Welcome to Knot ~ Season 2: #192. 啫喱

我都預咗返嚟之後，會有大把人嚟問我Sky點、台灣點、其至我同Sky係點。
所以我好有策略咁，預先請靖同Taz過嚟機場，因為我知道如果我可以令到佢哋都體諒同認同我，咁其他人都應該唔難去解釋。
結果一如所料，佢哋真係捉咗我去問﹐，我亦都如願咁解釋晒所有嘅事，安然咁離開咗Silence。

返到去舖頭個時，都已經接近5點，合乎常理地我先去同強哥強嫂講聲，同睇下舖頭點。
不得不讚下靖，一個人睇住Silence同Knot，重要幫我兼顧埋餅舖，Taz可以同佢一齊，我真係超讚成同放心。

就當我係餅房點緊貨嘅時候，強嫂走咗入嚟話出面有人搵我。
唔駛問都知，唔係八卦仔樂少，就一定係好兄弟亞King。
出到去，我見到嘅竟然係…


真係冤家路窄！！！

我最後決定唔去Knot住，因為呢一刻，我真冇咩精力去應付太多人同事。
我選擇去咗碼頭坐，就唔飲喇，煙呢，反而就開始扯。
「點呀？又會咁啱你係呢到嘅？」我扯咗兩啖煙，轉而開始對跟住我而嚟到碼頭嘅佢講。
「做咩啫你？見到我唔駛好似有咩深仇大恨咁架！」我嘅前度－森木開始用佢好嗲嘅聲音同我講嘢，一把本來對我嚟講好有吸引力，但宜家聽落有啲煩厭嘅聲。
「我同你…當然唔係咩深仇大恨，但我又睇唔到有咩原因你需要嚟搵我喎。」
「傻豬，我唔係專登你搵你架。」森木開始點起佢支堙。
「你講咩？唔係專登嚟搵我，咁你又嚟搵我？重有，咪叫我傻豬，我唔係你咩傻豬。咪叫得咁親切。」
「哈哈哈…你睇下你，真係呀！我只係路過，咪嚟搵你打聲招呼囉。其實我都只係想同近啲隔離鄰舍打招呼啫。」


「咩呀？咩隔離鄰舍？」我開始覺得有啲不安。
「咦？！乜樂少冇同你講咩？我前兩日見到佢，我以為佢有同你講添。」森木吹出一啖堙，好似故意有嘢唔繼續講咁。
「其實你想講咩，可唔可以爽快啲，一次過講晒？我重有大把嘢做，你亦唔需要諗住離間我同我班朋友。」我開始唔耐煩。
「Relax！！」佢又扯咗口煙。「呼～我喺你後兩條街到開咗間日本餐廳，重裝修緊，咁我見有時間，咪同其他舖打個招呼囉。」
「你…你明知我住呢頭，你都重返嚟呢到開舖？」
「唏～啫喱，成熟啲啦，邊個話唔可以去自己個ex住緊嘅地區出現架？如果真係咁，咁好多人其實連屋企門口都唔出得啦。呢頭有舖位啱我，我咪開囉。」點解呢個人可以咁恐佈架？！
「我唔理你，總之我警告你唔好諗住搞我或者我啲朋友，唔係我真係會同你沒完沒了。」
「哈哈哈～」森木突然成個人挨住我，我當然立刻成個人彈開。「原來你係想同我繼續有啲關係。傻豬，我哋分咗手架啦。」
「你係咪痴線架？」我忍唔住問。「當年你返嚟咁呃我，我都算，唔同你計，宜家你重敢返嚟？！」
森木又突然粒聲唔出，行咗去憑欄望海。佢點起咗第二支煙。


「我…分咗手喇，所以先諗住返嚟香港生活。」
「…森木，我太明白你喇。我唔介意你返嚟香港生活，甚至係我附近開舖，但係你同你嘅伴侶點相處，我真係覺得你要檢討下。究意你係要一個可以幫你成功嘅人，定係一個可以同你一齊成長嘅人呢？你自己清楚啦。」講完，我都冇理佢，轉身就走返去舖頭喇。