中左六合彩頭獎四千八百萬，依家唔知點算?: 80
「…你已經到達香港西九龍站！」吖…訓左一陣，原來已經返到離香港架啦？高鐵真心方便，不過重慶凍到想死，冇乜野都係唔好再去啦…嘻嘻。
「…那時太快樂～～」落車無耐電話隨即響起。
「…喂！」我接聽左。
「…大佬！」係阿妹，叫到勁大聲，差啲連隔離都聽到咁濟。
「…耳膜穿啦！」我回應。
「…返到離未呀，好掛住你呀！」阿妹用嬌嗲聲問。
「…掛住我啲手信咋嘛！啱啱過左關依家行緊出站囉。」我一路四圍望一路講。
「…嘻嘻！兩樣都掛！」阿妹奸笑。
「…放心啦，買咗好多麻辣野比你呀，麻辣火鍋、麻辣麵、麻辣花生、麻辣汽水，總之乜麻辣都有呀。」我回應。
「…正呀喂！快啲返離啦，老豆喺樓下商場間酒樓訂左房同你洗塵呀，阿媽好掛住你呀，快啲飛的返離啦。」阿妹講完就好快收左線啦，其實我都好掛住佢哋架，唔知阿媽有冇瘦到呢？老豆又有冇晚晚捱夜呢？本來諗住坐港鐵，比阿妹話完之後我真係忍唔住最後係飛咗的士返去嘅。
返到去我就直接拉住個行李篋走上酒樓，老豆例牌訂左同一間vip 房。一推開房門就見到佢哋幾個坐哂喺度啦，好感動呀！
「…我返嚟啦！」我大叫讕係搞氣氛咁。
「大佬！」阿妹即刻衝左埋嚟攬住我。
「阿仔！」阿媽亦都企咗起身行左埋離。
「…返離就好啦。」而老竇呢…繼續坐咗喺張凳度面帶笑容。
我哋傾左好耐傾左好多野，聽老竇講，思敏老竇注資左落我地公司，同我哋公司簽左好多長期合約，加上協同效應令我地公司生意都增加左唔小，而家保守估計我地公司已經市值兩憶以上，思敏老竇仲話如果一年後我哋嘅市佔率同埋生意額可以上升20%以上，就可以嘗試申請上市喎，到時淨係收股息都唔知點計….哈哈！
見返屋企人真係好開心，我諗大家都好難想像到長時間見唔到家人果種孤獨嘅冷 ，比起重慶嘅雪更加冰冷，不過喺食完飯返到屋企之後，我更關心嘅…當然係詠恩啦。
「…嘟嘟～～」沖完涼，攤上床之後，我就即時打左比詠恩。
「…喂！」詠恩接聽左。
「…傻妹！掛唔掛住我呀？」我好興奮咁問。
「…哈哈…好掛呀，不過我係小苑囉！低能仔！哈哈！」頂…原來係小苑離，頂佢個制吖，比佢笑到我一戙都冇。
「…吖！乜原來你同我家姐好返拿？幾時結婚呀？」小苑繼續笑唔停，仲問埋哂啲無聊問題。
「…咪無聊啦，叫返詠恩離聽啦，阻頭阻勢！」我有啲唔耐煩咁講。
「…家姐沖緊涼呀，同我傾住先唔得架咩？」小苑回應。
「…咁難得喺屋企呀？唔洗溫仔咩？」我問。
「…你理得我吖。」小苑嬲嬲地回應，聽得出佢應該同條仔鬧緊交，加上佢平時多數都會喺佢條仔度訓，無啦啦喺屋企出現就一定係鬧交。
「…喂，咁浠琳係咪真係你個女呀？」小苑忽然醒起。
「…吓…我點知呀！」我緊係繼續扮唔知先啦，話左比你聽，萬一你走漏風聲仲得了嘅。
「…搞錯呀，你都同返家姐一齊啦，直接問佢咪得囉。」小苑回應。
「…痴線～每次提親浠琳或者浠琳在場你家姐都會變得神經質嘅，點敢問喎，你唔試吓問？」我反問。
「…嘻嘻～當我傻架咩…咪搞！」小苑即時卸膊。
「…但係你哋咁落去都唔係辦法架喎，避得一時唔避得一世，你地遲早都要結婚，浠琳嘅問題遲早都要交代清楚架喎。」小苑再講。
「…咁你有咩高見吖？」我問。
「…我覺得你應該要搵出家姐點解唔想喺你面前提起浠琳嘅原因！」小苑提出，其實我一直都有諗過呢個問我，但是難得可以同詠恩一齊返，我唔想有啲咩差池，所以我一直都選擇逃避。
