中左六合彩頭獎四千八百萬，依家唔知點算?: 20
「...嘭....！」係男廁嘅開門聲，應該有個人衝左入離。
「...聰...聰哥，係咪你呀？」係思敏...佢而家好緊張咁喺廁格出面大叫，
估唔到佢會冒住比人話佢入男廁嘅風險衝左入離。
「...係...係呀！」我用微弱嘅聲線回應。
「...吖...聰哥你冇野吖嘛，我幫你叫白車吖。」思敏聽到係我之後，
竟然僕左落地，喺門底望左入離，見到我攤左喺地下度仲驚到大叫添。
「...唔...唔好呀，我唔想比人笑呀！」自尊心大嘅我叫住左思敏。
「...嗚....嗚....唔好有事呀聰哥...嗚！」思敏驚到喊左出離，而我就繼續攤屍。
「...我...我頭先買左胃藥呀，不...不如你食啲啦！」思敏嗚嗚吓諗起，
然後喺個手袋度拎左盒(胃仙u)出離，同枝細水一齊喺門底遞左比我。
「...不如你出去先啦！」接過藥後，
因為我都驚有人會入離，所以叫左思敏出去先。
快手啪左粒藥之後，我就繼續攤屍。
估唔到喎，雖然冇即時好返哂咁誇張，但係過左幾分鐘之後，
痛楚真係減輕左唔小，我開始可以坐返起身，然後慢慢咁行返出廁所門口。
「...聰...聰哥！」喺門口守候住嘅思敏一見到我行出離，就即刻扶住左我。
「...細...細聲...啲...！」我講。
「...哦...，有...有冇好啲吖！」思敏即時張音量收細左講。
「...好...好小小啦，我想返屋企呀！」我同思敏講，
因為依一刻我個腦只係想快啲可以返屋企攤上張床度姐，
其他野...就算死人冧樓都一於小理。
但係唔知點解思敏竟然扶住我行左去停車場喎，
佢唔係覺得我仲揸到車吖嘛？
「...聰...聰哥，坐啦。」思敏竟然打開左七人車中門，
再將中排坐位較低左，形成一張床咁。
「...吓...你？」我有啲驚訝咁望住思敏。
「...聰哥你坐啦，我...我有車牌架，等...等我送你返去啦。」
思敏邊講邊扶我入車籠，估唔到原來思敏會有車牌，
從來都冇聽佢講過。
攤左上車之後，我處於半昏迷狀態，模糊間...我見到思敏雞手鴨腳咁搞左好耐先開得郁我部車，
途中見佢有啲地方唔明或者唔知啲制喺邊都唔敢問我，硬著頭皮咁自己摸索，
到最後...唔知過左幾耐...思敏終於都送到我返將軍澳天晉啦。
喺我指示下，佢成功將部車泊好左，雖然成部泊到 歪歪斜斜咁，
但係成功揸到返離都真係算好叻架啦。
泊好車後，思敏繼續扶住我，搭𨋢返到屋企，再扶住我攤左落我張床度，
之後我就正式進入昏迷狀態啦。
隱約間...聽到思敏行離行去嘅腳步聲，
亦感覺到思敏用熱毛巾幫我抹面抹身....
到最後我終於都訓著左....z....z....。
Z.....
Zz.........
