中左六合彩頭獎四千八百萬，依家唔知點算?: 第五章56
就係咁...我應承左老豆第二日開始就幫佢微服出巡，
落旺角舖度做臥底貨車司機體察民情，
而阿妹呢...就話要等返公司辭左職之後先可以返舖。
果晚我冇咩特別感覺，好似有啲打回原形feel，但係諗深一層我而家嘅身分係太子，
同以前點都係有分別，況且歌手果邊都冇話完全死哂，起馬我都仲有小小知名度，
facebook衰衰地都有幾千個Follow，咪當比自己放個大假囉，收拾心情、
養精蓄銳，得閒寫定啲新歌，就算公司唔幫我做，我都可以喺專頁自己post吓片，
繼續做我想做嘅野，其實都唔錯吖。
話咁快就到左第二日，我做戲做全套，著哂牛記笠記咁，朝早九點幾就落到旺角。
睇吓個地址先，弼街...咦...其實嚴格離講依個位算係太子，又可以話係旺角，
一般司機都會用弼街離或分兩個區域，但係佢間舖就喺正中間都真係難計...點都好啦，
我今日冇揸車，搭港鐵去到旺角，再沿住砵蘭街慢慢行上去弼街同上海街交界，
睇吓先...應該係依幢商業大廈啦喎，睇睇水牌先，
標誌...標誌....吖...搵到啦22樓（標誌室內設計公司），大大個招牌...相當清晰可見，
個名我諗都唔洗點解釋啦，我老豆叫張信志，再加同彪哥個名同音嘅標字個名就係咁離。
因為舖頭辦公時間係十點鐘，所以而家未開門，
不過就見到入面著左燈有人返左離...點好呢，
有小小緊張添...死就死啦。
「...啪～」我推開左度玻璃門行左入去。
「...唔該！」我邊行入去邊細細聲叫，行到轉角位終於見到有人啦。
「...我地未開門喎！」一個中年男人坐左喺入面嘅櫃位度，
食緊一個好豐富嘅美心吉列魚柳早餐。
「...er...我離返工架。」我回應。
「...返工？返咩工呀？」中年男人 有啲疑惑好似乜都唔知咁款，唔係掛...老豆又話安排好哂嘅？
「...貨van司機！」我回應。
「...貨車司機？幾時見工架？點解我唔知嘅...你等等先...我打個電話問吓先！」
講完之後，中年男人就拎起左枱面嘅一個電話打啦。
「...喂...寫字樓呀，旺角舖呀，乜今日有司機返工咩？」中年男問緊，之後仲撳電腦添。
「...哦...見到見到，啱啱睇到...，得得得...冇問題！」中年男應該喺電腦睇到記錄，咁都定啲。
「...啪！」收線之後，中年男人繼續撳電腦，一路撳仲一路自言自語添。
「乜咁快請左人架！」佢睇離有啲不爽！
「...er...阿聰呀呵？我叫阿耀！」中年男講。
「...係...耀哥你好！」我禮貌回應。
「...你坐陣先，轉頭先招呼你！」阿耀講完就行返埋佢個位，繼續享用佢個豐富早餐啦。
而我就戇居居咁坐左喺個吉位度玩手指。而家望埋間舖都真係幾大，
可能始終旺角係旺區啦，間舖有成二千幾呎，裝修得相當之靚，
一入門口係一個客廳嘅佈置，再行入啲嘅左右兩邊係兩間唔同睡房嘅佈置，
成間傢俬舖咁，再過埋兩間房位，會有個比較空曠嘅位置，放左啲浴室潔具嘅板，
一啲地磚同地板嘅樣板，轉彎位有幾個小型嘅工作位，一啲電腦設備同一個大嘅櫃位，
即係果個耀哥而家坐緊喺度食早餐果度，而我就坐左喺其中一個細嘅工作位度等緊運到。
等左十分鐘左右，終於都有人返工啦，一個中年女人四十零歲度啦，
外形算keep得幾好，長黑直髮中等身材，著哂套裝成個OL咁款。
「...咦...依個𡃁仔邊個離架？」女人見到我有啲疑惑咁問耀哥。
「...新嘅貨車司機喎！」耀哥望一望我，繼續食住佢個早餐講。
「...哦...嘩...小鮮肉，幾靚仔喎！」女人講野比較豪邁，
應該係性情中人，不過我想講我都廿到尾架啦，仲小鮮肉唔係掛？
「...er...你好，我叫阿聰呀，大號叫乜姐呢？」我笑笑口問。
「...叫我Yvonne 得啦，吖...睇睇吓覺得你咁熟面口嘅，唔知喺邊度見過咁！」
Yvonne 姐回應，嘻嘻...可能佢喺電視立過吓我，但係又唔多記得，
不過唔記得好過記得啦，到時仲煩...講真佢地啲中年人又點會留意而家啲歌手新人吖，
唔識我一啲都唔奇。
「...拿...阿聰，耀哥你識架啦，佢係依度嘅主管，而我呢...係sales離嘅，
仲有兩個跟單文員未返到，一陣佢地會安排啲送貨單比你搞架啦。」Yvonne好nice咁解釋我聽。
「...哦！」我回應。
「...阿仔...不如你去試吓車先啦，部車泊左喺始創果邊。」
