中左六合彩頭獎四千八百萬，依家唔知點算?: 57
就係咁...詠恩足足喊左三分鐘，好彩貨倉門口冇其他人喺度，如果唔係都唔知點算好。
好耐都未同詠恩有過咁親密嘅接觸，我感覺到我心跳得好快，塊面亦都紅哂，
不過我都唔會乘人之危，等詠恩稍為冷靜返啲之後，我輕輕咁推開左詠恩小小，
詠恩亦都退後左兩步。
「...冇事嘅...冇事嘅，條鎖匙除左你有之外仲有咩人有架？」我微笑咁問詠恩。
「...耀...耀哥！」詠恩楚楚可憐咁講。
「問耀哥攞囉！」我講。
「...唔得架，耀哥一向都唔鍾意我，再衰佢實炒我架！」詠恩緊張回應。
「...咁...仲有啲咩人會有？」我再問。
「...唔...唔知呀，我諗寫字樓會有掛！」詠恩諗一諗之後講。
「...咁一係去寫字樓攞囉！」我再講。
「...驚動到寫字樓啲老細咪仲死得快！！！」詠恩更加緊張。
「...咁樣...樣！」我諗緊。
「...吖～依度好焗，我地落一落樓下先再諗啦？」我建議落一落樓，
之後就推左詠恩入𨋢一齊落左樓下啦。
落到樓下...我叫詠恩喺對面公園坐一坐，而我就話要去一去廁所，鼠走咗。
「...嘟嘟～」我緊係鼠咗去打電話搵救兵啦。
「...喂！」
「...喂，東哥！」我大叫。
「...聰仔？咩事呀？」東哥問。
「...唔好講咁多野，喺唔喺公司先？」我好急咁問。
「...喺！做乜事呀？」東哥疑惑回應。
就係咁，我叫東哥拎倉條鎖匙，即時飛車落離比我。
東哥開頭都有問咩事嘅，我咪吹水話自己整唔見左條倉鎖匙費是搞大件事囉！
不負所望，東哥廿分鐘左右就飛到落離，交底條匙比我之後，
我就即時過返公園搵詠恩，捉佢上返個倉度啦。
「...做...做咩呀？算...算啦，我一陣返過去同耀哥辭職算啦，
費是連累埋你啦。」去到倉門口，詠恩好灰咁講。
「...嚓～」而我就冇理到佢，好快手咁打開左倉門。
「...吓...點...點解？」詠恩成個呆哂，完全唔知到底發生緊乜野事。
「...緊係好野啦，袋返佢啦！」我好型仔咁開完度門，
就將條鎖匙隊左比詠恩，之後好快咁行左入個倉入面。
「...喂！！！點...點解？」詠恩仲係成面問號咁跟住入離，喺我身後不停咁問。
「...唔好問咁多住，快快趣趣搞掂啲貨比我，之後返過去報到啦！」我微笑回應。
就係咁...詠恩暫時冇再問我，手快快咁講左大約流程，同有邊啲貨要送，
我地兩個夾手夾角，唔係...係夾手夾腳將啲貨推哂落樓，詠恩幫我睇住啲貨，
我將部車兜左過離倉樓下之後，我就推左詠恩走啦。
至於第一日嘅工作呢，基本上送貨都係大同小異架啦，主要派嘅係客人訂嘅特別傢私，
仲有啲單係送啲裝修嘅材料同工具比我地公司嘅裝修師傅...諸如此類，送貨嘅時間過得好快，
輕輕鬆鬆又一日，同我做歌手果陣真係差好遠。
下午五點鐘左右我就派哂手頭上嘅單，返到旺角泊好部車再施施然咁行返上旺角舖。
一入到去，見到有兩、三個客喺度，Yvonne 忙於處理客人，耀哥依然坐左喺佢個龍坐度，
好似全日都冇郁過咁款，果個阿肥呢...就唔知去q左邊，而詠恩呢...就撳緊電腦，
應該幫Yvonne check 緊野，於是我就走左埋去詠恩度放低左果疊送貨單喺詠恩枱面。
詠恩抬頭望一望我，但係因為忙緊，所以冇理到我繼續撳電腦，
於是我就一個人行左去pantry 果邊洗個面，飲杯水、再坐低休息一下。
