中左六合彩頭獎四千八百萬，依家唔知點算?: 68陳詠恩內心世界(下)
終於喺我有左八個月果陣...
「...阿女...我有啲野想問你！」喺屋企食完飯之後，阿媽忽然同我講。
「...吓...做...做咩呀？」我緊張回應。
「...你埋離吖。」阿媽講，於是我就戰戰兢兢咁行埋去...點知。
「......！」阿媽忽然眼泛淚光，之後慢慢用手摸落我個肚度。
「...！」我想縮...但係又冇理由，唯有好無奈咁企左喺度。
「...幾多個月呀？」阿媽有啲緊張咁問。
「......！」依家到我眼泛淚光，淚水開始落下...粒聲唔出。
「...阿女...點解唔可以講比阿媽聽呀？」阿媽有小小激動，喊哂口咁問。
「...嗚～～」我忍唔住喊啦。
「...係咪有咩難言之隱呀？BB嘅爸爸呢？係邊個離架？」阿媽軟硬兼施不停追問。
「...嗚～你唔好逼我啦～嗚～」我繼續爆喊。
「...你係咪...比人性侵？」阿媽繼續追問。
「...～嗚...唔係呀～媽咪...你唔好再問啦～我求吓你啦。」我繼續堅持，
可能阿媽驚我身體負荷唔到又驚我BB有事啦，所以到最後佢都冇再追問。
幾經辛苦終於搞掂阿媽，阿爸方面就要靠阿媽啦，而且因爲依件事...
阿爸嬲左我一段時間，聽阿媽講...阿爸聽到依個消息果陣相當激動，
好似想殺人咁濟，但係無奈佢地根本唔知兌爸爸係邊個投訴無門，
直到BB出世之後，阿爸先肯同返我講野。阿女出世唔知係咪我比佢嘅營養唔夠啦，
所以得五磅幾實在偏輕。好彩有阿媽喺度咋，我咩都唔識...餵奶又唔識、
換片又唔識、幫阿女沖涼又唔識，如果冇阿媽我真係咩都處理唔到。
我搵相士幫阿女改左個名叫浠琳，我就順理成章叫阿女做張浠琳，
屋企人應該都諗到浠琳阿爸應該係性張，但係已成定局，所以佢地都冇再追問。
咁所以呢...好唔容易...終於都捱到浠琳七歲啦。
好彩阿爸一早供落間私人樓，所以住唔成問題，我一邊打工一邊照顧浠琳，
一直都生活得唔錯，直到果一日...果晚食完飯之後，我同浠琳落左超市買野，
到買完行緊返屋企果陣...
「...姨～姨～～」浠琳忽然大叫，然後跑左前去。
我望過去...原來係阿妹，阿妹啱啱喺一部好靚嘅黑紫色七人私家車度行落車，
而且隔離仲企左個男仔喺度...嘻嘻...唔通阿妹拍拖？
「...咦...浠琳！！點解你喺度嘅？你媽媽呢？」阿妹一手拖住左浠琳，
好疑惑咁周圍望緊，但係...點解個男仔...
當我越行越近，我就越發呆...因為車阿妹返離果個男仔...竟然...會係阿聰！
一個消失左七年嘅人。當時我好驚訝...唔知講咩好...阿聰主動同我打招呼，
我敷衍左兩句就轉身走左啦。當時我好亂...一時間消化唔到咁多野，
見返阿聰真係百感交集，一方面我好開心、一方面...我唔知點面對，
而且佢仲同...阿妹佢一齊，我應該點做好？如果佢真係同阿妹一齊左，
咁...唔得...我唔可以比依件事發生...，所以過左冇幾耐，有一晚...
我嚫阿妹一個人坐左喺廳度撳緊電話果陣，我行左埋去...
「...仲唔訓？」我問。
「...差唔多啦！」阿妹一邊撳電話一邊回應。
「...我有啲野想同你傾吓！」我好認真咁講。
「...講啦。」阿妹繼續好唔專心咁撳緊電話。
「...阿妹你唔可以同阿聰一齊架！」我坐左埋阿妹隔離，一手捉住阿妹手臂好緊張咁講。
「...點解呀！」阿妹反問，點解釋佢聽喎，真係激死人啦。
「...我...我...唔知點講比你知，總知你聽我講啦，
你唔好同阿聰佢一齊得唔得呀？」我好無奈眼泛淚光咁求阿妹！
「...er...你咪聽浠琳亂嗡啦，我邊有同阿聰一齊喎！」阿妹終於都肯聽啦。
「...真嘅？」我再問。
「...真架，我地只係普通朋友咋！」阿妹拍一拍我膊頭講，太好啦...真係鬆一口氣。
「...其實你同阿聰之間嘅事，我都略知一二嘅，但係...家姐你...
