頭獎四千八百萬，依家唔知點算?: 82 阿妹生日
導演仲有各工作人員同我地三隊人，詳細介紹完今日嘅整個流程之後，拍攝就正式開始啦。一開始司儀逐隊人介紹我哋出場，之後就介紹各位食家評判，感覺幾輕鬆就好似拍緊Running Man咁，大家會有講有笑，男司儀仲要係當年亞視「今日睇真啲」嘅其中一個主持，都幾識搞氣氛，唔講仲以為佢拍緊食神。
工作人員攞出一個抽獎箱，之後男司儀開始抽出第一道問題。
「…好啦！第一樣要鬥嘅係齋腸粉！」男司儀讀出，我哋幾隊人開始議論紛紛。
「…可以行架啦，快啲爭取時間啦，限時一個鐘頭，依家開始計時。」男司儀提醒我哋，於是我就開始同思敏仆落街啦。
一落到街壓力隨即而來，因為全程每一組人都會有一個攝影師全天候跟住，確保參賽者唔可以出蠱惑。其實個遊戲玩法就係喺限時之耐要帶到題目中嘅食物返去，途中唔可以揸車或者搭的士，要使用公共交通工具。最快攞到食物返去嘅會加分，不過最緊要嘅都係食物質素。
「…點算好呢？」一落到樓下思敏就有啲不知所措咁問。
「…腸粉間間都差唔多架啦，最緊要快…我食過深水埗有間都幾滑幾多人排隊架，近近地就果間啦。」我提議，於是思敏就跟住我一齊搭地鐵過到去深水埗啦。期間我哋嘅一舉一動，所有對話攝影師都會拍低，至於最後啲鏡頭會點用，就係剪片嘅事啦，希望佢剪片剪得好睇啲啦。
因為時間尚早，深水埗暫時都唔係太多人，所以我哋好順利就買咗腸粉返去，前後用咗都係半個鐘左右。一返到去會場門口已經有其他攝影師開始影住我哋，睇吓先…暫時唔見其餘果兩隊人，睇嚟最快返嚟嘅係我哋。幾位評判唔等其餘果幾位參賽者，直接就開始品嚐我地買返嚟嘅腸粉啦。睇佢地三個食得津津有味咁款，可能未食早餐，見到乜都好食啲，睇離快返都係其中一個優勢。評判食完我果啲無幾耐，第二隊先返到離，而且仲強調自己專登走到去灣仔好出名嘅腸粉皇度買，個樣完全同我買果啲冇分別，可能真係好食啲我唔知啦。至於最後一隊呢…買到過哂時間先返到離，比評判直接dq，嘻嘻…睇到佢哋個失望樣，啲腸粉幾好食都冇用啦，唯有下一場努力啲啦。
各評判都講吓感受，我哋又講吓途中經歷，氣氛都尚算輕鬆，傾左陣計之後，司儀好快又抽出第二條題目，今次真係比較棘手，因為第二條題目竟然係「豬雜湯」一樣比較冷門嘅食物，思敏塊面直頭打左個問號，其他兩組人因為吸收左頭先嘅經驗好快就飛奔走左。而我亦都唔敢怠慢，拉住思敏緊隨其後。
「…去邊？」思敏好疑惑咁問，因為佢見我好似已經有左目標咁。
「…上環！」我一邊行一邊回應，因為我嘅目標就係上環。
「…上環？」思敏回應。
「…係呀！因為我阿媽好鍾意食豬雜架，所以佢成日會去上環皇后街街市果度食嘅，我都去過幾次，果間野啲豬雜湯應該滿足到評判。
我地繼續係搭最穩陣嘅港鐵，部車一開無耐，我已經打定電話落去叫定三碗豬雜湯，去到就啱啱好有得攞啦。不過今次嘅距離始終都有啲遠，去到攞完三碗豬雜湯，時間已經過咗半個鐘，回程果陣我同思敏都半行半跑咁最後先趕得切返去咋。