hea左廿零分鐘，望一望個鐘...咦...喂，差唔多六點啦喎，
諗諗吓我都唔記得左其實自己係收幾點，點算呢？
「...仲...仲唔走？」說時遲 那時快，詠恩忽然行左入離pantry斟水。
「...我都唔知幾點收工！」我坐左喺張櫈度，揸住杯水回應。
「...之前啲司機都係送完返離就走得架啦。」詠恩側身對住我，一邊斟水一邊講。
「...係牙...咁你呢？」我諗一諗之後問。
「...我...咩呀？」詠恩冇望過離，只係冇乜語氣咁回應。
「...你收幾點？」我再問。
「...關...關你咩事姐！」詠恩有小小緊張口窒回應。
「...問吓姐，咁我走啦！」我都無謂逼得佢咁緊啦，
就係咁...我答完詠恩，同耀哥講聲之後就走左啦。
估唔到第一日返工會咁輕鬆，更估唔到嘅係，詠恩竟然會喺我老豆間公司度做，
而家諗返之前同佢地食飯果陣，小生話詠恩喺旺角返工，原來就係依度，唔通真係緣份？
返到屋企之後都冇乜特別，老豆照舊忙到冇返離食飯，食完飯沖完涼之後，
我就返入房玩陣結他，同fan page嘅fans互動一下。雖然比人雪左，
但係起馬都仲有小小fans關注，啱啱自彈自唱完首歌放上去，
轉個頭就有幾十個（讚好）同幾個留言啦。
睇吓先...啲留言多數都係叫我加油！
「敬聰幾時有新歌出？」其中一個留言kari kwok。
「咁耐冇見你有活動嘅？」其中一個留言Esther yu 。
「唔好放棄呀，絕對支持你！」其中一個留言，點解佢會叫我唔好放棄嘅，唔通佢知道我比人雪嘅事？
睇睇個名，咦....fafa wong，原來係思敏離，可能阿妹講左比佢知我比人雪單野啦
，一直都冇留意思敏喺我個fan page度添，但係諗諗吓，個fan page開果陣我仲同緊思敏一齊，
佢喺度又好正常喎！
手多撳左入去睇吓思敏嘅近況，咦...
「放假咁好天今日唔上山，下水lu。游完水食好D先！」係思敏今日嘅一個新post，
張相上下分半，上面影住思敏屋企會所個泳池，下面張相就影住一份all daybreakfast。
哦～原來思敏今日放假，唔怪得咁得閒啦。
「...咁豐富呀！」我留言。
過左一分鐘之後.....
「嘟～」電話訊息聲響起。
「...ok架，間野幾好食，下次帶你去試吓！」原來思敏咁快覆左我個留言。
「...ok！」我覆左個ok比佢，我地嘅對話就去到依度，放低電話之後我亦都好快訓著左。
第二日，我照常返工，坐港鐵落到旺角站，睇睇隻錶先，咦...早左喎，
原來先九點鐘，早左成個鐘頭，雖然我一向都冇食早餐嘅習慣，
但係咁多時間緊係去食個早餐先啦，於是我就走左去附近嘅美心快餐度嘆返個早餐先。
「...唔該，滑蛋、吉豬，凍奶茶！」叫完野食，排隊攞埋個餐，我就揀左個近門口嘅靚位坐低左。
今次仲唔到我嘆，不過美心都係差啲，本人都係覺得大家樂係幾間連鎖快餐店最好食嘅，
由其係個深海魚柳，真係魚有魚味，可惜公司樓下最近就係美心。
坐喺門口，睇盡人生百態，有啲人匆匆忙忙咁買完個外賣早餐就急急腳咁走，
有啲就好似我咁食埋先返工，仲有啲阿公、阿婆喺度享受人生，
食到咁上下仲見到公司個阿肥添，見佢都係買完外賣就匆匆忙忙咁走左去，
而且仲買左兩個早餐，唔知幫邊個買。
到食完份早餐，嘆緊杯茶準備走果陣，竟然見到...詠恩。