中左六合彩頭獎四千八百萬，依家唔知點算?: 63
「...同朋友去左食飯咋嘛！」我坐左喺飯枱果邊，一邊飲水一邊答。
「...女朋友牙？」老豆笑笑口問。
「...普通朋友咋！」我回應。
「...黃小姐？」老豆再問。
「...er...係！」我諗其中一餐都算係嘅！
「...咁仲唔去馬追人！？」老豆繼續笑笑口！
「...老豆呀，其實我地一齊過架啦，你唔記得左拿？」我無奈回應。
「...吓！有啲咁嘅事？」老豆有啲疑惑，搞錯呀佢咁都唔認得思敏。
「...老豆你舖頭開張果日我咪帶過佢上離公司囉！」我講。
「...你咁講...又好似有啲印象咁喎，乜果陣果個女仔係佢離架咩？」老豆認人真係好差，
完全唔認得思敏。但係諗落老豆之前都好似只係見過思敏一次，唔認得都唔出奇嘅。
「...係囉！」我無奈回應。
「...咁點解唔繼續一齊呀？黃小姐都幾靚女吖，身材又好...應該幾好生養架！」老豆講。
「...老豆你講左去邊呀！」我繼續無奈。
「...咁係吖嘛，唔講外表淨係對人有禮貌己經無得輸啦，而家都好小後生咁有禮貌啦，
加上又有啲家底，而家佢老豆間公司同我地公司開始多左好多生意來往啦，
如果你娶埋佢個女做老婆咁我地兩家人咪親上加親囉，依啲叫門當戶對呀仔！」老豆長篇大論。
「...老豆咪搞依啲政治婚姻啦，愛情嘅野老豆你都應該明架，
有時唔鍾意就係唔鍾意架啦，邊有得講架！」我回應。
「...咁牙...仔大仔世界啦，不過老豆就覺得可惜啲姐！」老豆有啲失望。
「...你都唔細架啦，都就離三張野啦，我好似你咁大果陣仔都生埋啦，
你都要加把勁先得架！」老豆你又知我冇，你唔比我都有個女架，不過...唔肯定！
「...得啦...我有目標架啦。」我回應。
「...係？點嘅樣架？幾大年紀架？身材呢？」老豆聽到之後勁興奮囉，係咁問問題。
「...得啦...得啦，追到我一定會帶佢返離比你過目一下，依家我要保護證人。」我講。
「...我驚等到我退休咋！」老豆回應。
「...對我咁冇信心架，你唔係成日話我好似你架咩，
又話一樣有對溝死女嘅眼架，咁睇死我牙！」我回應。
「...睇吓點！」老豆答得個樣好衰囉，瞇哂眼咁。
「...係喎，我今日見到阿妹喎，乜佢今日返工咩？」我問。
「...係呀，今日應該跟阿雄落旺角舖set場！」老豆回應。
「...阿雄係咪即係力王呀？」我有啲疑惑咁問。
「...咦～你又知嘅？你同佢有交流咩？」老豆問。
「...唔係...我聽到耀哥叫佢咋嘛！」我回應。
「...唉...講起果個阿耀....」老豆面有難色。
「...做咩呀？」我回應。
「...佢地旺角舖入左批（意大利雲石枱）！」老豆講。
「...今日聽同事講過吓...做咩呀？」我問。
「...衰左啦！頭先我同阿東咪落倉了解下囉，點知上到倉睇全批都係次貨，
啲料差到死，完全唔合格，都唔知點收科啦。」老豆有小小無奈。
「...好貴架？」我問。
「...唔係話好多錢，成批都係七八十萬姐，但係錢都唔係問題，
點都要有個交待架嘛，今次如果阿耀交待得唔好，一於成機抄q埋佢...一了百了！」
老豆手起刀落咁嘅手勢，睇離今次耀哥真係兇多吉少，點都好啦I don’t care。
同老豆傾完一輪之後都差唔多成點鐘啦，我返左入房灘左上張床度撳左陣電話！
睇吓先...嘩...原來facebook有成幾十個通知。再撳入去睇吓，
嘩...原來思敏將我頭先喺時代唱歌段片放左上我facebook專頁，
而且短短一個鐘左右，就已經有幾百個讚好同廿幾個留言。
