中左六合彩頭獎四千八百萬，依家唔知點算?: 64
「...嘻嘻...冇呀，想問吓旺角舖果度今日發生過咩事姐。」我單刀直入。
「...係喎！今日上去果陣聰仔你好似出左去送貨。」東哥諗一諗之後講。
「你上過離咩？」我有啲驚訝咁問東哥。
「...意大利雲石枱果單野吖嘛，志哥應該講過你知架。」東哥講。
「...都...都有聽過吓嘅，...但係...！」我講到一半停左。
「...咩呀？」老豆問。
「...但係老豆你唔係話會搞掂耀哥架咩，點解....！」我望住老豆好迷茫咁問。
「...阿耀隻老狐狸，估唔到佢早有準備，今朝阿東上去同佢問責果陣，
條友竟然將所有野推哂落個跟單度，搞到阿東都冇佢符，最後炒左個跟單了事。」老豆講。
「...吓...你炒左佢？」我有啲激動咁講
「.....！」搞到東哥同老豆都呆左一呆。
「...做...做咩咁激動呀聰仔？今次搞唔掂佢下次再有機會嘅。」東哥講。
「...你地根本都唔明...！」我有啲想喊咁黑哂面...頭耷耷咁講，
大佬依個係我唯一可以見到詠恩嘅機會，你地炒左佢...咁我點算？
「...做...做咩事呀？」老豆有啲驚咁問。
「...冇...冇野！」我定一定神之後回應。
「...個女跟單...你同佢好熟架？」東哥好似開始feel到我咩事咁。
「...係跟單離架咩？」老豆問東哥，原來老豆連炒左個咩人都唔知。
「...女跟單離架，廿幾歲後生女離。」東哥回應老豆。
「...聰...唔會係你琴晚講果個？」老豆都估到啦。
「.....！」我繼續唔出聲。
依個時候...所有人都冇聲出啦，全部耷低頭食野，都唔知講咩好。
「...耀哥憑咩話係個女跟單錯呀？」食食吓我又問，因為真係想知道多啲野。
「...！」東哥同老豆對望左一眼。
「...果啲買賣文件，全部都係個女仔簽名，加上阿耀話個供應商係佢搵返離，
收貨果陣又係個女仔自己簽收，咁好難話唔係佢做架嘛。」東哥解釋。
「...咁...咁大單野，點會係一個小職員自己可以話到事架姐！」我講。
「...依層我地都知，所以阿耀都難辭其咎，佢一樣唔會甩到身，
文件同樣都有佢嘅簽名。」東哥講。
「...咁個女仔呢？」我再問。
「...個女仔咩呀？」東哥有啲疑惑咁問。
「...點先冇事囉？」我問。
「...吓...！都炒左啦，仲可以點？」東哥無奈回應。
「...唔炒得唔得呀？」我再問。
「...佢證據確鑿好難留佢喺度架喎，
如果真係留...其他人會點睇啦。」東哥解釋。
「.....！」我都唔知講咩好。
「...除非...」東哥欲言又止。
「...除非咩呀？」我問。
「...除非佢搵到證據證明唔關佢事啦。」東哥講。
「...吓，點為止證據呀？」我面有難色咁再問。
「...er...例如有人見到係阿耀叫個女仔簽名，或者一啲阿耀同供應商連絡嘅證明咁囉。」東哥諗緊。
「...咁好難架喎，睇cctv得唔得？」我講。
「...依個係其中一個方法，不過你都唔好抱咁大期望，阿耀叫得佢簽，
可能已經揀定哂啲cctv盲點位搞。」東哥再講。
「咩方法都要試架啦。」我回應，就係咁...我當晚就返左上寫字樓睇cctv啦。
因為公司嘅cctv系統係連結網路嘅，所以喺我老豆房嘅電腦就可以隨時登入翻查。
老豆話入貨嘅野一向都係阿耀負責，但係根據Yvonne 嘅口供，
第一個接觸依個供應商嘅人係詠恩，之後再交左比阿耀洽談。
我睇左成晚cctv結果同老豆佢地講嘅一樣，一啲野都影唔到，
收貨果陣啲枱全部都係包住，cctv只見到詠恩驗收果陣係完成冇打開過啲貨離睇。
而全程都唔見耀哥嘅蹤影。唔通依件事就咁不了了之？咁仲有天理嘅？
我張敬聰要以爺爺張田一嘅名義起誓，一定要還詠恩一個公道。
一星期後...
