中左六合彩頭獎四千八百萬，依家唔知點算?: 48
可能我早左十分鐘到啦，去到果陣佢三個仲未落離，
於是我就坐左埋啲梳化度邊坐邊等啦。
而家諗諗吓...又好似有啲印象同詠恩一齊果陣，小生好似都提過吓話會搬去將軍澳果邊，
我記得果陣佢阿哥都係做娛樂圈嘅，好似喺大風做（業務推廣經理），不過好似喺早兩年，
因病過左世，可能係因為咁啦，所以小生對我地依一行好好奇，可能希望可以同佢阿哥接近一啲，
不過見到佢依家咁樂觀、積極，相信佢已經走出左人生嘅黑點，作為朋友...希望佢睇開啲啦。
「...聰，到左好耐拿！！」就講就到，坐左唔夠五分鐘，佢三個已經落到離，
小生依舊保持開朗，帶頭叫住我咁帶住lo ming同詠恩行埋離。講吓lo ming先，
佢係一個短髮、好白淨，偏向男性化嘅文青少女，性格同詠恩相近，
都係唔多鍾意講野果種，我同詠恩拍緊拖果陣，聽講lo ming係個tb離，
果陣我仲懷疑佢當我係情敵添。不過近年聽人講佢已經變返直，
而且仲有男朋友添。
「...啱啱到姐！」我客套回應，之後我地就一齊落樓行過去popcorn果邊啦。
沿途佢地三個女仔行喺前面，而我就尾隨，加上我又戴哂帽鬼鬼鼠鼠，
搞到我成個跟蹤狂咁，無計啦...要同詠恩保持距離，等佢盡量冷靜。
不過今日嘅詠恩，比起我對上一次見佢果陣平靜好多，但係眼神就同我識佢果陣一樣，
永遠都好憂怨，就好似發緊夢咁，你永遠都唔會知佢腦入面到底諗緊啲乜。
好快就行到去popcorn果間韓燒門口，我記得詠恩係好鍾意食韓燒架，
諗返起果陣我地差唔多每個星期六或者日，都會去銅鑼灣（漢和），
貪佢夠平吖嘛，百零蚊食到飽一飽，唉...諗到依度...我又不禁嘆一口氣，
往事只能回味。
「...唔該...book左房姓李架！」小生帶頭埋左去，可能食飯時間啦，
間野都尚算多人，不過好彩小生係vip，唔洗等就可以直行直入。
侍應帶咗我哋入去一間房度，之後佢就自己彈返出去。間房其實唔係好大，
放左一張五、六人枱，不過因為我地只係得四個人，所以都算係坐得幾寬鬆吓。
小生同lo ming夾住詠恩離坐，而我就揀左坐小生隔離。
放好哂野之後，我就住動走左出去攞野食啦。睇吓先...原來依間野係自助形式，
即係同漢和果啲大同小異啦，又係乜都有啲，熟食呀、壽司呀、甜品之類。
我係出面打左個令，就好快咁攞左啲野食返去啦。因為我知詠恩好鍾意食羊架，
所以我第一樣攞返去嘅就係羊架。放低之後我繼續攞野，
到第二轉返去果陣，佢地已經開始食緊。
「...辛苦哂喎，燒左啲野比你啦。」小生講。
「...喂...唔該，唔該！」我一邊坐低一邊回應，之後我亦都開始食野。
我見未有人開始燒羊架，於是自己開始燒起上離，期間小生又開始問我野，
問我幾時出道，又問點解會做左歌手...等等，我都係求其hea左佢，
唔通同佢地講我中左六合彩發左達所以為興趣咩，可能真係心虛啦，
唔想比詠恩知道我有女朋友，所以連思敏同阿瑜我都隻字不提。
「...拿！」我將燒熟左嘅羊架夾左比詠恩，之後再順勢夾比其他人，
眼尾望到詠恩開頭有啲猶豫，但係過左幾秒之後，詠恩開始夾起我燒嘅羊架。
好野呀！！！詠恩肯食我煮嘅野，已經係成功嘅一半！！