「…咁你…有啲咩線索吖？」我再問。
「…線索就冇啦，不過奇怪嘅事就有啲。」小苑懶神秘咁講。
「…乜嘢奇怪事呢？願聞其詳喎！」其實我串緊小苑，不過佢好似唔多覺咁繼續講落去。
「…我發現家姐佢有個地方係從來都唔會去嘅。」小苑講。
「…咩地方咁神秘呀，百慕達三角州牙？」我繼續串串貢，唔知點解對住小苑，硬係啲態度都會
衰啲。
「…百你個死人頭呀，九唔搭八，正經啲啦。」小苑鬧爆我。
「…果個地方…就係屋企附近嘅果間大型連鎖電器鋪，」小苑講出。
「…電器舖？」我有啲疑惑。
「…係呀！次次我哋經過佢都好似有啲不安咁，阿媽入去睇野呢，佢都會用唔同嘅藉口走先，所以呢…我覺得呢個地方相當有嫌疑。」小苑最後作出總結。
同小苑講完一輪之後，個電話就交返比詠恩啦。同詠恩佢傾返好多野呀，傾得好開心，因為聽日詠恩放例假，所以我約咗佢出去行街。咁多年都冇同過詠恩去街喎，真係「～真的很興奮～」。我一早就整好個頭，換哂飲衫咁出動。中午左右，我就揸左我部車過去詠恩屋企樓下接佢，去到見詠恩未落到離我就坐左喺佢樓下大堂張梳化度等佢啦。
「…咁準時嘅！等左好耐牙？」等左幾分鐘詠恩就落到離。詠恩今日著左條黑色絲襪、黑色連身裙、再加一條灰色毛毛褸，嘩…黑絲誘惑正呀！
「…一陣咋嘛。」我回應。
「…想去邊度行呢？」詠恩微笑咁問。
「…er～肚唔肚餓呀，不如食啲野先囉？」我問。
「～ok …咁你想食乜？」詠恩再問，於是我就拖左佢去附近商場食越南野啦。
其實我又唔係真係咁想食越南野架咋，因為附近果間話自己「一個湯底的傳說」嘅舖頭我一向都不敢恭維。但係我今日志不在此，真正嘅目的就係越南餐廳樓上嘅連鎖電器鋪。琴晚聽完小苑講完之後，我諗左好耐，睇離唔親自望下都證實唔到小苑講嘅嘢到底係咪真。
食完野之後，我就借啲意話上上層去廁所。開頭詠恩都不以為意，但係當我去完廁所出離呢。詠恩竟然唔見咗喎！因為廁所門口正正就係電器舖所在位置，好多人都會企喺電器鋪門口等人，所以正常詠恩都應該會喺度等我，但依一刻佢竟然send左個whatapp過離話落返地下等。
「…做乜唔喺上面等嘅？」落到樓下之後我問詠恩。
「…上面冷氣勁吖嘛，走啦！」講完之後，詠恩就急急腳想拖我走啦。
「…咪住先，頭先見到上面電器鋪啲鬚刨做緊八折優惠呀，上去睇下囉？」我講。
「…吓！唔好啦…我地不如出銅鑼灣先啦。」詠恩有啲焦急。
「…點解嘅？」我有啲疑惑咁問。
「…出面一樣有呢間電器鋪姐，乖啦…聽我話…好唔好…？」見詠恩咁堅持又咁溫柔咁對我，我仲點敢同佢包咬頸吖，佢話點咪點囉。不過今次亦都可以證實到小苑果然冇吹水，電器舖真係有古怪，睇離搵日我都要一個人離查過究竟。
我哋出左銅鑼灣之後，詠恩買左好多野。不過同以前原全唔同，佢而家買嘅主要都係啲屋企野，小家電、日用品、小朋友野，呢次係我地一齊返之後第一次喺香港行街，雖然我感覺有小小尷尬，但詠恩都表現得好輕鬆自然，好多時仲會主動翹住我隻手，但係就唔會提返以前啲野，個感覺就係一對新嘅情侶咁，話題主要集中喺公司野同近期嘅自身野，雖然冇提以前，但我都覺得好開心，享受完美好時光之後，我送左詠恩返屋企。
去到詠恩屋企樓下果陣，本來我哋都仲傾得好開心，但係忽然…..