Yvonne 喺櫃桶度拎左條車匙比我，於是我就自己走左去始創果邊試車啦。
其實車嘅野來來去去都係咁上吓架啦，不過無野做咪試試佢囉。
十分鐘左右，我就行到去始創停車場，睇吓先...車牌psxxxx，
hiace...吖...見到啦，咦...又幾新淨喎，上年先落地...車尾仲放左好多裝修架餐喺度。
著左車...揸左個圈，行車暢順，軚盤、響安系統運作良好，
冇咩好搞，於是我就行返過舖頭果邊啦。
一返到上去，舖頭已經開左門，於我就推門行返入去啦。
「...阿仔返離啦，部車有冇咩問題呀？」Yvonne 問。
「...ok呀，冇問題！」我回應。
「...拿...介紹你識！依個阿肥，跟單離嘅...有咩送佢會話比你知架啦，
仲有個跟單啱啱去左廁所，你有咩唔明都可以問佢地，
拿...就講就到啦...恩...介紹你識先，依個新離嘅司機，阿聰！」
Yvonne為我介紹，但係介紹到一半，我個人又呆左啦，
因為啱啱去完廁所，行緊返離果個跟單文員竟然係....詠恩！
「...依個阿恩...，都係跟單文員離嘅，你地大家溝通吓啦吓，
我去覆埋啲e-mail先！」Yvonne 講完，就急急腳行返去佢個位度，
而我同詠恩兩個，照舊發呆...，好似大家都有種匪夷所思嘅感覺，
點解人海茫茫，偏偏會撞返我，點解？點解？
詠恩個樣滿面問號，好似發緊夢咁嘅神情，依個神情偏偏就係我最鍾意嘅。
今日嘅詠恩扎住條馬尾，著住好普通嘅白色t恤、牛仔褲，冇化妝，
不過我識佢果陣佢已經係唔化妝，素顏都咁靚，皮膚白滑亦都係我鍾意佢嘅原因之一，
我地deadair 左半分鐘，終於.....
「...恩，print埋啲送貨單啦！」阿肥用小小命令嘅語氣叫詠恩，
睇離阿肥比詠恩資深，講吓個阿肥先，人如其名...肥仔一個，
矮我大半個頭，睇落大約165左右高，三十歲左右，好似仲矮過詠恩添，
應該有200磅，平頭短髮、對眼好似豆豉咁細，都係著普通t恤加牛仔褲，
個樣好似唔方好人咁款。
「...哦！」詠恩細細聲「哦」完之後就掉頭行左返去佢個位度。
「...嘻嘻...阿聰呀呵，你好你好，轉頭print埋啲送貨單呢，
阿恩會帶你過我地個倉度攞貨，之後啲流程問佢得架啦，唔該！」
相反...阿肥對我嘅語氣同態度都非常好，
可能因為跟單始終都要靠司機幫佢送貨啦，
通常都會客氣啲。
就係咁，我繼續行行企企咁，而家依個時間開始有客上離，
Yvonne 好落力咁招呼緊啲客，而果個耀哥呢，er...
佢係繼續食緊佢果個豐富早餐，好似唔洗做咁款。
「...er...跟我離啦！」過左幾分鐘之後，詠恩print好左啲送貨單，
行左埋離我度，用好柔弱嘅聲線同我講，個樣仲好唔自然咁東張西望，
於是我就跟住佢尾行出去搭𨋢啦。
搭𨋢果陣，詠恩一粒聲都冇出過，而我亦都係一樣，大家保持沉默。
落到樓下...詠恩只係顧住自己行，完全冇理過跟喺後面嘅我，
我唯有死跟，好彩個倉唔係好遠，只係喺兩個街口外鴉蘭街嘅一幢工廠大廈度。
我地行左五分鐘左右就順利到達，之後搭𨋢...上到去六樓嘅一個貨倉度。
「........！」詠恩手忙腳亂咁喺褲袋度攞出一串鎖匙，個樣好迷惘咁左搵右搵，左試右試....，但係試極都開唔到度門。
「...死...死啦，點...點算呀？」詠恩面有難色，好似好驚咁...！
「...做咩呀？」我有啲疑惑咁問。
「...唔...唔見左條鎖匙，唔知係咪唔小心攞左返屋企....
死...死緊啦，實比耀哥鬧死！」詠恩驚到腳都震埋，乜咁大懵架！
「...冷靜啲先，你記得係漏左喺屋企？」我問詠恩！
「...唔...唔知呀！點...點算呀，實比人炒啦！」
但係詠恩繼續騰哂雞咁，不知所措！
「...你聽我講先，你屋企有冇人喺度呀？打個電話返去問吓！」
我好冷靜咁雙手搭住詠恩膊頭，盡量令佢快啲回魂！
「...哦！」詠恩「哦」完之後就拎左個電話出離打啦。
「...喂，媽咪！」詠恩個電話應該接通左。
「...有冇見到我有一抽鎖匙喺度呀？」詠恩問緊。
「...你搵真啲！」過左半分鐘後，詠思有啲急躁咁問。
「...冇...冇野啦！」但係再過多一分鐘，詠恩面色一沉，
塊面白到好似死人咁款，都大約估到佢地嘅對話內容架啦。
「...搵唔到牙？」我拍一拍已經冇左靈魂嘅詠恩問。
「...嗚嗚～嗚嗚～～」詠恩忽然僕左喺我心口度喊？
而且仲喊到一發不可收拾、聲嘶力竭咁。