係咪有啲咩難言之隱吖？如果係嘅我可以同你分擔吓架！！」阿妹見我發呆，
忽然問返我轉頭，點講好呢...到最後...我都係冇講過任何野比佢知，
可能依個只能夠係我心底裡的秘密不能與人分享啦。
咁所以呢...又過左一段日子啦，雖然阿聰有搵過我問清楚，
但係我仲係未接受到佢嘅突然出現，我唔知點解浠琳會同阿聰有來往，
睇離又係阿妹做嘅好事，點都好啦...我繼續同阿聰保持距離...
我以為將所有事拖延就可以解決，可能依個係我性格啦...淨係識逃避，
但係估唔到我去小生屋企游水果陣竟然再一次撞到阿聰，而且佢仲...救左我一命添。
佢同我人工呼吸果陣，其實我係仲有知覺架，我感受到佢...好溫暖又好熟悉嘅感覺，
燃點返我對阿聰嘅果份愛意。
果次之後...其實我好想搵返佢架，但係又唔想佢同浠琳距離咁近，
其實我都唔知自己想點啦，總之就...順其自然啦。
日子繼續咁過，我每日繼續努力返工搵錢，希望比到浠琳好啲嘅生活，
但係好似做戲咁...阿聰突然喺我公司出現，而且仲話係我地嘅新同事添。
搞咩呀...阿聰明明係去左做明星架，之前仲睇過佢唱歌同拍嘅劇集，
點解又會忽然做左我同事架。點都好啦...見到佢果吓...其實我心入面有一種莫名其妙嘅喜悅感。
工作其間我儘量壓抑住自己，但係每日都同阿聰朝夕相對，我越離越控制唔到自己，
我好享受依一種生活，無奈始終都係仲有個心結仍未解開。
點知忽然有一日，公司竟然突然炒左我囉，話我串謀詐騙公司喎，
果吓我真係唔知咩事囉，我做所有野都係主管耀哥吩咐，我根本就咩都唔知道。
不過點都好啦，東家唔打咪打西家囉，走咪走囉...但係點知第二日，
阿聰忽然上左離屋企搵我，仲話佢都因為依件事都比人炒左添。點會咁架？
佢只不過係一個司機，公司點會連佢都炒埋架，可能佢平時喺公司同我太熟絡掛，
都係因為我...係我連累左佢，為左補償...阿聰話要喺度食飯...
之後仲話要我同佢一齊返公司搵單我都冇藉口推搪，咁所以呢...
最後我地返左公司個倉仲成功搵返一啲有耀哥簽名嘅記錄，點都好啦...
阿聰要我做嘅我都已經做哂，係時候要功成身退啦。阿聰車返我返離，
仲幫我一齊接埋浠琳返屋企添，雖然我依然係想浠琳同佢保持一定嘅距離，
但係紙係包唔住火，你越想咁做...我相信只係會得到反效果，
臨走果陣阿聰仲竟然叫我聽日記得返工添，佢都傻傻地架，你話我想返就返架啦咩，
人地炒左我唔通我仲搲爛塊面返去啦喎，我緊係冇聽佢講啦，依幾日依然係喺屋企量緊地，
間中上網睇吓有啲咩工可以去見吓，但係過左一星期之後嘅一個晚上，我忽然收到一個電話。
「...喂！」我接聽左。
「...阿恩！」竟然係mandy姐打比我。
「...mandy姐...做...做咩呀？」我有啲緊張，因為唔知係咪我走之前跟漏左啲咩，或者做錯左啲咩。
「...你...聽朝可唔可以返離呀？」mandy姐問，點解會問得咁怪嘅？
「吓...做...做咩呀？」我疑惑回應。
「...公司叫我搵返你返工呀！」mandy姐再講。
「...吓...！」我唔知講乜，點會咁突然架，雖然話我搵返啲單比阿聰姐，
之但係...咁都證明唔到唔關我事架，點解...？
「...你搵到野做？」mandy見我冇回應，所以再問。
「...唔...唔係！」我答。
「...咁咪得囉...公司知道單野唔關你事架啦，老細話會對你作出補償，有咩聽朝返離先講啦！」
mandy姐好急咁收左線，咁我...唯有聽日返去啦。
咁所以呢...到第二朝早，我就好早咁起左身去梳洗啦。今日係四月二十四日星期二，
比人炒左已經個幾星期啦。今日我聽mandy姐講準時返到去公司，
