中左六合彩頭獎四千八百萬，依家唔知點算?: 62
「....嘟嘟～」諗完當然係即時打返個電話比久違了嘅老大啦。
距離上次搵老大都過咗一段時間，老大今次點都得閒啦掛？
再唔得閒我諗我真係要好似以前細個讀書果陣啲黑社會去警察學院接佢放學架啦。
「...喂...謝霆聰！」接聽嘅係老大。
「...喂...老大，最近咩景況呀？」我懶風騷咁打開話題。
「...都係咁啦！」老大hea左我。
「...啱啦，我正想搵你！」搵我？唔通有消息？
「...係...點呢？」我講。
「...我打過返館問啲手足架啦，佢地話係有份親子鑒定公司嘅郵件寄左離，
放左喺我枱頭，咁我聽日會出班，之後會返館處理返小小文件野，到時拎返份報告比你啦！」
老大解釋得好詳細，睇離終於都可以解開浠琳身世之謎啦！
就係咁，老大約左我聽晚喺上水警察宿舍，即係佢屋企食飯，順便交返份報告比我。
唉～搞左咁耐終於都搞掂啦，希望今次唔好係詐糊啦。
「...～不許你注定一人～」揸緊車塞緊香港仔隧道果陣，忽然電話響起。
「...喂！」我用耳機接聽左。
「...聰哥！喺邊呀？」係一把女仔聲。
「...你係？」把聲好熟。
「...思敏呀！」哦...原來係思敏。
「...我喺香港仔隧道塞緊車囉，做咩呀？」我回應。
「...得閒嘛？」
「...而家？」我問。
「...係呀，食左飯未呀？」思敏再問。
「...er...頭先早小小果陣食左。」我回應。
「...係牙...」思敏有啲失望咁。
「...其實可以再食嘅，邊度呀？」係喎之前應承左同佢拍個唔知咩飲食節目架喎！
「...好呀，我地個節目嘅頭一集，我想去試吓銅鑼灣一間好出名嘅拉麵店呀！
你依家過離啦，我喺附近行緊街。」思敏開心回應，就係咁...塞完隧道之後，
我揸左落銅鑼灣時代廣場停車場。行到出門口，思敏已經企左喺時代門口嘅空地度我緊我啦。
「...聰哥！離左拿！」思敏見到我行緊埋去。
「...係呀，睇緊咩呀？」我問，因為思敏附近聚左唔小人圍住喺度。
「有人Busking緊呀！」思敏回應，原來大家圍埋就係睇緊人唱歌，
係一個唔識嘅女素人，大約廿歲頭，好似大學生果類型，一條女一枝結他、
一個擴音，真係好佩服佢可以一個人係咁多人面前唱。
「...thank you ！」少女啱啱唱完！
「.....啪啪～～！」路人拍手，我同思敏亦都唔例外！
「...𠵱～喂！係你！」少女忽然望住左我，個樣仲要好驚訝咁款，到底咩事呢？
「...係咪張敬聰呀？」原來少女認得我？唔係掛...我啲咁嘅二打六佢都認得！
「...hello！」我有啲尷尬咁打左個招呼！
「...我好鍾意你首主題曲架，不如出離唱返首啦！」少女相當熱情，
其他路人都開始將注意力轉向我度，有啲仲咬耳仔咁問我係邊個，搞到我唔知點好！
「...好呀！」幾秒之後我讕係輕鬆咁回應左佢，大佬我假假地都係一個攞過新人獎嘅歌手吖，
無理由比個素人大到而唔敢出去架嘛，死都要頂硬上架啦。
「...我幫你伴奏啦，你唱開咩key！」少女問我。
「...冇譜你識彈架拿？」我問。
「...你依首我有玩過吓，大約都記得嘅！」少女回應，估唔到真係有人會留意我啲歌。
「...哦！試吓c key啦，前奏加多幾個bar落去應該會好聽啲！」就係咁，
