中左六合彩頭獎四千八百萬，依家唔知點算?: 18
「...喂...聰，做咩喺度嘅？」係阿榮，佢依家揸住部benz駛緊入離停車場。
「...吓...冇...冇呀，路過咋嘛！」點解阿榮會無啦啦揸住部benz架！
「...路過？」阿榮有啲疑惑...，無啦啦喺個停車場入面路過又係牽強啲嘅！
「...嘩...靚車喎！」我轉移視線去阿榮部車度。
「...二手車離姐，等等我，我泊好部車先！」阿榮好興奮咁講，睇離佢好鍾意部車。
等阿榮泊好部車之後，我地就一齊行返公司。從佢口中得知，
原來係因為佢之前住開嘅石澳村屋比屋宇署勒令清拆，
於是一向鍾意住村屋嘅阿榮就同女友一齊搬左去大埔啲村屋度住，
咪順勢買埋部二手車返工代步囉，而且仲話有部車收工可以試吓兼職uber添喎！
好彩係我泊好左部車先撞到佢姐，如果唔係都唔知點解釋啦，
睇離我以後泊車攞車要小心啲啦。
無驚無險又到六點，放工之後我係停車場專登等阿榮開車走先，
之後再小心翼翼咁開走我部車。但係今日我唔係返屋企或者接阿妹，
而係揸左部車入機場。你地冇聽錯呀，我真係入左機場，而且仲係去接思敏收工。
因為從琴晚同思敏傾電話得知，佢今日應該係放七點半，
所以我就諗住入離比個意外驚喜佢。
「...嘟嘟....！」電話冇人接聽。
「...嘟嘟.....！」都係冇人接聽，係喎...佢返緊工果陣應該係唔聽得電話架喎，
咁點算呢？冇辦法啦...唯有whatapp佢話比佢知我離左搵佢啦。
「...我離左機場，收工覆我啦！」聰7:15pm
等....等...但係等左好耐都一直未有回應，我再望一望個電話，
原來已經八點幾，於是我再嘗試打比佢，但係電話依然係冇人聽。
我開始有啲唔耐煩啦，心入面有小小嬲，但係繼續沉住氣等...，
到差唔多九點鐘，當我嬲到一個極點想開車走果陣，
思敏終於都打返離啦！
「...搞錯呀，唔聽電話！」我唔知點解自己會咁嬲，一接通我就係咁爆哂出離。
「......對唔住呀！」比我鬧緊嘅思敏就好緊張咁喺度say sorry，
唉...聽到佢咁慘，我都即時嬲唔落停左落離，
之後就話比佢知喺邊度等緊佢叫佢出離搵我啦。
等左五分鐘左右，就見思敏好狠狽咁跑住出離，好似好驚會比我鬧咁。
「...對唔住呀，對唔住呀，因為要ot遲左收工。」一上車思敏繼續道歉，
其實諗深一層...我又冇講過話入離搵佢，佢唔知而冇聽電話又唔關佢事嘅。
「...算啦...都唔關你事嘅，係我唔應該無啦啦走入離搵你。」我回應。
「...唔係架，唔係架，你入離搵我我好開心呀。」思敏攬到我實一實講。
「...吓...係...係咩！」我有啲驚訝。
「...嗯...多謝你呀...聰哥！」思敏好開心咁繼續攬住我，搞到我有啲內疚添。
「...思敏...好啦、好啦，放手先啦...我要開車啦！」我有啲尷尬咁拍一拍思敏膊頭講。
「...嘻嘻...嗯！」於是思敏就縮返開小小，笑一笑點一點頭。
「...好啦...肚唔肚餓呀？」我問。
「...嘻嘻...其實都幾肚餓，因為一點食完飯到依家都仲未食。」思敏笑笑口，摸一摸個肚講。
於是我就車左思敏去食野，開車之後...我問思敏想食咩佢都話冇所謂，
所以到最後...我就車左佢去荃灣食牛角。
其實係佢帶我離先啱，因為我一向對食都冇咩要求，
所以都唔知帶佢去食咩好，咪求其車左佢落荃灣睇吓佢有咩想食囉。
講開又講...依間野我真係未食過，因為平時返工一枝公咁，多數都係茶記搞掂。
不過食落又真係唔錯，思敏發版叫左兩個餐，有和牛又有好多豬肉、
雞肉咁樣樣都有啲。我地兩個人對住個爐，思敏一邊幫我燒，
一邊講野比我聽，而我就好似個大爺咁食、食、食。
食到飽一飽埋單都只係三舊水左右認真淨玩。依家我作為男友更加唔可以要思敏比錢啦，
