中左六合彩頭獎四千八百萬，依家唔知點算?: 69
果晚之後...我再冇見過詠恩啦。雖然我叫左詠恩聽日返工嘅，但係佢就係冇再出現，
都啱嘅...公司都未有定案，我就咁叫佢返工的確係冇乜說服力嘅。
但係我冇放棄...除左同詠恩一齊搵到嘅貨單，我仲用左自己嘅方法去為詠恩洗脫罪名，
經過一個星期嘅時間，我已經有足夠嘅證據。我將所有證據交哂比老豆，
再叫東哥出面叫mandy姐搵返詠恩返工。就係咁...一個星期後詠恩真係返左離。
我叫東哥喺全部同事面前解釋清楚，仲自費買左啲旅遊禮券當係獎勵咁送比詠恩。
就係咁...所有野都回歸正常，我如常送貨...今日唔係太多貨送，
我十二點幾就送完，諗住返去搵詠恩食晏啦，點知...
「...嘟嘟～」電話忽然響起。
「...喂，邊位？」我用耳機接聽。
「...大佬！」原來係阿妹。
「...咩料呀？」我回應。
「...我唔記得帶銀包返工呀！」阿妹講。
「...點會架，出街三寶銀包、電話、鎖匙一定要帶架啦，冇帶你點返工呀？」我用說教嘅語氣問。
「...咁...我今日都係坐你車返離咋嘛，冇帶都返到工架，係...嘻嘻...冇錢食飯囉。」阿妹講出重點，
就係想搵我埋單，冇計啦...鬼叫我係佢好大佬咩，拍好部車就飛過去始創同個傻妹食飯啦。
係啦...唔記得講添，阿妹依幾日掉左過離旺角舖做實習呀，所以就會同我一齊返工囉，
不過公司入面啲人都唔知我地係兄妹嘅關係，只係會當我地係一般同事咁睇。
食完飯之後，我就同阿妹一齊行返去公司啦。返到去公司，
全部人都出哂去食飯未返離，唯獨係詠恩一個人，吖...係喎...
唔記得阿肥比人炒左之後得返詠恩一個喺度睇住個檔口添。
「...做乜食杯麵咁慘呀？」我行左埋去詠恩身邊笑笑口咁問。
「...關你咩事姐！」詠恩做咩咁惡呀，好似食左火藥咁嘅？
之後仲拎住個杯麵行左過pantry果邊添，我到底做錯左啲咩呢？
「...做咩事呀？」我跟左埋去細細聲問。
「...冇野呀，你繼續同人地傾計啦！」詠恩繼續用不爽嘅語氣細細聲講，
吓...乜原來...佢係呷阿妹醋？死啦...又唔可以話比佢知阿妹嘅真實身分，點算好呢！
「...邊有姐！」我無奈回應。
「...係咩...不過都唔關我事啦，你鍾意點咪點囉！」詠恩繼續挖苦我。
我唯有暫時走開，等詠恩啖氣下左先。但係阿妹唔知有心玩野定唔知道詠恩嘅存在啦，
下午我未出去送貨之前都會走埋離問我野，可能佢新離咩都唔知啦，
我又係佢大佬唔問我問邊個呢，之但係佢明知我地關係唔可以比人知就收斂吓啦，
依家搞到我兩邊不是人咁。
到放工果陣因為送貨遲左返離，返到上公司打咭詠恩已經走左，
唉...仲諗住搵佢解釋一下添，算啦...無計啦...唯有聽日再解釋下啦。
「...嘟嘟～」喺我諗住轉身走嘅時候，電話忽然響起，我望一望係阿妹，
頭先明明見到佢喺pantry行過架，再望望已經唔見左。
「...喂！」我聽左。
「...喂...大佬，我走得啦，等埋我呀！」阿妹好似做賊咁嘅聲，原來佢匿埋喺廁所打比我。
「...樓下seven等啦。」我細細聲回應，之後就單拖走左落樓下seven啦。
阿妹緊隨其後，我行入seven冇耐佢就已經行到落離啦。
於是我地就慢慢行過去始創停車場果邊攞車啦。
「...過左離旺角舖幾日，慣唔慣呀？」行緊果陣我問。
「...ok啦，都係做果啲野，不過冇左師父喺隔離點都差啲嘅。」阿妹回應。
「...你師父比得你一個過離實習就即係話對你有信心啦。
放心喎...有啲咩搞唔掂咪打比師父問囉。」我回應。
「...仲有呀，以後喺公司見到我，可唔可以唔好同我咁熟絡咁呀？」我再問。
「...有咩問題姐，啲人又唔知我地關係，咪當係普通同事交流囉。」阿妹回應。
