中左六合彩頭獎四千八百萬，依家唔知點算?: 81
「…咯咯～」直到mandy姐敲門，我先喺房度開門出離。
「大家好！」我笑住講。
「…woo～原來係阿聰！」Yvonne姐好興奮，而詠恩就即時呆左，之後開始笑咪咪咁，望住我含羞答答咁。
阿妹就繼續扮唔識我，開始拍手歡迎。搞完一輪之後，大家就各自做野啦。而我呢…就照舊走左過詠恩度睇吓有啲咩野貨送。
「…今日有啲咩貨呀？」我企左喺詠恩張櫈後面問，隻手仲偷偷地搭住左詠恩膊頭。
「…點呀老闆，一離到就調戲女同事牙？」詠恩挖苦緊我。
「…講呢啲！」我笑笑口回應，之後繼續摸住詠恩手臂。
「…你好呀你！原來係太子爺，你都呃得我耐啦。」詠恩扮嬲，不過睇得出係開心。
「…你都冇問！」我回應。
「…比人睇到啦…！」詠恩撥一撥開我隻手。
「…我唔理呀！罰你一陣請我食飯。」詠恩再講，之後我就出左去送貨啦。
雖然話我係太子爺姐，但係都係揸車送貨啱我多啲，輕輕鬆鬆又到食飯時間啦。我同詠恩去左始創嘅西餐廳食嘢，食野果陣我就張我屋企發生嘅所有野，全個心路歷程講一次比詠恩聽。
「…唔怪之得啦，無啦啦住豪宅，原來係中左六合彩。」詠恩講。
「…細聲啲啦！」我有啲尷尬咁講，大佬中六合彩發達其實都唔係啲咩威水事，都係低調啲好。
「…開頭我仲以為你做明星咁好搵添，係呢係呢…點解你會做左明星嘅？」詠恩有啲好奇。
「…因為有個朋友…佢幫我報咗個歌唱比賽…」我有啲尷尬咁講。
「…女仔？」詠恩問。
「…er…！」我dear左幾秒。
「…係咪果個Jennifer呀？」詠恩再問，估唔到佢會講得出思敏個名。
「…我知係佢…我睇過你地啲youtube 節目。」詠恩再講，語氣有啲不爽咁。
「你地…一齊過？」詠恩一輪咀咁講左好多野，基本上全部都比佢估中哂咁濟，女人嘅直覺真係非常恐怖。
「…放心喎，我哋而家冇野架啦，只係普通朋友。」我緊張回應。
「…你當人係普通朋友姐，但係我睇得出佢唔係咁諗囉…！」詠恩有啲唔高興，之後我將我同思敏將要拍攝一個新節目嘅事從實招來，諗住坦白從寬，但原來係死得仲快，詠恩今次真心嬲左，之後仲一直黑面黑到收工添。
於是收工之後，我死哂狗咁希望可以氹番佢。
「…詠恩！詠恩！詠恩！」落到公司樓下我跟住詠恩尾係咁叫住佢，最後要我從後熊抱佢先可以捉得住佢。
「…吖！」詠恩大叫，因為附近有人，所以佢叫左一聲就停左落離，依家我放返低佢，之後擰返佢個人過離正面咁攬住佢條腰。
「…傻妹呀！唔係咁都呷醋呀嘛？」我又Chok左把溫柔聲出離。
「…咁係吖嘛！佢之前暗戀左你咁多年，之後同你散咗都一直咁關心你，話對你冇野就點都唔信…ng…。」詠恩講到呢度，我就一野咀左落去截停咗佢，睇到詠恩即時變得好享受咁合埋左雙眼。
「…你對我咁冇信心？」咀完之後我問。
「…唔…唔係…！」詠恩回應。
就係咁…氹返掂詠恩之後，我就揸車送左佢返香港仔啦。詠恩話要去買餸，我陪佢行完街市，之後又去埋超級市場，個感覺就好過兩公婆咁好特別，搞完一輪之後，我送到詠恩返到屋企樓下佢都依然係依依不捨咗拖住我。