一入到去會場，見到已經有一隊人返左離，評判亦都品評完佢哋買返嚟嘅食物，緊接就試我哋買返離果啲啦。
「…第二隊買返離嘅好香喎！」其中一位評判講，之後幾位就開始品嚐啦。
「…啲豬雜洗得好乾淨，一啲異味都冇。加上有淡淡的胡椒香味，的確唔錯！」幾位評判品嚐完之後都一致好評，而最後一隊呢…同上一場一樣係返唔切離，今次直頭係遲左廿分鐘都未返到離，司儀示意唔好理佢哋，開始最後一條題目。
「…最後一條題目就係…菠蘿油！」司儀抽出題目，而且時限只係得30分鐘。我哋兩隊都即時離開。菠蘿油喎…周圍都係啦，依一場真係同時間競賽，事關菠蘿油一定要熱辣辣食先好味。
就係咁…我同思敏拔足狂奔，講真之前日日喺度返工，旺角我都算係半個地膽，諗都唔洗諗，緊係跑去附近最出名菠蘿油嘅「金華」啦。不過正值係午飯時間，所以周圍都好多人…水洩不通。我同思敏要不斷喺人群入邊穿插，去到「金華」門口，已經見到排緊隊嘅人龍，點算好呢？
思敏即時排左喺隊尾，條龍都幾長吓，正常排隊都起碼要排十五分鐘以上，咁排法返到去都遲到啦…！
「…聰！」正當我諗緊唔知點算好果陣，忽然有人叫我喎。
「…恩！」係詠恩…估唔到竟然會喺度撞到佢，諗諗吓公司喺附近，依家又係食飯時間，撞到都唔係太出奇姐。
詠恩自己一個人就排左喺隊頭二三個位，我二話不說行左埋去搭住詠恩膊頭扮到若無其事咁。
「…比賽緊…幫我叫三個菠蘿油攞走吖！」我細細聲喺詠恩耳邊講，詠恩亦都好醒目，排到我哋之後佢就好快手咁幫我買左三個菠蘿油，而且我仲強調塊牛油一定要另上，如果唔係溶晒就唔好食。
「…走啦。」我同詠恩講。
「…小心啲呀！」詠恩同我講，之後我就行返去龍尾搵思敏啦。
「…買左啦。」去到龍尾，我同思敏講。
「…快手喎。」思敏回應，之後我地就回程行返會場啦。
返到去…時間尚餘五分鐘，今次我哋竟然係最慢一隊進場。今次嘅第一隊係之前兩次都過哂時先返到離果隊，見佢個菠蘿油係就係快返呀，但個包一睇就之麻麻哋，而且塊牛油早就溶晒…失敗。第二隊個包睇落都唔錯，但塊牛油一樣係溶晒。到品評我哋個包果陣，我先將塊牛油放返入去，見到幾位評判都留意到呢一點，對我哋讚不絕口，唔洗睇都知勝出隊伍係邊隊啦。
無錯啦，幾位評判一致認為今次「網紅大對決」嘅勝出隊伍就係我同思敏啦。大家都拍手恭喜我地，之後司儀開始頒發獎項，我同思敏一齊領獎，其實直到依一刻我都未知到底贏咗係會有啲乜嘅，到司儀攞住張Q卡，開始讀出獎品我先知道，原來依個遊戲係冇獎金嘅，只係會象徵式比返每隊人一千蚊車馬費，而贏咗嘅一隊另外會得到贊助商廚房大佬送出嘅一萬蚊電器禮券，都叫做好過冇啦，不過對比起實質嘅獎品，其實提升我哋嘅知名度先係最大嘅禮物，希望依個節目對我嘅星途真係有幫助啦。
完左節目之後，思敏話想去食飯慶祝吓，之後仲自己揸主意帶左我去附近嘅一間餐廳度食添，本來都冇乜問題嘅，最慘係食到中途詠恩就收咗工，而且仲打離問我喺邊度添！
「…er…喺附近！」我回應。
「…拍完野未呀？」詠恩再問。