「媽咪！」就喺樓下同浠琳撞到正，而且連伯母都喺度。
「…！」詠恩即時縮開咗拖住我嘅嗰隻手，好緊張咁行左過浠琳果邊，而我只能夠慢慢咁跟隨其後。
「咁夜仲落街嘅？」詠恩率先發問，應該係想轉移視線。
「…婆婆話可以落公園玩一陣吖嘛！」浠琳回應。
「…聰哥哥！」之後向我揮手問好。
「…hi，浠琳！」我微笑回應。
「…你…不如走先啦。」詠恩擰轉頭，有啲不安咁叫我走先。
「…嗯！」我點一點頭回應，之後同浠琳、伯母係咁易打聲招呼之後，我就掉頭走左啦。
雖然又啲唔開心。但係只要係詠恩開心。我都會好配合。返到屋企之後，我接到一個電話。
「….喂！」我接聽左。
「…聰哥！你返左離拿？」係思敏，佢好興奮咁問。
「…係…係呀！哈哈…你又知嘅？」我尷尬反問。
「…頭先我同ivy去街吖嘛！」思敏回應，原來係阿妹講嘅。
「…有冇睇我地個YouTube Channel呀？」思敏再問。
「…er…望過吓囉。」我回應，其實係冇睇過嘅。
「…你覺得可唔可行呀？」思敏再問。
「…都…可以嘅…哈哈！」我根本唔知佢問緊乜，唯有老吹啦。
「…咁就好啦，咁我就開始籌備架啦。」思敏開心回應。
「…有啲咩要籌備呀？」我問。
「…嘻嘻！聰哥其實冇睇過？係咪呢？」思敏笑笑口踢爆左我。
「…哈哈…唔好意思…係呀。」我尷尬回應。
「…上集節目出左街之後呢，有個國內知名嘅綜藝節目監製搵左我哋呀。佢話有個真人show遊戲節目想邀請我哋兩個參與。」思敏回應。
「…吓…咩離架？」我有啲疑惑。
「…個節目係搵三對組合，喺香港唔同嘅地方搵一啲美食互相對壘。」思詳講解。
「…哦！」我回應，其實仲未消化到啲野。
「…ok…咁我覆實佢架啦。」思敏回應，之後我哋傾左一陣就收線訓覺啦。
第二日…我一早就起左身，點解咁早？因為要返工囉！不過唔係返電視台喎，而係返老豆舖頭。其實早兩日返離香港之後，我已經應承左老豆返去幫手架啦，而且今日我係會以太子爺嘅身份強勢回歸。因為老豆話東哥要去一間新開嘅分店度主持大局喎，咁所以呢…就升左mandy姐做店舖主管，而我呢就返去繼續做我嘅司機，順便睇住間舖喎。
我一早已經返到旺角舖，而家坐左喺舖頭主管間房入面同mandy姐傾緊啲工作協調。其實都係做樣架姐，所有野我都叫mandy姐決定返，唔洗理我，到啲人差唔多返哂工之後呢，mandy姐就出左去同大家briefing啦。而我就繼續留喺房入面，直至到mandy姐介紹我為止。
「…好啦，簡報講到呢度，最後要介紹一位新同事。今日開始大老闆個仔會離到我哋舖頭擔任副主管了解下舖頭嘅運作。」mandy姐講到呢度，大家都議論紛紛，仲好緊張咁。