Welcome to Knot ~ Season 2: #191. 靖

「吓？！」我有啲唔太相信自己嘅耳仔，立刻坐直個人，定眼望住Taz。「你傻咗咩？知唔知自己係到講緊咩呀？」
「我冇傻呀。」Taz都同我面對面坐好，捉住我對手，好認真咁同我講：「我真係覺得Oppa講得好啱，要係茫茫人海搵到個啱嘅已經唔容易，仲要時間都啱，真係好難。唔講其他人，Sky已經一個好好嘅例子，同佢Ocean唔啱咩？結果咪又係有緣無份; 同Oppa呢？我都唔知佢哋係人唔啱定timing唔啱，總之就係可惜。我知我同你其實都錯過咗好多時間同機會，以前係點其實都唔重要喇，我只係唔想同你再係將來嘅日子上再錯過咗啲咩，最後只係留底咗無奈同可惜。」
Taz講得好似好有道理：「靖，嫁俾我，俾我做你老婆，好好咁照顧你啦。」
講到呢到，我竟然忍唔住笑咗出嚟：「哈哈哈…傻妹，好似一直以嚟都係我照顧你多啲喎。而且我嫁俾你，你做我老婆，咁我做你咩呀？妹仔呀？！」
「咁梗係唔係啦，你做我內子，同埋俾我開始去照顧你多啲。」Taz帶啲興奮咁講。「咁你係咪應承我啫？」
我笑住咁搖一搖頭，從Taz嘅眼神，我睇到佢係幾咁失望：「你今日太衝動喇，又飲咗酒…你返去諗清楚先啦。到有一日你好肯定知道自己講緊咩，先再嚟同我講啦。我唔想你老咗嘅時候，先嚟為今日呢剎那間嘅衝動而後悔。」
「但係…」
「好喇！其實你有呢份心意，我已經好開心架喇。今日你飲咗好多架喇。入我Office休息下先，等陣等啲酒氣散咗，我哋先揸車返去啦。」我好堅決咁終止咗呢個話題。

講真，Taz向我求婚，我係開心架。試問邊個女仔俾自己深愛嘅人求婚，係會唔開心架？


但係我真係唔想有日Taz走嚟怨我，話點解當時唔俾時間佢諗清楚。
我太了解Taz嘅性格，要佢肯停落嚟只同我一個人一齊，其實好可能已經係佢最大嘅讓步，再要佢當眾承諾一生只係同我一個一齊，實在太唔似佢嘅作風。
結婚，邊個女仔唔想；同性結婚，更加係對我哋Lesbian…ok，仲有G man嚟講，要跨出去好大嘅一步。
我自己睇婚姻，係神聖架，係一生一世架，雖然話我唔反對人哋離婚，但係我唔會想自己將來會行到嚟呢一步。如果真係結婚，我會想係一生一世。

我無理會Taz失望嘅表情，因為我真係好驚自己會心軟。
返到去Office，我打咗個電話俾Sky：「喂？係我呀。宜家阻唔阻你呀？你同路比都ok嘛？冇，想話你知我接咗啫喱，同佢都傾咗陣…佢好好，同講咗我知你哋係嗰邊嘅事。我都未話你個傻妹呀，學咩人去自殺呀？！你有事咁我哋點？你唔係諗住要我一世都幫你睇住Knot呀？！你搞掂嗰邊啲嘢，就好快趣返嚟呀。我哋個個都好擔心你呀。你個心血好好，放心交俾我睇住先，睇住架咋，你要返嚟架。嗯…嗯…總之你同路比都要小心，有咩事要話俾我知呀。好啦，拜拜。」
剛放低電話，Taz帶啲失落嘅聲音就係我身後面響起：「Sky佢點呀？」
我轉身望住呢個小可憐，忍唔住一手攬住佢條腰，將佢拉近自己：「佢把聲都ok，應該冇咩事嘅。做咩呀你？咪咁啦，乖啦。」話口未完，我就主動鍚咗落去佢嘟起咗嘅小咀到。
我知道，要氹返呢個小寶貝，我今晚一定要落力啲先得。