「…媽咪！」喺依個時候浠琳忽然出現，詠恩嚇到即時鬆開左拖住我嘅果隻手。但係浠琳好似都留意到，有小小疑惑咁望一望我哋頭先拖住手果個位。
「…返離啦。」詠恩阿媽跟住喺浠琳後面問。
「…係…！」詠恩答得有啲尷尬。
「…伯母，好耐冇見啦。」而我就同伯母打左個招呼。
「…我加左料，你老豆今晚又唔返離食飯，不如阿聰留喺度食餐便飯啦。」伯母竟然主動邀請我留喺度食飯，詠恩有啲不知所措，但亦都唔識拒絕，最後我係跟住詠恩尾齊齊返左上去嘅。
一上到去…詠恩就急急腳走左入廚房，伯母亦都係一樣，而家個廳得返我同浠琳兩個你眼望我眼咁。
「…聰哥哥，好似好耐冇見過你咁嘅。」竟然係浠琳打開話題。
「…係呀！聰哥哥去左四川拍戲吖嘛，早幾日先返離咋，吖…你等等！」我邊講邊拎起我個袋。
「…拿！送比你嘅！」其實我有買到手信比浠琳架，不過一直都唔敢比詠恩驚刺激到佢，依家嚫詠恩行開咗就係最好嘅時機啦。
「…多謝聰哥哥，好得意呀。」浠琳個樣勁開心，希望佢真係鍾意啦。其實只係一盒熊貓公仔造型嘅文具套裝。
「…拿…以後見到啲熊貓要諗起聰哥哥架，聰哥哥因為黑眼圈大，都成日比人叫做熊貓架！」我講，希望浠琳佢會珍而重之啦。
浠琳問左我好多關於拍戲嘅野，個傻女好好奇，又問幾時有得睇我套戲，我都好想答佢，可惜連我自己都唔知吖。同浠琳玩左一陣飛行棋，詠恩就開始喺廚房拎啲餸出離啦。我就緊係走埋去幫手啦，但伯母話我係客，好快就趕返我出廳啦。同浠琳佢幫手開枱，派碗擺筷子，原來浠琳都幾乖架喎，識得主動幫手，食飯果陣又會叫大家食飯，絕對唔係港孩，估唔到詠恩都教得唔錯喎。食完飯之後，因為浠琳聽日要測驗，詠恩要同佢溫書，所以我都唔阻佢哋啦，好快就走左，今次係我第一次有自己嘅家嘅感覺，有小小奇妙，但又幾享受，不過都有小小驚，始終都唔知如果之後真係相認返要一齊生活果陣唔知點應付好。
「返離拿，大佬！」返到屋企阿妹坐左喺梳化撳緊電話。
「…嗯！」我一邊閂門一邊回應。
「…嘻嘻！」阿妹忽然走左埋離對住我奸笑。
「…嘩！好大嘅陰謀咁款喎，冇錢洗牙？」我問。
「我唔貪心架大佬，兩張吖…兩張我就夠架啦。」阿妹雙手合十，苦苦哀求咁嘅樣，到底發生咩事呢？
「兩咩張呀？」我疑惑回應。
「…joey呀！」阿妹再講。
「…joey？」我繼續疑惑。
「…搞錯呀，你冇睇ig 架咩？」阿妹好肉緊咁講。
「…啱啱今日公佈左啦，joey姐下個月開show啦！兩張飛唔該！」原來阿妹係講joey姐開紅館演唱會單野。
其實琴日joey姐助手Sandy姐已經打過比我，話joey姐安排左我做佢第四場嘅特別嘉賓，仲話遲啲joey姐會親自搵我講吓到時啲細節添，不過估唔到阿妹仲緊張過我。
「…自己買飛啦。」我冷淡回應。
「…咁易買到咩，大佬你話哂都係特別嘉賓吖，無理由幾張飛都攞唔到掛！」阿妹楚楚可憐咁款。
「…拿…我試吓架咋，唔一定攞到架。」見阿妹咁想睇，唯有應承左佢先啦。
沖完涼之後我攤左落床度，感覺好舒服、好輕鬆，好似好耐都冇依一種感覺，可能之前喺大陸實在太寂寞啦，返到離可以見到家人同愛人，真係有一種幸福嘅感覺。