話雖如此，眨吓眼就已經過左一個禮拜啦。依個禮拜公司都好平靜。
耀哥雖然仲喺度，但權力已經比人架空左，老豆派左東哥暫時接管旺角舖，
其他人都安守本份唔敢多說話。公司就陷入一片死寂。公司冇左詠恩喺度，
我每日返工就好似行屍走肉咁。
今日都係一樣，朝早我如常返工送貨，食完午飯後...因為冇貨送，
所以得閒冇野做幫手車阿mandy姐去佢個客度。
「...喂...唔該哂呀聰。」mandy一上車就講。
「...客咩氣呀，老細叫到我照做架姐。」我笑笑口回應。
「...去邊呀mandy姐。」我問。
「...去香港仔。」mandy姐回應。
今次係我第一次同mandy姐獨處，自從詠恩比人炒左之後，
好多野mandy姐都要自己跟返冇人幫手，所以平時喺公司真係冇幾何見到佢。
今日嘅mandy姐依舊匆忙，一上車就不斷睇文件，再唔係就同客講電話，
差唔多搞左廿分鐘先可以安靜落離。
「...咁頻能呀？」我講。
「...咩話？」mandy姐聽唔明我講咩！
「...我話...你都幾忙喎！」我解釋。
「...冇計啦，冇左個幫手咪要一手一腳囉！」mandy姐無奈回應。
「...。點解唔叫東哥請返個人幫你手呀？」我問。
「...遲啲先啦，公司而家「六國大封相」你睇唔到架咩？況且我都唔鍾意求人嘅！」mandy姐回應。
「...其實詠恩衰咩姐？」我扮唔知。
「...衰聽話囉，一啲安全意識都冇。」mandy姐回應。
「...即係咩呢？」我繼續扮咩都唔知。
「...依度講依度散啦，前排公司入左批雲石枱，根本個供應商就係阿耀啲親戚離嘅，
個傻妹又比阿耀點左去收貨，阿耀叫佢唔洗開離驗收佢又跟到足。」mandy姐語重心長咁回應。
「...你點知呀？」我問，無理由我睇左cctv佢仲清楚過我架？
「...果日咁啱我喺度吖嘛，聽住阿耀喺舖頭打電話遙控阿恩去收貨嘅。
我聽到都覺得怪啦，點會阿耀自己唔去收貨搵阿恩去收架，
仲要唔洗驗收？擺明一早安排好架啦，咁橋真係全部變哂次貨？阿耀今舖都算得幾盡吓。」
mandy姐有感而發講左勁多野。
「...咁都唔炒佢，反而炒詠恩？」我問。
「...傻仔，我講架姐，邊度有證據先得架，況且阿耀都應該會自動辭職架啦，
搞咁大壇野，應該鋪好晒路，或者收左人唔小回佣。不過阿恩又慘啲嘅，
無啦啦做咗替死鬼，仲要比人扣哂啲糧。」mandy姐繼續分析。
就係咁，同mandy姐傾到咁上下就到左香港仔放低佢啦。
之後見冇咩做就喺香港仔中心食左個下午茶。食緊果陣我繼續諗...
點先可以幫詠恩平反，諗吓諗吓...咦...係喎，對面就係詠恩屋企，
我決定要上去搵詠恩。
其實我依個決定都離得幾衝動吓，一來唔知佢屋企有咩人喺度，
二來唔知詠恩見到我會有咩反應。但係點都好啦，我都已經上左去，
而家喺佢屋企門口嘅後樓梯度打量緊。因為今日樓下保安蓮姐喺度，
所以我好輕易就入到離，但係入左離之後有淆淆地底添，點算好呢！