Welcome to Knot ~ Season 2: #190. Taz

三條茂李坐咗係Silence嘅VIP房， 面前就有一大堆啤酒樽， 大大話話都應該有成打，証明呢個零鐘Oppa同我哋講嘅嘢，係幾咁詳盡，兼且係需要時間去思考同消化。
「你嘅意思啫係話…你決定放下Sky？」靖沉思咗一輪，先開口問。
Oppa點咗一點頭。
「咁即係你哋…game over呀？」我忍唔住問。
Oppa呷咗啖啤酒先回答:「 如果你所指嘅game over，係話我同Sky分咗手，咁我唔認同囉。因為我哋根本都未曾喺埋過一齊。咁既然無喺埋過一齊，又何來game over呢？」
「唔會再有機會？」唔知點解，我覺得靖有啲心事重重。
Oppa冷笑咗一下:「將來嘅事，邊個會知？」

三個人又變得默默無言，各有各飲酒，各有各諗嘢。
最後都係Oppa開聲先:「呼~其實今次過台灣，我最能夠體會到嘅，就係咩叫啱timing。我同Sky可能係對方啱嘅人，但可惜timing唔啱。又或者當timing啱時，我哋又已經唔係對方啱嘅人。」


可能係受到Oppa嘅影響，我都開始有啲傷春悲秋:「唉～緣分依家嘢真係難搞！」
「所以呢…」Oppa企咗起身。「當你可以搵到個啱timing又啱嘅人，就要好好把握，要珍惜呀！」
最後個句，我覺得Oppa係對住我講。

「你去邊呀？」靖問。
Oppa伸咗個懶腰:「返去囉。我點都要返鋪頭睇一睇架。靖你飲咗酒唔好揸車喇，我自己會搭車返去。晏啲你幫我車件行李返去啦。走先！」
我一直目送Oppa離開Silence，望住佢個背影，除左型同瀟灑，我真係諗唔到其他形容詞。
「唉～」嘆氣聲係嚟自我嘅左手邊。
「做咩唉聲嘆氣呀寶貝？」我轉向靖問。
「我係擔心Sky啫。以為啫喱可以幫到佢，點知都係唔work。唔知佢係台灣點呢？」


「放心啦，Oppa都話佢無事，而且仲有路比陪住佢，無事嘅！」我伸手攬住靖，算係安慰下佢。
「望係咁望啦。」靖順勢挨咗落我個心口到。嘩，佢呢刻個我見猶憐嘅表情，加上酒精嘅影響，仲要宜家成間房得我同佢…點忍呀？！

我當機立斷，一嚟就咀落靖個小咀到。
兩片香唇互相交纏，簡直係欲罷不能呀。
等陣先，做咗正經事先…我強行離開咗靖嘅香唇，望住眼前呢個女人，好！我決定咗喇！
「靖~」
「嗯！？」
「Oppa講得啱架，當你可以搵到個啱timing又啱嘅人，就要好好珍惜。我想話，我知道你係我啱嘅人，timing亦啱，所以我想好好珍惜你，唔想再錯過喇！靖~ 不如我哋結婚啦，你嫁俾我呀！」