希望詠恩對我唔好再咁抗拒，
咁就可以再進一步咁了解佢對我之間，
到底有啲咩野誤會。
交談間得知...小生而家喺一間貿易公司度做緊普通文員仔，即係一街都係唔值錢果啲呢，
而lo ming就喺一間廣告公司度做緊電腦砌稿，即係幫啲客戶p圖，執相果啲，
至於詠恩...雖然佢冇乜點講野，但係從小生口中得知，詠恩好似都係做一般嘅跟單文員，
而且應該係喺旺角返工添，因為聽到小生話下星期約佢去行街，小生仲話就佢喺佢公司附近旺角始創等。
全程我當然係不斷偷望詠恩啦，講真...上次見都冇望清楚詠恩，
今次睇真...詠恩個樣比七年前成熟左，但係皮膚依然保持住咁白滑，
都唔知點解小苑會黑到舊炭咁，究竟係咪同一個老母生架？身材比起我識佢果陣豐滿左
果陣佢先得果十八、九，瘦到成枝竹咁，而家呢...雖然都係好瘦，但上圍明顯升左cup，線條更加迷人。
我望到詠恩間唔中都會好唔自然咁偷望我，但係一見到我發現左佢，
之後佢又會即時擰返開。唔知點解呢，我硬係覺得佢對我仲有啲野嘅，
由佢嘅眼神、神情、形體動作，我可以睇到一啲蛛絲馬跡。
「...吖～好飽呀！」小生攬住個肚講，原來眨吓眼，已經成兩個鐘㗎啦，
真係快樂不知時日過，正當個個都飲飽食醉嘅時候，我忽然間有一個念頭。
「...lo ming你地住咁遠，洗唔洗我揸車送你地返去呀？」我好自然咁講，
其實明眼人都知我其實係想車詠恩。
「...er...唔係幾好嘅！」lo ming一邊講一邊望 望詠恩，
但係詠恩同頭先一樣係毫無反應。
「...唔緊要喎我得閒，咁夜兩個女仔返去好危險架！」我繼續努力游說。
「...咁...好啦，唔該哂！」lo ming回應，講真我都明lo ming嘅，
始終有人車返屋企喎，正常都想架啦，加上詠恩繼續粒聲唔出，
lo ming咁答都好正常，但係始終都唔知詠恩心入面到底諗緊啲乜。
就係咁，我開始左車佢地兩個女仔返屋企嘅旅程。其實途中佢兩個都比較靜，
lo ming只係掛住自己玩手機，而詠恩呢...就一貫嘅作風，
粒聲唔出咁望住窗外嘅景色，點解佢個人長期都要咁憂怨呢？
雖然我識佢果陣，佢嘅性格的確係咁樣，記得第一次打電話比佢傾project果陣，
我地可以揸住個電話成十分鐘，詠恩都只係講左唔夠十句野，全部都仲要係我問佢答咁，
但係之後熟絡左，詠恩就好似一隻脫韁野馬咁，好多野講，可能雙魚座嘅人多愁善感啦。
好快部車就駛過左香港仔隊道，我順住路行，
首先去左鴨脷洲放低lo ming，之後就會係我同詠恩嘅私人聚會。
「...唔該哂啦聰！」lo ming落車後，恭敬咁道謝完，就轉身走左。
我繼續好自然咁開動我部車，其實鴨脷洲同香港仔中心嘅車程只係得大約五分鐘左右，
但係依五分鐘...對我離講就好似成年咁耐。我故意將部車揸慢啲，未到燈位都會預先停低，
懶係好安全咁，其實只係想見多詠恩幾面。雖然以前曾經零距離過，可以話係接近同步咁濟，
但係而家對住詠恩真係完全唔知講咩好，就好似一個啱啱先識嘅女仔咁，
但係諗諗吓...咁咪好囉，咁都未嘗唔係一件好事吖！
「...係呢，你想我喺邊度放低你呀？」我鼓起勇氣，開口同詠欣講第一句野。
「...是但啦！」詠恩用憂怨嘅語氣回應。