「…er …都完咗嘅…！」我答得有啲猶豫。
「…好肚餓呀，今晚唔洗返屋企煮飯，不如去打邊爐囉。」詠恩提議。
「…好吖…！」我回應。
「…咁始創等啦。」詠恩講完之後就收左線，但係我依家就食緊飯，應該搵乜野藉口閃人呢？
「…有事呀？」思敏見到我面有難色，所以問我。
「…er…！」我回應。
「…約左女朋友？」思敏竟然咁問，搞到我都呆左一呆。
「…頭先喺「金華」門口幫我哋買菠蘿油果個？」思敏再問。
「…你…你見到？」我有啲驚訝咁反問
「…見到，你搭住佢膊頭咁明顯點會見唔到呀？」思敏笑笑口回應，原來佢一早就見到哂。
「…快啲走啦，唔好要人等啦。」思敏再講。
「…咁啲野食？」我疑惑回應。
「…得啦，食唔晒我可以打包架嘛，快啲走啦！gogogo！」思敏微笑咁一路講一路做出快啲走嘅手勢，所以我講左幾句唔好意思之後就走左去始創搵詠恩啦。
一去到就見到詠恩企左喺門口位度等到發緊呆，鬼咩…我頭先食野果度差唔多去到油麻地咁濟，又要攞車又要再搵車位拍，搞左差唔多半個鐘先過到去。
「…呼～～唔好意思遲咗少少！」我一路唞大氣一路講。
「…做乜咁遲嘅…？」詠恩有啲疑惑。
「…冇…臨尾補拍返幾個鏡頭所以遲咗少少，唔好講我啦，想去邊度打邊爐先！」我講左個大話，之後就轉話題。忽然間有啲心虛添，但係又冇理由話我頭先本來同思敏食飯架嘛，講出離嘅話詠恩一定嬲死都似。
同詠恩食完飯之後都冇乜特別事發生，送完詠恩返屋企之後我都係照常咁返屋企沖涼瞓覺啦。之後嘅日子，所有野都好似回復正常咁。我繼續喺老豆公司幫手送貨，每日同詠恩朝夕相對，當然公司入面除咗阿妹之外其他人都唔知道我同詠恩係一齊，費事比人講閒話啦。而思敏唔知係咪因為知道左我拍緊拖嘅關係呢，差唔多成個月都冇搵過我出去拍野啦，只係間中會喺Facebook 留吓言比我咁。所有野都好美好，直到今日…今日係星期日，而且仲係我個妹ivy生日，所以我哋約好左夜晚成家人同阿妹去清水灣燒嘢食慶祝，而中午嘅時間我就揸左部車過香港仔搵詠恩。
「…早晨！」我講。因為詠恩啱啱上左我部車。
「…仲早晨…十二點幾啦！」詠恩回應。
「…嘻嘻～放假係訓得晏少少嘅！」我尷尬回應。
「…今晚…真係要去同你屋企人燒嘢食牙？」詠恩有啲緊張咁。
「…阿妹生日吖嘛，你同佢都熟架，咪順便見埋我老豆老母囉！」我一路講一路奸笑，不過其實我係無講過比屋企人知會帶埋詠恩去嘅，諗住到時比個意外驚喜佢哋。
「…見家長…我有啲驚喎！」詠恩有啲無奈。
「…咪當見老闆囉…哈哈！」我回應，就係咁…講完之後我就開車啦。
我將部車開咗返將軍澳，泊好部車喺屋企樓下之後，我就帶左詠恩去樓下個大型商場度食返個下午茶啦。
等緊野食果陣，無所事事撳吓電話，忽然Facebook彈出一個訊息喎，而且個訊息仲要係思敏send過離，因為詠恩就坐左喺我隔離望住，為咗洗脫嫌疑，我緊係好大方咁喺詠恩面前打開佢啦。
彈出離嘅係一個分享，原來係我哋之前做嘅果個網絡節目已經出咗街啦，但係….