應該話係比平時更早返到公司，唔知點解呢...只係離開左依度一個星期多啲，
但係環境同感覺好似好唔同咁嘅？耀哥唔見左，而且連阿肥都唔喺度，
只係得個唔識嘅男人坐左喺主管果個位度睇緊啲文件，仲叫我自己坐低等一陣添，
唔通...依個就係老細？
過左冇耐...開始有人返離...第一個係mandy姐。
「...返左離啦阿恩！」mandy姐同我點一點頭，之後就行左埋個男人度秘傾緊。
「...hi，阿恩...點呀你？」第二個返離嘅係Yvonne，主動同我打招呼。
隔左冇耐，有第三個女仔出現，係一個後生女...應該廿零歲左右，眼大大...長頭髮幾靚女，
而且仲好似有啲熟口面咁，到底依個女仔邊個離架呢？
到差唔多夠鐘，阿聰終於都出現。佢個樣好似好攰好眼訓咁，
似係幾日冇好好訓過，到底發生咩事呢？
「...早呀！」阿聰走左埋離同我打招呼。
「...早...早晨！」我細聲回應。
「...歡迎你返離！」阿聰微笑咁講。
「...點...點解會咁嘅，果幾張單真係有用？」我細細聲喺阿聰耳邊問佢。
「...你話呢？」阿聰好輕佻咁回應，咁即係點姐又唔講...衰人！
「...好啦...大家都返齊啦嘛？」忽然...果個坐喺主管位嘅男人...好認真咁講喎，
於是全部人都停哂手口上嘅野聽佢講野啦。
「...好啦...喺開舖前有啲野想同大家正式交代返嘅。」男人開始講野。
「...相信喺依度大部分人都識我架啦，不過我都再介紹自己一次啦，
我係公司嘅總經理，你地可以叫我做阿東或者Leon，依家會暫時接管旺角舖主管嘅位置。」
原來依個男人就係老細嘅心腹東哥，仲以為係老細添。
「...之前公司發生左一件事，有人失職令公司蒙受損失。但係經調查後，
已經水落石出，成件事嘅始作俑者就係前主管阿耀，佢私通雲石枱公司，
已經承認一切，亦張全數公款歸還，而且仲作出左聲明，講哂成件事係佢一手策劃...
唔關其他員工事，部分聲明視頻我已經email左比各位，你地可以自己睇返，
最後...公司唔希望再有同類型事件發生，如果再有我地會報警處理。
咁仲有就係為今次事件，公司會對一啲員工作出表揚嘅！」東哥詳細解釋，但係...表揚啲咩呀？
「...陳詠恩！」吓...做乜叫我嘅？
「...係...！」我好驚咁行左出去。
「...張敬聰！」吓...阿聰都有份？
「...恩...之前公司怪錯左你，真係唔好意思...加上因為你同阿聰主動幫公司搵返果啲有力嘅證據，
咁所以公司為左獎勵你地，每人會得到旅遊禮券$8000蚊做獎勵！」吓...仲有獎？
東哥頒完獎比我同阿聰之後，就叫我地解散準備開舖啦。
咁所以呢...我又做返一個好平凡嘅文員啦。
好快就到左食飯時間，唔知點解呢...今日明明就唔係太多貨送架嘛，但係阿聰到點半都未返到離嘅？
因為我負責睇舖，而且公司琴晚先突然叫我返工，所以今日根本就冇帶飯，
其實我已經好肚餓架啦，但係又想等阿聰返離睇吓佢會唔會買野比我食喎。
我望住個鐘...一邊望一邊等，但係阿聰就係冇出現，最後等到點九...
我唯有死死氣咁煮個杯麵食啦。唔知點解呢...有一種莫名嘅不安，
點解我會有唔開心嘅感覺嘅？
「...哈哈...～」世事就係咁架啦，你一放棄喺度食杯麵，阿聰就即刻出現...而且...而且仲...
「...做乜食杯麵咁慘呀？」阿聰仲喺度挖苦我囉...衰人，
點解...點解佢會同果個女仔一齊返離架？仲有講有笑咁...睇見就無名火起...哼～
「...關你咩事姐！」我有啲惡咁話佢，之後就拎住個杯麵行左過pantry啦。
陳詠恩內心世界完。