無聊撳吓手機，社交平台忽然彈出左一段分享，睇吓先…係思敏分享比我嘅。標題大大隻字寫住「網紅大對決」相入面仲見到我同思敏之前做節目嘅截圖，另外再有兩對男女，我認得都係幾出名嘅網紅離，撳入去睇吓先。
唔撳由突子，一撳入去原來係一個網絡報章嘅娛樂專頁，報道介紹離緊一間廣州嘅網台，邀請左三對香港嘅網紅進行香港美食推介嘅大對決，仲呼籲網民投票支持，如果投中邊一隊勝出，仲有機會獨得十萬蚊現金獎。嘩…原來有獎金嘅唔怪之得個post出左幾個鐘已經有過萬個讚好啦，果然識宣傳，但係網民有獎金，咁我地嘉賓又有啲咩獎架？點解內文提都冇提過嘅？
「喂！聰哥！」因為有啲好奇，所以我打左比思敏。
「訓左未？」我問。
「…未呀，今日返夜，啱啱返到屋企冇幾耐咋嘛。」思敏回應。
「～哦！」我哦。
「…搵我有事？」思敏好溫柔咁問。
「…er…都算係嘅。」唔知點問好呢？
「…係咪關於「網紅大對決」呢？」思敏真係醒目。
就係咁，思敏唔洗我講就已經將所有野交代清楚哂比我知。原來個比賽過幾日就要進行，而且係有成隊攝製隊沿途跟住我哋，就好似running man咁，內容大致係要我哋喺最短嘅時間買到評判指定嘅食物返去，評分標準係以時間、食物質素作參考，不過我都唔洗知咁多啦，總之到時跟住思敏咪得囉。
「…思敏…你等等先…！」傾傾吓…詠恩竟然打離。
「…喂。」我接聽左。
「…你…傾緊電話？」詠恩聽得出。
「…er…係呀…你等等先。」我叫詠恩等等之後轉返過思敏果邊。
「…唔好意思呀，有啲公司野傾…」我有啲唔好意思咁講。
「…哦～唔緊要啦聰哥，咁你得閒有啲咩唔明先再搵我啦！」思敏好快就收咗線，緊隨其後嘅自然就係詠恩啦。
「…I am come back ！」我懶搞笑咁同詠恩講。
「…咁夜同邊個傾電話呀？」詠恩問。
「…er…！」死啦…點講好呢！
「…果個思敏？」詠恩問。
「…嘻嘻…係呀，啱啱問吓佢啲工事咋嘛，冇其他嘢架啦。」我老實作答。
「…我知吖…果個乜嘢網紅比賽吖嘛！」原來詠恩都見到，估唔到平時傻更更嘅佢，對住我啲野又會好似乜都知咁。
「…我知工作緊要，但係你可唔可以應承我，之後唔好同佢行得咁埋呀？」詠恩又離啦，估唔到佢會呷思敏醋呷得咁勁。
最後我都應承左詠恩，拍埋今次個節目之後，暫時都唔會再同思敏一齊拍野住。咁所以呢…之後果幾日我同詠恩都過得好開心，至於浠琳同電器鋪果方面，我都係唔敢再提。好快就離到「網紅大對決」嘅拍攝日子啦。一早我就揸車接埋住喺附近嘅思敏一齊出發去到拍攝地點旺角嘅某間酒店。拍好車之後，我哋上到去大會安排嘅酒店宴會廳入面。呢度一早已經佈置好哂，有好多工作人員喺度，睇離製作都唔野少。眼見有燈光師、幾隊攝影師、大會司儀同幾個好出名嘅食家評判，而且另外兩對網紅亦都到齊，化行妝整哂頭咁，相比之下我同思敏就比較簡單樸素，思敏化咗個淡妝，運動風褸同運動長褲，而我就連裝都冇化，一樣係全身運動look，希望唔會影響埋思敏啦。