中左六合彩頭獎四千八百萬，依家唔知點算?: 58
詠恩同其他人一樣，好匆忙咁行左入離，企左喺門口收銀櫃臺前，
睇食乜野果個位度上下打量緊啲食物，不過見詠恩開始想抄個手袋攞錢果陣，
搞左勁耐都抄唔到咁款，我再睇睇隻錶，差唔多夠鐘，加上而家排隊買野嘅人龍都唔小，
買完再等攞野基本上遲緊到，所以見詠恩望一望好快就放棄左，急急腳咁又走返出門口，
而我亦都大啖飲埋杯茶，緊隨其後...釣住詠恩尾一齊返去。
「...早晨！」入𨋢果陣我見得我同詠恩兩個，所我主動打招呼。
「...早！」詠恩依然keep住佢果個發夢神情，
同未訓醒嘅聲線回應，應完之後繼續dup返低個頭。
返到去已經九點十一，時間啱啱好，所有人都返哂離，各自坐左喺自己個位度，
耀哥同阿肥兩個都坐左喺度食緊早餐，哦...原來頭先阿肥個早餐係買比耀哥嘅！
Yvonne 就撳緊電腦，於是詠恩都拿拿臨走返埋自己個位度，而家亦都坐返喺位。
「...做...做咩事？」詠恩有啲緊張咁擰左個頭後離問我，因為無幾耐我就行左埋去佢個位後面。
「...冇呀，睇吓今日有咩送咋嘛？」我一邊望住個mon一邊回應，
嘻嘻...其實詠恩未擰過離之前我係望住佢多啲嘅。
「...er...拿，荔枝角、荃灣、葵涌、沙田...！」詠恩擰開左小小，比個mon我睇。
「...得四單？」我疑惑回應，因為琴日有成十單野。
「...er...今朝係得咁多，有啲要下晝先有！」詠恩望一望部電腦之後再回應我。
就係咁，我同詠恩嘅談話再一次到此為止。今次詠恩冇陪我過去，
只係交低條倉匙比我，要我自己搞掂。我拎住啲送貨單，
望住詠恩嘅背影，我唔捨得咁離開。 自己一腳踢，喺倉度執完貨，
就一手一腳送埋。頭先講左啦，今朝得四單貨，我十二點幾就搞掂哂，
返到公司泊好部車，啱啱好一點鐘！返公司洗吓手、
洗吓面，交低啲單就諗住落街食飯啦。
「...咦！」都成點三啦，詠恩竟然仲喺公司，而且僕左喺佢自己個位度，抬頭望一望我。
「...做乜唔出去食飯呀？」我一邊放低啲送貨單一邊問。
「...其他人出哂去食飯冇人睇舖吖嘛！」詠恩僕返低回應。
「...咁牙，仲諗住問你一唔一齊去食飯添！」我講。
「...唔...唔洗啦，你自己食啦。」詠恩猶豫左一陣，之後繼續僕低回應。
咁我唯有自己一個落街啦！但係我冇食到飯，而係買左兩個飯盒返公司。
上到去詠恩依然係僕左喺度，我開門入離果陣佢先抬一抬頭。
「...拿！」我張兩個飯盒放左喺佢枱面。
「...做...做咩呀？」詠恩起返身望住我問。
「...你行唔開吖嘛，咪買比你食囉。」我回應。
「...吓！」詠恩有啲驚訝。
「...拿...你自己揀一個啦，我記得你以前鍾意食（菜遠牛河）、
（粟米肉粒飯），你自己揀啦。」我一邊打開啲飯盒一邊講。
「...咁！」詠恩繼續呆滯，唔知自己想點咁。
「...拿，我每樣夾一半比你啦。」見佢冇反應，於是我張兩個飯盒分哂一半比左一份詠恩，而我就食另外果份啦。
「...咁...，幾錢呀...我唔記得帶銀包，聽日比返錢你吖？」詠恩問。
「...唔洗啦。」我回應。
「...唔...唔係咁好嘅...」詠恩回應，我地耍左幾句太極之後，終於...詠恩身體好成實咁食飯啦。
睇得出其實詠恩好肚餓，以前同佢一齊點會唔知吖，雖然身形纖瘦，
但其實詠恩係食極都唔肥嘅大胃王體質，果陣同佢出街食飯，
