中左六合彩頭獎四千八百萬，依家唔知點算?: 19
思敏行開左我就緊係搵啲野食吓啦，攞隻紙碟夾左啲野食之後，
就拎左罐汽水行埋一邊醫一醫個肚先。 望真啲周圍環境都唔錯，
門口位放左張梳化，附近放左好多唔同嘅（色版）、一啲設計嘅相簿，
就好似個showroom 咁。再行入小小...就係辦公室，有啲畫圖板，
有啲櫃枱同電腦咁啦，最後面有兩間房，一間係老豆嘅，另一間就係彪哥，
規模都唔細架，望落依度都有成千幾呎，唔知啲租貴唔貴呢？
「...哈哈...乖仔，唔好飲汽水啦，離同老豆飲返杯！」老豆拎住枝紅酒行左埋離，
個樣好開心帶小小醉意咁倒左杯紅酒比我。
「...哈哈...叻仔，個女友掂喎，有前有後咁，一定好好生養...哈哈！」
老豆一手搭住我膊頭，另一隻手就豎起手指公，好似hi大左咁，
搞到我都有小小尷尬，好彩思敏行開左姐。
飲飽食醉之後，老豆提意去附近嘅卡啦ok繼續盡興喎，
於是我地一家人同埋思敏就去左apm間neway啦。
去到之後老豆帶頭點唱，阿妹照舊喪點容祖兒，
而我呢...嘻嘻...因為思敏喺度所以我暫時都收斂吓住坐埋,一邊先。
「...咦...唔點歌嘅聰哥你？」思敏坐左喺隔離問我。
「...er...轉頭先啦！」我答。
「...嘩...原來uncle唱歌同文蔚都咁好聽嘅！」思敏聽完老豆唱之後非常之欣賞。
「...聰哥...我好想聽你唱呀！」之後思敏捉住我隻手講，無辦法啦...唯有獻醜啦。
唔好嫌我out呀，點左一首首本名曲，係一首比較舊小小嘅歌，
我諗依家啲十幾歲𡃁仔真係未必會識，不過思敏都廿幾歲啦，
應該都會聽過，就係謝霆鋒嘅（潛龍勿用）。
https://youtu.be/J3BA9CLWvmQ
「...記住...潛龍勿用...這樣玄妙你懂不懂！」喺思敏佢地欣賞緊嘅情況下，
我用零瑕疵嘅唱功，完美咁演繹左出離。
「...啪啪....啪啪...！」係思敏，依家笑住咁係咁拍手，好似好驚喜咁。
而老豆、阿妹果啲當然係見怪不怪啦，繼續點歌同唱歌。
「...做咩呀？」我問思敏。
「...聰哥...真係好好聽呀，唱到同謝霆鋒一樣咁濟！」思敏個樣好驚訝咁繼續一邊拍手一邊講，
講真...我唱歌似謝霆鋒都真係唔係新聞離架啦，不過我個人本身都比較低調，
唔通我識如來神掌又周圍同人講咩，又唔係啲咩野大不了！
「...哈哈...一般般啦！」我笑笑口回應。
「...我出去攞啲野食先！」我講。
「...一齊啦。」思敏見我行，所以跟住一齊行左出去。
雖然依度嘅k buffet 冇銅鑼灣ceo咁多野食，但係都算唔錯，望吓先...有三文魚，
又有自助邊爐，係差生蠔姐...。見到依個情境，忽然又諗返起阿瑜，
話時話...自從思敏生日果次之後，阿瑜就好似人間蒸發左咁，
完全消聲匿跡左，到底佢而家嘅生活係點？心入面仲有冇我呢？
「..喂...好似有梳乎厘出呀聰哥！」思敏忽然叫我。
「...吓...哦！」心不在焉嘅我而家周圍望緊，睇吓思敏講嘅梳乎厘到底喺邊，
但係望吓望吓，我發現遠處有一個好熟悉嘅女性身影，唔知點解我下意識覺得果個會係阿瑜，
於是我冇理到思敏，急急腳咁跟住果個女仔嘅背影行到入走廊位置，
心急嘅我忍唔住從後一手搭左落果個女仔膊頭。
「...吖...！」女仔比我嚇到叫左一聲，即時轉身擰左後離。
「...對...對唔住，我認錯人！」原來唔係阿瑜，又係嘅...點會撞到兩次咁橋吖，
更何況今次喺九龍，而家我地一個住新界、一個住香港，要撞到更加係難上加難啦，
睇離我真係敏感左。
「...聰哥...做咩走左去嘅！」思敏揸住啲野食行左過離搵我。
「...冇...冇野，行啦。」我呆呆地咁答思敏，之後就拖住思敏行返入房啦。
唱完k之後，我車完思敏返屋企，就一家人一齊返左屋企啦。訓左上床之後，
我回想返頭先喺卡啦ok嘅情景，本來已經埋藏喺內心深處對阿瑜嘅記憶又慢慢咁浮現返出離。
拎起個電話，望住當日同阿瑜嘅對話，果一句「我冇咁嘅勇氣...對不起！」
時間就好似停留左喺當晚嘅凌晨一點二十五分咁，唔知喺地球嘅另一方，
阿瑜心入面會唔會同樣都係諗起我呢？
時間過得好快呀，唔經唔覺已經五月幾，立左夏...近排嘅天氣真係熱左好多，
閒閒地都廿八、九度咁，每日仲要烈日當空咁派貨真係人都癲呀。
計起上離...同思敏拍左拖都個幾月啦，依一個月雖然冇左啱啱中左六合彩果陣嘅激情，
但係我嘅生活已經開始轉變緊。新屋已經適應左，將軍澳嘅環境我亦都開始熟悉，