「…撳入去睇吓。」係詠恩叫我，因為我仲猶豫緊睇唔睇好，但係未諗完詠恩已經自己撳左入去。
節目開始播映，成段片有成廿幾三十分鐘，啲野食啱啱好離到，於是我哋就一邊食一邊睇啦。開場都係啲介紹，司儀介紹嘉賓出場，傾左陣計之後就開始介紹評判同遊戲規則，中間加左好多特效剪接，估唔到拍左出離之後個效果會咁特別。好快去到各隊出外景嘅環節啦，佢啲片段會喺我哋三隊人中間穿插，有時講吓我哋有時又講吓第二隊咁 本來都好地地嘅，但去到中段嘅時候，原來跟住我同思想個攝影師捕捉左好多我同思敏好似好溫馨嘅鏡頭，而且啲片cut到我哋好恩愛咁款，間中又加啲心心特效，塑造到我哋係一對情侶咁款！我知…導演為左戲劇效果一定會搞啲話題野，但依家比詠恩睇住就死得啦。我見到詠恩塊面越睇越黑，最慘喺啲留言，乜野「好sweet呀！」；「你哋兩個好襯！」，好多詠恩睇到都眼火爆嘅留言，最後好唔容易我先轉到個話題，詠恩先冇當場爆炸，不過佢內心入面點諗我就真係唔知啦。
喺附近商場行左一陣之後，我就帶左詠恩行左出去海濱公園啦。天氣凍凍地，沿住海邊行真係幾舒服，四周圍都有好多唔同嘅人，有踩單車嘅、有跑步嘅、有釣魚嘅、亦有閑聊嘅師奶。雖然都喺同一個地方，但各人諗緊嘅野可能都大有不同。開始日落啦，詠恩翹住我隻手，我哋一邊望住咁靚嘅日落一邊吹住海風，本來就非常之寫意，但係…我留意到詠恩嘅神情，唔知點解…有一種憂愁同哀傷嘅感覺，就好似滿懷心事咁。
「…做咩事呀你？」我一邊行一邊好溫柔咁問。
「…冇…冇事。」詠恩呆一呆，之後好唔自然咁回應。
「…仲諗緊頭先段片牙？放心喎，拍完果啲片之後我同思敏冇見過面架啦。」我安撫緊詠恩。
「…嗯…我真係冇野呀！」詠恩細細聲回應，希望佢真係諗得通啦。
「…嘟～～」行到咁上下，電話響起。
「…喂！」
「…喂…阿哥牙，喺邊呀？」阿妹打離。
「…喺屋企附近囉。」我回應。
「…媽咪同老豆到左燒烤場啦喎，我依家都入緊去啦，你快啲入離啦。」阿妹講，就係咁…我同詠恩慢慢咁行返去我屋企停車場度攞車啦。
燒嘢食嘅地點就係清水灣一灘嘅燒烤場，喺屋企揸車過去都唔洗半個鐘，而且今日都唔係啲乜野特別日子，所以沿途交通都非常暢順，去到沙灘停車場，啲車位多到點拍都得，反而小人到有啲驚添。講開又講其實都真係好耐冇去過燒嘢食，起碼都兩年以上，仲要喺去呢啲公眾燒烤場就更加之耐啦。其實依家咁多收費燒烤場，阿爸阿媽唔使咁辛苦自己買哂野山長水遠攞入離燒啦，不過可能佢哋老一輩人都係鍾意返呢啲情懷。
泊好車後，我拖住詠恩沿住果條又長又暗嘅樓梯慢慢咁行落去。一落到去就見到沙灘，左右兩邊各有兩個爐.，但係已經有人燒緊，我地沿沙灘邊嘅路向前行，路邊有個好大嘅棚， 上面寫住有燒烤爐,，太陽傘出租,，但係冇開門，我地再向前行就係洗手間，過左洗手間就係主要嘅燒烤場啦。睇吓先…地方非常寬敞， 設施又新又乾淨，我都真係第一次離呢度，以前住開香港仔，燒嘢食一係香港仔水塘，再唔係就深水灣架啦。依家呢度其實都唔係太多人，大約得三成爐係有人嘅，望多兩望離遠就見到阿媽同老豆啦。
我拖住詠恩戰戰兢兢咁行埋去，周圍燈光有小小暗，都唔係睇得太清楚佢哋，不過越行得近就聽到越大嘅笑聲，睇離佢哋傾得好開心喎，但係點解….