「...係呢，以前都唔聽你講話鍾意游水架，做乜無啦啦走去練水嘅？」我問。
「...冇...冇野呀，無聊咋嘛！」詠恩忽然又有小小緊張咁。
「...哦...係牙！」我回應。
「...係呢...依排天氣涼涼地，有冇去行吓山呀！」我問。
「...吓...冇！」詠恩疑惑回應。
「...諗起以前行山，乜都冇帶我地就即興由「十五間瀑布」，
一直行到上水塘，諗落真係幾危險呵！」我有感而發。
「...吓....！」詠恩繼續呆呆地咁回應。
「...你唔記得左？」我問。
「...唔...唔係！」詠恩尷尬回應。
「...不如搵日再行過囉？」我見詠恩好似冇咁抗拒我咁，所以單刀直入。
「.....！」但係詠恩冇答到我，就係咁...我地deadair 左一陣，
部車亦都到達香港仔中心。
「...唔該！」詠恩只係細細聲咁講左一句就落左車啦。
雖然係食左檸檬，但係佢肯同我講返野，即係証明佢唔係真係咁憎我姐，
係喎...完全唔記得左浠琳果份（親子鑒定）報告添，話時話都過左成個幾月，
老大出左camp 啦掛，好...一陣返到去一於打去問吓。
於是我送完詠恩返屋企之後，就回程揸返部車返將軍澳啦。
返到屋企差唔多十一點啦，阿妹同平時一樣坐左喺個廳度開住部電視撳電話，
於是我亦都坐左埋去。
「...返離拿...大佬！」阿妹一路撳電話一路講。
「...嗯！」我嗯左一下，之後亦都拎左部電話出離撳。
「...咦～大佬，你首歌喎！」電視咁啱播緊我唱嘅果首電視劇主題曲，
本來撳緊電話嘅我亦都好專心咁欣賞一下自己嘅傑作。
吖～依首音樂真係全宇宙最悅耳嘅音樂，簡直聽出耳油。
「...係呢阿妹，套劇好唔好睇？」我問，因為其實我都唔係好知套野到底講咩。
「...er...我都唔知喎！」阿妹回應。
「...吓...你冇睇架咩？」我問。
「...er...嘻嘻，真係冇睇過，我都好小睇依啲立雜野嘅！」阿妹笑笑口回應，
語氣仲好似食神入面借錢比周星馳果個銀行經理咁。
「...咩野立雜野姐！」我有啲不爽咁問。
「...講真...大佬你首歌係好聽嘅，之但係套劇口碑就真係認真麻麻啦。」阿妹講。
「...吓...點解咁講呢？」我疑惑回應。
「...都係上網睇啲人講架咋，啲人話套野堅尼地，啲對白又out，劇情又牽強，
果兩個配角，集集都嘈怨巴閉，拿...你自己睇吓啦，依個（大大）仲話啲演員，
表情做作，略嫌浮誇喎！」阿妹一邊講一邊隊左部電話埋離比我睇。
「......！」我冇出聲拎住左阿妹部電話睇，估唔到網上嘅評論全部都咁負面，
仲有好多人都叫電視台快啲腰斬左套劇佢，但係就冇乜點提過我首主題曲。
「...算把啦大佬，套劇遲早cut架啦，又唔關你事嘅，唔洗唔開心喎！」阿妹見我眼定定望住部電話，所以咁講。
「...反而你客串做果套處境劇越離越受歡迎喎！」阿妹繼續講。
「...唔係掛？」我有啲驚訝咁回應。
「...真架，er...睇吓先，個post好似唔見左啦，不過我記得網上啲人話套野幾好笑，
輕輕鬆鬆冇壓力喎，仲大讚你做果個貨車司機角色入形入格添呀！」阿妹一邊篤我手上嘅電話一邊講，
雖然話有人鍾意係好事離姐，但係我始終都唔鍾意做戲，如果有人欣賞我嘅音樂我會開心好多囉。