但係當我諗住埋單果陣，原來思敏一早已經埋左單。我想比返錢佢，
佢又話上次我請左今次要留返比佢請喎，搞到我差啲要爭比錢爭到打交咁濟。
（講笑）最後我咪唯有話下次我請返囉，食完之後...我就開車送佢返屋企啦。
「...多謝你呀...聰哥，我今日好開心呀！」去到思敏屋企留下，思敏攬住我條腰講。
「...嗯...開...開心咪好囉！」我答。
「.....！」思敏再一次瞇起對眼要求good bye kiss。
而我今次...唔單只滿足佢嘅要求，而且kiss落去之後，我仲升級咁開始伸條脷入去同佢打茄輪，
思敏開頭有小小緊張，但係慢慢佢就比我嘅舌頭所熔化，雙眼微思咁慢慢享受住咁美妙嘅時光，
而我亦希望依一個茄輪，可以令我搵得到對思敏嘅感覺。
嘴完之後...思敏好滿足咁離開，而我亦都揸住我部車返返屋企。
沖涼之後我攤左上床，繼續回想緊頭先同思敏嘅果個茄輪。
我想去投入...但係此終都搵唔到同阿瑜kiss嘅果種感覺，
希望可以快啲喺思敏身上搵得到。
之後嘅一個星期，都係重覆嘅生活。一個星期之後，老豆嘅公司終於都開張啦。
今日係星期六，老豆老母一早就落左舖頭準備開幕禮同食物招呼朋友，
阿妹亦都落埋去幫手set場，而我就約埋思敏齊齊落去。
朝早十一點，我揸住我部靚車去到日出康城接思敏，離遠已經見到思敏企左喺度等我，
可能係因為知道要見家長嘅關係啦，思敏今日著得比較思文，上身一件白色t恤身材依然逼爆，
下身就著左條牛仔短裙，紥左條馬尾...化左個淡妝，加埋果個招牌笑微，
上車之後我就開左我部車穿過將軍澳隧道去到觀塘，經觀塘道轉入開源道到最後入到去成業街（泓富廣場），
我老豆新公司嘅地址。
我將部車泊左入時租停車場，泊好車後再拖住思敏搭𨋢上去。
「...好...好...緊張添！」搭緊𨋢果陣，思敏拖住我口窒窒咁講。
「...傻妹，文蔚都喺度架嘛！」我拍一拍思敏個頭答。
「...嗯...！」思敏點一點頭，之後就硬著頭皮咁跟住我出𨋢！
果度係商業大廈，環境好新淨，而且裝修都幾靚。
一出𨋢...望一望水牌好快我就搵到老豆間公司。
轉個彎已經見到好多人企左喺走廊度傾緊計，有好多我都見過，
有啲仲同我點點頭，應該係老豆啲老友，依家手揸紙杯紙碟喺度食緊野。
「...喂...肥仔聰離左拿！」係彪哥叫我，佢啱啱行左出走廊。
因為我細過果陣係一個死肥仔，所以彪哥到依家都依然叫我做肥仔聰。
「...係呀...彪哥！」我答。
「...wu...帶埋拖友離添喎，你老豆喺入面呀！」彪哥對住我奸笑之後就指一指單位入面，
於是我就拖住思敏行入去啦。
一入到去就見到老豆好開心咁揸住杯紅酒喺度飲緊，阿媽就分緊啲食物，
阿妹都係行行企企咁啦，而除左老豆老母同阿妹之外，仲有幾個阿姨、舅父喺度。
「...嘩...阿聰帶左女朋友離呀！」細姨大叫，搞到所有人都擰哂過離。
「...大家好！」我回應。
「...唔介紹你女朋友比我地識。」阿媽好鬆容咁行左埋離。
「...佢叫思敏呀！」我講。
「...思敏？個名咁熟嘅？」阿媽上下打量緊思敏，個樣有啲疑惑咁。
「...auntie 好...好耐冇見啦，幾好嘛！」思敏口窒窒咁同阿媽打招呼。
「...吓...你咪係？」阿媽look到對眼好大，好似記得思敏，但係又講唔出咁。
「...阿媽，佢咪我讀中學果陣個friend思敏囉。」諗左十幾秒之後，阿妹終於都出聲提阿媽啦。
「...係...係啦，嘩...真係女大十八變啊，思敏你靚女左咁多，auntie完全唔認得你呀！」
阿媽恍然大悟咁，開始大讚思敏。
「...auntie唔好笑我啦，邊度靚姐。」思敏尷尬回應，
之後好有禮貌咁同其他親戚打招呼，跟住就比阿妹佢捉左去周圍影相啦。