「…哈哈哈哈～～恩敏你真係好鬼識氹我架姐，如果有你呢個新抱仔就好啦！」老豆一邊講一邊大笑，睇真啲原來思敏都離左，完全係我估計之外。
「…老豆！」我專登大聲叫，費事老豆再繼續亂講野。
「…咦～離左啦阿仔。」老豆望一望過離，見到詠恩之後有啲尷尬咁冇出聲。
「…聰！過離坐啦，有雞翼食呀！」阿媽好溫柔咁叫左我地過去坐，於是我同詠恩就坐左埋去啦。
「…係呢！呢位係？」阿媽問。
「…咦～～恩姐…！」依個時候阿妹啱啱去完廁所返離。
「…媽咪，佢係恩姐，係阿哥女朋友。」阿妹幫我介紹詠恩。
「…哦！你好呀！阿恩呀呵！唔好意思呀，唔知你離添！」阿媽同詠恩講。
「…唔緊要，伯母，世伯！」詠恩回應。
「…阿聰又係嘅…有女朋友都冇同我講過！」阿媽有啲埋怨。
「…唔記得講咋嘛！諗住今日帶佢離比個意外驚喜你地吖嘛。」我笑笑口回應，就係咁…總算叫做好好交代左，大家都開始燒嘢食啦。
「…點解思敏會喺度架？」我同阿妹行左埋一邊吉野食果陣我問。
「…咁我生日…思敏又係我Best friend叫埋佢離都好正常姐，阿哥你又係嘅叫埋恩姐離嘅話早講吖嘛！」阿妹反問，咁又係嘅…大家都估計錯誤左。
依家嘅氣氛非常古怪，詠恩同思敏嘅氣牆互相抗衡，但係思敏始終都比較外向，而且同我老豆阿妹都熟同我屋企人打成一片，有講有笑帶動氣氛。不過我就一於小理…燒野食比詠恩盡顯我對佢嘅關懷，希望佢息怒。但係唔知點解思敏同我老豆越傾越開心兩個開始飲起紅酒上離喎！
思敏平時都真係好小飲酒，今日唔知點解會咁主動，唔通阿妹生日佢真係咁高興，唔理咁多啦，做好自己本分先啦。雖然我全程都冇理過思敏，但係詠恩依然係表現出唔開心…仲係心事重重咁，唉…到底詠恩心入面仲有啲咩放唔開呢？
燒到咁上下，我諗住行去廁所放放水嘅時候，忽然喺廁所後面嘅樓梯位見到思敏坐左喺度喎。佢雙腳合埋，成個人伏底左兩隻手同塊面都貼實左個膝頭哥。我好奇行左埋去睇吓佢係咪飲得多得濟唔多舒服，但當我行近思敏嘅時候，發現思敏原來喺度飲泣咁，大獲…點算呢？
正當我諗緊到底點做嘅時候，思敏似乎感覺到有人行近抬一抬頭。
「…冇野吖嘛？唔舒服牙？」比佢發現左就冇得走啦，唯有問吓佢發生咩事啦。
思敏企左起身，慢慢向住我行緊埋離，雙眼通紅好明顯係啱啱喊完離，搞到我都有啲不知所措咁向後退左兩步，佢忽然雙手攬左埋離，而且仲伏左喺我心口起勢咁喊添。
「…嗚嗚～～」思敏喊到收唔到聲。
「…做…做咩事呀？思敏你冷靜啲先啦！」我一邊嘗試細細力推開思敏一邊講，但係好明顯係一啲作用都冇啦。
「…點…點解呀…！」思敏一邊喊一邊講。
「…乜…乜嘢點解呀？」我有啲疑惑。
「…我好妒忌佢…點解佢可以得到你嘅愛…而我唔可以喎！」思敏繼續發酒癲。
「…公平咩？點解呢個世界咁唔公平喎！」思敏繼續發炮，搞到我都唔知點回應佢好。
而最不幸嘅事就係，喺依個時候…詠恩竟然經過，而且望到思敏攬住我依個情景，直頭成個人呆哂，即時掉頭走左。
「…恩…喂…恩！」我細細聲想叫住詠恩，但思敏繼續攬到我實一實，一時之間我都無法掙脫。
「…放手先啦，思敏！」我開始出力拉開思敏，思敏雖然唔想，但力量始終唔夠我離，比我拉開左，之後思敏退後左兩步，有啲唔甘心咁望住左我。
「…我知…如果唔係你，我唔會做到明星，如果唔係你，我老豆可能已經身敗名裂，我一直都好感激你為我做嘅一切，對唔住因為我曾經呃過你，對唔住因為我離緊只會鍾意詠恩一個，希望你可以明白！」講完呢番說話之後，我就轉身追返出去搵詠恩啦。