「...咁比啲同事以為我地有野都唔好啦。」我尷尬回應。
「...車～咪由得佢地囉，就算佢地以為係都冇問題架！」阿妹用理所當然嘅語氣講，
但係有啲野就係咁邪架啦，喺阿妹講完依句說話唔夠半分鐘之後，
詠恩竟然喺我地面前出現。
佢喺奇華買完麵包行出離，咁啱就同我地迎頭相撞。
「......！」我唔知講咩好，詠恩亦都係一樣，我地對望左幾秒。
「...買麵包牙？」阿妹講左句超廢嘅廢話打開話題。
「...係...係呀，唔...唔阻你地啦...byebye！」詠恩好尷尬咁講完就急急腳走左啦。
「...唉～比你累死啦。」詠恩走左之後我有啲晦氣咁講。
「...咩喎！唔通大佬你見人靚女想追人？」阿妹十萬個為什麼咁，
原來佢根本唔知道果個就係詠恩，咁又係嘅...我根本就冇同佢講過詠恩喺我地公司做，
而且阿妹對上一次見詠恩都講緊七年前，果陣阿妹都係得十幾歲，
仲要見得果幾次唔認得都唔奇吖，早之就講定比阿妹知先啦，今次真係捉蟲啦。
「...唔係掛？果個就係恩姐？」上車之後，我將成件事講左比阿妹聽。
「...咪就係囉！」我無奈回應。
「...車～咁你唔早講，我點知姐...唔關我事囉！」阿妹想卸膊。
「...你話而家點收科啦。」我講。
「...見步行步囉，咁普通同事都可以一齊收工架姐！」阿妹仲講喎。
「...總之以後就收斂吓啦，喺公司冇咩唔好搵我啦。」我講。
就係咁，第二日返工阿妹真係收斂左，但係佢越避忌，比人嘅感覺就更加有古怪，
連平時唔多出聲嘅mandy姐都問我地搞乜野古古怪怪咁，
詠恩聽到mandy姐講亦都有好唔自然咁望一望我地，之後仲黑哂面咁冇同我講過野，
唉...我應該開心定唔開心呢，一方面覺得詠恩有呷阿妹醋好似好緊張我咁，
另一方面就緊係唔想詠恩繼續誤會我啦。
咁落去唔係辦法，於是過兩日星期六，四月廿八日，即係浠琳水運會大日子嘅當日，
我晨咁早就去到維園泳池迎接詠恩同浠琳佢地，希望可以同詠恩修補返啲關係。
企喺門口等左一陣，就見到學校旅遊巴開到，望住學生同家長一個跟一個慢慢落車，
咦～見到浠琳啦，跟喺浠琳後面嘅係詠恩，但係點解...詠恩佢隻腳趷吓趷吓咁嘅？
「...早晨！」我行左埋去浠琳佢地度。
「...聰哥哥！」浠琳好開心咁叫我。
「...吓！」詠恩望一望我，個樣有啲驚訝，可能佢都唔多記得我應承過離睇浠琳啦。
「...一齊架？」有個好似老師咁嘅人問詠恩。
「...嗯！」詠恩無奈點頭，就係咁...我就跟左佢地一齊入去啦。
原來維園個泳池唔同哂啦，係新起架...全室內，同我以前離果陣已經唔同哂。
一入到去學校就安排我地所有人排好，校長同我地所有家長、學生至詞...，
講解一吓今日嘅流程，派發一啲場刊比我地，之後就安排左坐位比我地坐啦。
學生就繼續排喺下面進行開幕儀式，即係每班舉住個牌果啲呢，
原來浠琳係佢果班嘅旗手離架，都係嘅...浠琳咁鬼高，
應該全級最高咁濟，唔係佢揸邊個揸。
「...你隻腳咩事呀？」坐低後我問詠恩。
「...冇事呀！」詠恩細聲回應。
「...趷吓趷吓都話冇野？」我再問。
「...你唔好理我啦。」詠恩再講，睇離佢好似仲嬲緊我。
「...你咁樣一陣點落去同浠琳游水喎！」我再講。
「...！」詠恩冇出聲...可能佢都知自己唔掂。
「...本身你就唔多識游水架啦，而家仲要整嚫埋隻腳，如果仲落去會好危險囉！」我再解釋佢聽。
「...最多咪唔游囉。」詠恩無奈回應。
「.....！」我冇再追問佢啦，大家deadair左一陣。
「...那時太快樂～」電話鈴聲忽然響起，因為我將個電話放左喺長櫈上面，
所以一響我同詠恩都同時望到，但係好衰唔衰...係最僵嘅時候打離嘅竟然係阿妹。