雖然唔係話真係好誇張。但係一蝶大燒味飯真係輕鬆ko，
多數都會清埋我食緊果蝶飯添。
「...原來你因爲冇帶銀包所以唔食飯牙？」食緊果陣我問。
「...邊...邊喺姐，我唔係太肚餓咋嘛！」詠恩尷尬回應。
「...第一日識你咩？今朝喺美心見到你想買早餐但係抄極都抄唔到個銀包啦！」對唔住，原諒我係咁直。
「.......！」詠恩無言以對，繼續食飯。
「...其係唔洗對我咁嘅，而家大家都一場同事...係咪先？」我面帶微笑講。
「...我...我冇對你點呀！」詠恩耷低頭回應。
「...冇...冇咪好囉，哈哈...食飯！」我唔知點應對，求其hea左佢。
「...係啦，你琴日點解會有倉鎖匙架？」詠恩忽然醒起。
「...真係想知？」我冷神秘咁。
「...講啦！」詠恩有啲唔耐煩。
「...冇！我有個friend喺附近做開鎖嘅，咁我咪打比佢叫佢離幫手囉！」我認真回應，眼都冇眨過。
「...真唔真架？」詠恩有啲驚訝，又有啲懷疑咁嘅樣。
「...真！唔係點開啦？」我反問，繼續影帝上身。
「...咁...咁又係，唔...唔該！」詠恩好似信信地咁，對唔住...呃左你，
不過呢啲係善意嘅謊言，嘻嘻...詠恩唔會嬲我嘅。
「...乜說話吖！」我回應。
「...係啦，你...唔係做明星架咩，點解會....」詠恩欲言又止咁。
「...哦，得罪左啲高層姐，咪比人雪囉！」我輕鬆回應。
「...吓！點解嘅？」詠恩好驚訝咁問。
「...好複雜架喎，娛樂圈嘅野！」我講到好隱晦咁。
「...你呢？」我反問。
「...咩...咩呀？」詠恩問。
「...點解會喺度做？」我再問。
「...吓...唔知喎，上網見到請文員咪離見工囉！」詠恩回應。
「...做左幾耐？」我問。
「...半年左右！」
「...之前呢？」我問。
「...吓...問咁多做咩喎！」講到依度詠恩已經食哂佢個飯，
有啲唔耐煩咁行開左，而我就唯有繼續食我嘅飯啦。
「...喂！」隔左一陣詠恩喺Pantry果邊叫左一聲，仲扒緊個飯嘅我抬頭望左過去。
「...多謝！」詠恩講完之後就擰返轉個人繼續洗手啦。
之後時間都差唔多啦，其他人都陸續返哂離，果個阿肥同耀哥仲拍住返添。
其實佢兩個到底負責做啲咩架？耀哥就成日坐喺度，而果個阿肥就成日都唔見左人咁，
相當之古怪，睇離得閒要向佢兩個了解多啲先得啦。
下午繼續係詠恩安排我送貨，不過可能有啲特別啲嘅野送啦，所以詠恩都跟埋過倉度。
「...下午得依三單野咋？」詠恩點緊貨果陣，我問佢。
「...係呀！」詠恩一邊點一邊應。
「...其實果個阿肥到底做啲咩架，成日都唔見人嘅？」我問詠恩。
「...er...你唔好理人咁多啦！」詠恩欲言又止咁。
「...好奇姐，仲有果個耀哥...成尊佛咁成日都坐喺度！」我再講。
「...噗哧！」詠恩忍唔住笑左出離，但係又隔硬死忍。
「...做乜話人係尊佛呀，人地話哂係你主管呀！」詠恩有啲忍唔住笑咁講。
「...個耀哥做左好耐架啦？」我問。
「...好似公司一開就喺度！」詠恩回應。
「...咁公司幾時開？」我再問。
「...好似都係一年左右。」詠恩諗一諗之後答。
「...咁果個阿肥呢？」我再問。
「...問人咁多野做咩喎，做返自己野啦，理咁多冇乜好處架咋！」詠恩用溫柔嘅聲線打斷左話題，
好似唔想我理咁多野咁，唔通...詠恩真係知道啲野？