我同少女溝通左一陣，我地嘅表演就開始啦。
「...one...two...one,two,there,four .....」其實都有一段時間無唱啦，
好彩都仲保持到水準。唱緊果陣都唔係咁敢望住途人嘅目光，唯有望住思敏唱啦。
由頭到尾思敏都係拎住部手機對住我，我將視線集中喺電話鏡頭度，
途人啲樣本來都好似唔多識我咁，但係一開口唱，啲人即時好似如夢初醒咁款，
睇吓電視劇嘅威力係幾咁強大，三分幾鐘嘅一首歌，出奇地感覺好快就過去，
由一開始驚到最後我開始有小小享受添。
「...thank you ！」終於都唱完啦。
「...啪啪～～」思敏帶頭拍手，途人好快跟隨。
「...多謝哂張敬聰！係呢...好耐冇聽過你有新歌啦喎，幾時再派歌先？」少女問。
「...er...哈哈...快架啦！」其實我自己都唔知，就係咁...唱完我就行返埋去思敏度啦。
「...影完未呀？」我講，因為思敏仲係揸住部電話對住我。
「...直播緊吖嘛，同各位觀眾打聲招呼先啦！」吓...又離，
我再次敷衍式對住個電話揮左幾野手之後，思敏終於都肯放低個電話。
思敏帶住我穿過金朝陽後巷去到燈籠街，銅鑼灣最多隱世食店嘅一條小街。
思敏帶住我步入左其中一間拉麵店。講吓間舖先，其實都幾大間吓，
而且好光猛唔似一般嘅拉麵店咁暗，門口塊玻璃仲要大大隻字寫住
（世界第一碗米之蓮一星拉麵）好似大有來頭咁款。
「...唔該！訂左兩位姓黃嘅！」思敏對住一個店員講。
「...黃小姐！兩位！吖...見到，兩位依邊吖！」女店員望一望電腦搵左陣
，之後就帶左我地去一張雙人枱度！
「...唔該！」思敏禮貌回應，因為一坐低女店員就比左兩個餐牌我地！
我望住個餐牌真係花多眼亂，都唔知揀咩好，再望真啲...啲野食都唔平喎，
最平碗拉麵都百幾蚊起錶。
「...聰哥，不如等我發板？」恩敏不愧係思敏，知道哂我嘅性格。
就係咁...我將個波交返比思敏，我只要坐喺度等食就得啦。
「...係呢，uncle公司單生意搞成點呀？」等緊果陣思敏一邊飲住杯綠茶一邊問我。
「...哦，搞掂哂啦...準時交到貨，早兩日仲收埋啲尾數添，
上次都未多謝你，依餐唔好同我爭呀！」我回應。
「...咁咪好囉，係呢...唱片公司果邊又點呀？」思敏再問。
「...er...都係未有消息！」我回應。
「...仲未有牙...」思敏有啲失望。
「...唔緊要啦，聰哥你唱歌咁好聽等多陣一定有消息嘅！」思敏面帶笑容講。
「...我冇野喎，依家返左老豆舖頭度幫手，都叫做有啲野撈吓架！」我輕鬆回應。
就係咁...同思敏傾左無幾耐啲野食就離左，講真...其實啲拉麵都幾好食嘅，
但係其實我覺得間間貴拉麵都差唔多架啦，都真係唔識點分，
思敏就開住部機，邊食邊比評語，我就係咁點頭，總之思敏講乜我只係和應就算，
啲觀眾唔知會唔會覺得我好hea呢？
食完之後，我車左思敏返屋企，返到自己屋企都差唔多十二點啦。
阿妹同阿媽己經訓左，老豆就喺浴室沖緊涼，睇個勢都係早我小小返到。
咁我就返返入自己房沖涼梳洗，搞掂哂出返離feel到有小小口乾，所以行左去廚房倒杯水飲。
「...咁夜嘅仔，公司應該唔洗ot架喎！」老豆坐左喺梳化度一手拎住個電視遙控望一望我講。