Welcome to Knot ~ Season 2: #189. 靖

由今朝收到啫喱個電話，無啦啦話下晝會返到香港，叫我去機場接佢開始，我就有好多個問號係我個頭頂飛嚟飛去。
「你係到諗緊咩啫？」Taz伏咗係Knot嘅吧枱，瞪住對大眼望住係工作枱入面發緊呆嘅我。
「寶貝呀，我諗極都諗唔明…」我不自覺咁側起咗個頭，本來盤起左嘅頭髮，部分髮絲亦都跟隨住頭部嘅移動而痴住咗我塊面。
我嘅寶貝Taz好自然就成個上身爬過吧枱，伸手就幫我張髮絲撥開:「諗咩諗唔明啫？」
「咁明明啫喱飛過台灣，係為咗搵Sky，同陪住佢。但係點解宜家佢會自己返香港先呢？」
「唓！」Taz一手就啪咗兩粒我私人為佢準備嘅提子入口，邊食邊講:「咁或者係Sky叫Oppa返嚟幫你手呢！」
「哈～我咁渣，要人幫手架咩？呢幾日Knot同Jerry’s Bakery咪又係俾我搞得好地地。我話呀，或者係Sky唔要你個Oppa，趕佢返嚟都唔定呢。」
「點會啫，Oppa對Sky咁好。」一講到佢嗰好Oppa嘅壞話，Taz就會起晒弶咁。
「係係係，乖，咪勞氣啦。」為咗安撫呢隻小勞蘇，我唔避嫌兼好大膽咁一手就拖住咗佢隻小手，另一隻手就開始除我嘅圍裙。
「嘩！你想點呀？舖面嚟架喎！」Taz立即縮開被我拖住嘅手，驚死我會霸王硬上弓咁。


「你亂諗咗去邊呀？」對住Taz嘅反應，我只係覺得佢真係好可愛。
結果我終於除咗條圍裙，行咗出工作枱之後，又再行到去我寶貝面前，再次一手拖住佢行出Knot，重邊行邊放返啲頭髮落嚟。
成個感覺就係型呀！

「你諗住帶我去邊呀？」Taz坐咗上我架Saab 9-3 Aero，綁埋安全帶，先開口問。
「傻妹，夠鐘去機場接你Oppa機呀！」講完，我就專登轉身望住呢個口硬心軟嘅女朋友，仲將自己哄埋佢到:「唔係你以為我帶你去邊喎？」
唔係親眼望住佢塊面慢慢變紅，我都唔知呢個衰妹原來識怕醜。
我忍唔住笑咗出嚟:「傻妹。」
輕輕係佢唇上面啄咗一下，我就笑住咁開車去迎接我嘅答案。



經歷咗一輪等機接機嘅例行過程，我哋終於一行三人加件行李可以平安坐上我架車。
車上並無人開口講任何嘢: 啫喱全程粒聲都唔出，只係呆咗咁望住車窗外嘅風景，我同Taz都唔敢出聲打擾佢。
其實由佢出閘開始，除咗打招呼同講唔該之外，啫喱就無再主動講過任何嘢，搞到我同寶貝都唔好意思開口問。
直到過咗青馬大橋，我轉咗去右手邊，啫喱先好似如夢初醒咁:「咦？！我哋去緊邊呀？唔係返海邊咩？」
「唏！你帶住咁多答案同手信返嚟，你覺得我哋會咁輕易放你入堆餓鬼到咩？我哋梗係要飲咗啖頭啖湯先啦！」Taz真係知我心意，因為我正正就係向住Silence駛去。