「........。」唔知幾耐之後我起左身。
「...哈哈....哈哈！」廳出面傳離阿妹同阿媽嘅笑聲，
睇離唔知傾咩傾到好開心。
胃痛已經全消，但係仍然有唔舒服嘅感覺，我帶住疲倦嘅身體慢慢步出房間。
行到一半已經見到阿妹同阿媽坐左喺梳化度高談闊論緊，而且思敏亦都喺度。
我望一望牆上面嘅鐘，原來經已係夜晚嘅十點幾啦，再望望張枱空空如也，
佢地應該已經食完晚飯而家喺度hea緊。
「...咦....大佬，醒左拿。」阿妹望到我啦，而家思敏同阿媽都望左過離。
「好肚餓呀...有冇野食呀？」我望住阿媽問。
「...好返啦咩？飯就冇啦，不過思敏就煲左啲粥比你食。」阿媽講。
「...係...係呀，我煮返熱好快就食得架啦聰哥。」
思敏即刻企左起身，好緊張咁行左入廚房。
「...唔該！」我答，之後就坐左埋梳化度，
而阿妹同阿媽兩個就喺度偷笑。
「...笑咩呀！」我細細聲問。
「...執到啦...阿哥你！」阿妹揶揄緊我。
「...講咩呀！」我無奈回應。
「...思敏...由下午三點幾一直陪你到依家呀，又幫你抹面又幫你執房，
頭先食飯果陣仲驚你訓醒會冇胃口，專登親自煮啲瘦肉粥你食呀！」
阿妹又比說話我聽啦。
「...思敏真係一個好女仔離架，依個新抱我認定架啦！」阿媽加把嘴。
「...阿媽呀！」我叫停左阿媽，因為佢地越講就搞到我越大壓力，
係...鬼唔知思敏對我好咩，之但係...唉...我都唔識講啦。
「...食得啦，你想喺房食定廳呀？」說時遲 那時快，
思敏已經煮返熱碗粥拎住行左出離啦。
因為唔想繼續留喺廳睇佢地面色，所以我選擇左返房食。
入房後...我坐左埋電腦枱，思敏張碗粥放低左之後，
就坐左喺我床邊望住我食野啦。
「...今日真係唔該哂呀！」食緊果陣，我見思敏唔出聲，所以我打開話題。
「...最緊要聰哥你冇事姐。」思敏講。
「...係啦，都好夜啦呵！」原來已經成十一點，我望一望個電話，
再望一望思敏講。其實我咁講係有小小想叫思敏走嘅，
因為比阿妹同阿媽話完，依家對住佢我壓力更加大添。
「...係...係啦，成十一點架啦。」思敏同樣拎左個電話出離望，
但係就好似冇咩意識想離開咁。
「...咯咯....！」說時遲 那時快，忽然傳離敲門聲。
「...入離啦！」我回應。
「...嚓...！」原來係阿妹，佢而家推門入左離，
而且手上仲拎住左套睡衣添，搞咩呢？
「...嘻嘻...冇阻住你地吖嘛，思敏牙...依套睡衣比你嘅！」
阿妹笑笑口咁對住我地講，咪住先...佢咁係咩意思呀？
「...睡衣？」我好疑惑咁望住阿妹問。
「...都咁夜啦，阿媽叫左思敏喺度過夜架啦，冇話你知咩！」
阿妹一副理所當然嘅樣，喂...你地做決定前唔洗問過我先架咩？
「...吓...！」我講。
「...係...係呀...聰哥！冇事吖嘛？」思敏問。
「...冇...冇野...哈哈！」我一邊苦笑一邊啤行阿妹。
阿妹放低左啲睡衣、毛巾同牙刷之後，就行返出去啦。
其實思敏住得好近架咋，搭港鐵都係一個站架咋，
咁搞法我成晚都唔洗訓啦。
「...哈哈...聽日唔洗返工咩你？」我笑笑口問。
「...聽日返晏呀！」思敏回應。
「...哦...係牙！er...我沖涼先啦...你坐陣先啦。」我一路行入浴室一路講。
呼...幾大都避吓先。
~…滴…。~
~...滴嗒...。~
~…沙....沙....。~
吖....好舒服呀...，搞左成日又訓地下又盛咁...
而家沖返個涼個人都精神返...
「...嚓...！」但係沖沖下，思敏忽然推門入左離。
「...聰哥牙...你唔記得攞衫褲呀！」思敏隔住浴屏講。
「...er...唔該。」我用個背脊得住思敏，繼續沖涼，但係點知...
「...轟隆～轟隆～」再過多一分鐘，思敏竟然趟開浴門，而且仲行左入離添。