老豆間公司頭一個月生意亦都相當唔錯，而家每朝八點，老豆就會著哂恤衫西褲好準時咁出門口返工，
同以前爛t、牛仔褲簡直判若兩人，哈哈...成個大老闆咁款。
阿媽就繼續做好一個家庭主婦嘅重要角色，唔好以為阿媽唔洗返工好得閒喎，
其實不知幾辛苦，洗衫、拖地、煮飯、抹窗就不在話下啦，而且仲要管理，水、電、煤、
管理費依啲日常事務喎，係喎...唔記得交代返添，除左我地而家住緊嘅單位外，
我仲同老豆每人夾多三百萬買左另一個同樣喺將軍澳嘅兩房單位收租，我同老豆商量過架啦，
一來可以用租金去維持返家庭嘅日常開支，二來依個單位係諗住第日等阿妹結婚送比阿妹做結婚禮物嘅，
所以阿媽而家要處理嘅野真係唔小架。至於阿妹呢，仲係十五、
十六咁繼續喺馬會度做仲未揸定住意選擇自己要行嘅路，阿妹加油呀，你一定得嘅。
而我...亦都係一樣，繼續被困喺依間公司入面，依然諗唔到方法可以逃出魔掌。
講到感情呢，同思敏佢可以話好好，亦都可以話唔好，點講呢...冇錯佢對我係好好，
我亦都以禮相待，就好似相敬如賓咁，我地從來都未鬧過交，因為每次我發脾氣，
思敏都會即刻低聲認錯，無論係我啱定佢啱，我幾無理到好，思敏都會默默承受，
而且好快又會笑面迎人咁繼續氹返我，就係咁樣...我反而覺得我地似主僕多過似情侶。
今日係星期日，我而家身處喺紅墈都會廣場，大堂搭起嘅舞台上面，
台下而家有幾百人喺度，我真係有啲後悔行左上離。
點解？要講...就要由上次唱k果日講起啦，果日唱完k之後隔左兩日，
返緊工果陣無啦啦有個不知名電話打離喎，咁我送開貨平時都會有啲客打離，
我亦都不以為意咁接聽左。電話入面有把女人聲，佢講得出我個名，
而且無啦啦話有人同我報左名參加左一個叫做（模仿巨星歌唱大賽）嘅比賽喎，
大佬我當時第一個反應緊係想x交差y佢啦，心諗唔係比人整蠱就肯定係電話騙案，
但係經我一返查問之後，發現原來幫我報名嘅人，竟然係思敏。
收工之後問返思敏得知原來依個比賽係思敏做野果間公司搞嘅，
每個公司職員都要交一個人出離，所以思敏就交左我啦。
思敏話我把聲咁似謝霆鋒贏緊喎，但係我想同佢講其實天外有天，
佢真係太睇得起我啦，不過因為唔想思敏失望，所以我今日唯有頂硬上啦。
「...跟住出場嘅依位參賽者，嘩...個名好特別喎，佢唔係張敬軒、
亦唔係張繼聰，佢叫做張敬聰，大家比啲掌聲！」大會司儀望一望張q咭，
再用我個名搞左個難gag，引到在現人士哭笑不得，搞到我嘅緊張程度再一次標升。
「...不過佢今日要模仿嘅竟然唔係兩位張生，而係近年已經好小喺樂壇出現嘅影帝男神謝霆鋒。
事不宜遲啦，我地有請我地嘅參賽者唱出佢嘅參賽歌曲，謝霆鋒嘅（不要說謊）。」
司儀一講完，音樂隨即響起。
依一刻我嘅壓力已經去到極點，對腳麻痺到冇哂感覺，跟住音樂開始唱起上離啦。
「...說過想化做你睡床～答應你搬到任何地方～在那日虔誠渴望親口跟你講～」
跟住音樂節奏，身體開始適應，雖然仲係好驚，但係已經麻木左，
眼前一片空白，彷彿什麼都是浮雲。
「...當我～比你...善忘～～吖....thank you！」五分幾鐘嘅表演，
終於都捱過左啦，發揮未算超水準，不過都算係不過不失啦。
「...嘩...果然好似吖吓，我相信咁多位評判都已經心中有數架啦，
多謝哂...八號參賽者張敬聰高水準嘅演繹，接住落離我地有請九號參賽者上台準備。」
司儀講緊野嘅同時，我亦都腳震震咁慢慢從台側邊離開。
因為比賽係繼續進行緊，所以落左台之後當然係冇人理我啦。
頭先明明只係腳震，但係一落台就離料啦，個胃忽然傳離痛楚，
而且痛楚仲高潮一浪接一浪咁，開始十級而上。
「...聰哥，你唱得好好呀！」係思敏，佢依家行左埋離我度。
「...個...個胃好痛，我...去一去廁所先。」我好急咁同思敏講完之後就跑左去廁所啦。
鬼咩，其實我個胃一向都唔係幾好架啦，平時一緊張就會胃痛嘅，
不過今次可能真係緊張得濟啦，比起平時緊加痛，直頭痛到想死。
我喺廁所用水洗左個面諗住令自己冷靜落離，但係洗完都未見改善，相反胃痛仲加劇左添。
好彩而家男廁一個人都冇，因為我痛到面容扭曲、狀甚痛苦，仲叫埋出嚟。
我攬住個肚行左入其中一格廁格入面，支持唔住成個人訓左喺個地度，
有一刻我有諗過，我可能會死添。其實訓左喺地下期間，我有諗過打九九九報警，
但係一諗到出面有幾百人睇住，一陣比人抬出去一定樣衰到爆，
所以我猶豫左好耐...此終都打唔落手....，不過過左唔知幾分鐘之後...我聽到嘭一聲！