「聽幾多次都咁正！」carki chu留言。
「...等到頸都長，幾時有新歌？」Tracy leung 留言。
估唔到真係仲有人等緊我出新歌，搞到我有啲唔好意思添。
其實我都真係好想出架，但係依排真你發生左太多事啦，
先係我老豆單野...之後就係詠恩嘅出現，仲有浠琳嘅身世...所以...我嘅作品一拖再拖囉...，
今日知道原來仲有人為左睇我...唔係...應該係聽我嘅作品，苦苦等待...，我真係有啲受寵若驚添。
我應承你地...就算點慢都好...我都會完成我本...應該係完成我嘅新歌，大家拭目以待啦。
好快又到左第二日啦，今日係2018年4月8日，我如常揸住我部車返到去始創泊低，
再行返去公司。一返到公司就見到耀哥一反常態地好勤力咁喺度做緊野，
其他人都未返到離佢就好快手咁執左啲單叫我自己去倉搞啦。
可能佢知自己衰左要將功補過啦，不過都唔關我事，我都係輕輕鬆鬆繼續送我嘅貨把啦。
因為今早嘅貨唔係好多，所以我十二點幾就送哂，返到公司準備等食飯啦。
一入到去如常係有啲客喺度睇緊野，個個都好忙咁款，於是我就自己行返埋我果個位度撳吓電話啦。
諗吓一陣食咩都好喎，不如問吓詠恩想食咩先，...咦....望離望去都唔見詠恩嘅，唔通過左倉度？
但係我頭先返到離行左上倉放低啲野架喎，都唔見有人...唔通詠恩病左冇返工？
「...早晨呀Yvonne。」睇見Yvonne啱啱得閒行返埋個位度，所以我走左埋去。
「...食晏都離緊啦喎...仔，仲早晨！」Yvonne一邊撳電腦一邊應我。
「...係呢，吖...間舖好似小左個人咁嘅？」我好婉轉咁講。
「...唔好問啦，做好自己野就得。」但係Yvonne變得面有難色，好似發生左啲咩事咁嘅？
最後...我都真係問唔到原因，詠恩就好似突然人間蒸發左咁。
耿耿於懷嘅我，收工之後即刻揸左部車去觀塘總公司度問過究竟。
因為都係旁晚六點幾，所以我上到去果陣，總公司仲係營業當中。
「...叮噹～」我撳門鐘。
「...擦...！」係Elaine開門，唔知大家仲記唔記得Elaine，
佢應該係我老豆嘅秘書，三十零歲留有一把長直啡嘅秀髮嘅成熟靚女。
「...咦...細張生？」佢今次認得我啦。
「...係呀，東哥喺唔喺度呀？」我問。
「...東哥啱啱落左街，一陣返上離架啦。」Elaine回應。
「...咁牙，我坐低等佢啦。」我一邊行入舖一邊講。
「...大張生喺度喎，你唔入去搵佢牙？」Elaine再問。
「...吓，佢喺度？」我有啲驚訝。
「...係呀，喺房咋嘛！」Elaine指一指老細房門。
「...哦，唔該。」我講完唔該就行左埋去啦，估唔到老豆竟然喺度，仲以為佢又出左去傾野添。
「...咯咯～～」我敲門。
「...入離啦。」老豆回應。
「...擦！」
「...喂，搞緊咩呀？」我笑笑口講。
「...聰！做乜咁好死上離搵老豆嘅？」老豆面帶笑容問。
「...冇呀，咁啱經過咋嘛！」吹得我吖...平時又唔會經過囉....！
「...你阿媽今晚應該冇煮飯架喎，食左飯未呀？」老豆望一望隻錶問。
「...未喎。」一收工就仆過離啦，邊有時間食呢。
「...一齊落去食啲野先啦，阿東啱啱落去買外賣，等我打一打比佢叫佢轉堂食先。」
就係咁...老豆打左個電話比東哥，之後我地兩個就一齊行左落去樓下成業街嘅一間餐廳度啦。
「...有啲咩事呀聰仔？講啦...冇事你唔會無啦啦搵我地嘅！」等緊野食期間，
東哥忽然開口問，可能我之前都係有事先搵佢啦，比佢估到哂我想點添。